Економија
Исплатена поддршката за млекопроизводителите, сточарите, индивидуалните земјоделци

Агенцијата за финансиска поддршка во земјоделството и руралниот развој реализира исплата на финансиска поддршка по основ на повеќе мерки.
Речиси 4.600 млекопроизодители на своите сметки ја добија премијата за произведено и предадено млеко во период октомври – декември 2021 година. Корисници на оваа поддршка се производителите на кравјо, овчо и козјо млеко, кои сопственото производство го имаат предадено на регистриран откупувач на сурово млеко – запишан во регистарот на откупувачи на земјоделски производи.
„6.235 сточари што го зголемиле своето основно стадо и пчелни семејства добиваат финансиска поддршка од 24,5 милиони денари. Дополнителната поддршка изнесува 30 % од утврдената поддршка за основното стадо. Регистрираните земјоделци во согласност со Законот за вршење на земјоделската дејност и законот за пензиско и инвалидско осигурување се исплатени со 56,4 милиони денари како дополнителна субвенција од 20 % од висината на основните субвенции за 1.937 индивидуални земјоделци“, соопшти Агенцијата.
Извршена е и исплата кон речиси 2.000 производители на стратешки житни култури во висина од 46,3 милиони денари. Поддршката се однесува на набавка на вештачко ѓубриво за прихрана на земјоделските површини за есенската сеидба.
„Со овие исплати, висината на поддршката за земјоделците преку Програмата за земјоделство – директни плаќања и програмата за интервентен фонд реализирана е финансиска поддршка од 116 милиони евра наменета за земјоделците. Заедно со реализација на програмите за рурален развој и Ипард програмата, поддршката за македонскиот аграр обезбеден преку АФПЗРР изнесува 140 милиони евра. Во време на најголемата воена, економска и енергетска криза успеавме да останеме достоен партнер на македонските земјоделци и чинители од земјоделскиот сектор“, посочува директорот Никица Бачовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Позначајни движења кај каматните стапки на банките и штедилниците

Годишен раст на просечната каматна стапка на вкупните депозити од 0,38 п.п., при што во март таа изнесува 2,18%, извести Народната банка.
Просечната каматна стапка на вкупните кредити бележи годишен пад од 0,35 п.п. и изнесува 5,15%.
Најновото соопштение за позначајните движења кај каматните стапки на банките и штедилниците е достапно на следната врска
Економија
Вонреден состанок на Божиновска и Бислимовски: МЕПСО може да исклучува фотоволтаици за стабилен систем за 1 Мај

По насока на министерката за енергетика Сања Божиновска, за претстојниот празник 1 Мај повторно ќе се активираат мерките што беа применети од страна на операторот на електропреносниот систем МЕПСО и Регулаторната комисија за енергетика и водни услуги (РКЕ) за време на велигденските празници, со цел да се обезбеди стабилен и сигурен електроенергетски систем.
Одлуката е донесена на вонреден состанок на министерката Божиновска со претседателот на РКЕ, Марко Бислимоски, и заменик-генералниот директор на МЕПСО, Александар Пауновски.
„Овие два дена во Атина, каде што се одржува Балканскиот енергетски самит, разговаравме со колегите од регионот и се координиравме околу мерките што сите земји мора да ги преземат за стабилен систем. Како веќе информиравме, со координација меѓу сите клучни енергетски чинители и по насока на ENTSO-E, МЕПСО веќе примени дел од тие мерки за велигденските празници и успеавме да го неутрализираме ризикот од блек-аут – граѓаните имаа непречено снабдување со електрична енергија. Проценките се дека ваквата состојба ќе продолжи и за престојните првомајски празници и затоа е неопходно овие мерки повторно да се активираат,“ изјави министерката Божиновска.
Оваа мерка, која за првпат беше применета за време на велигденските празници, подразбира привремено исклучување на фотоволтаични електрани со цел да се растерети електроенергетската мрежа и да се овозможи сигурно управување со системот во услови на зголемени флуктуации и оптоварување.
Мерките предвидуваат примена на корективни диспечерски интервенции, односно привремено и наизменично исклучување на дел од фотоволтаичните електрани поврзани на преносната и дистрибутивната мрежа, со што МЕПСО ќе има целосна можност да го раководи системот и да ја обезбеди неговата стабилност, велат од Министерството за енергетика.
Економија
Ристески не очекува поскапувања од четврток: Се надевам дека трговците ја научија лекцијата

Ако цените нагло почнат да скокаат од четврток, кога истекува сегашната мерка за ограничени маржи до 10 %, мерката може да продолжи, најави денес заменик-министерот за економија и труд, Марјан Ристески. Тој смета дека со сите досегашни мерки трговците ја научиле лекцијата и нема вештачки да ги креваат инфлацијата и цените.
Првин ќе видиме какви конечни резултати даде мерката. Од она што го имавме досега од Државниот завод за статистика, резултатите беа добри, ги знаете податоците, но крајните резултати ги чекаме наредната недела.
„Ако има потреба, би продолжиле со мерката, ако нема, тогаш останува пазарната економија да ги регулира цените. Се надевам дека поучени од минатото сите оние учесници во синџирот на трговијата ја научија лекцијата дека, пред сè, треба да бидат граѓаните и заштитата на животниот стандард. Ние сите заедно треба да направиме сè за да го заштитиме стандардот на граѓаните, односно да не правиме вештачко подигнување на инфлацијата и на цените кога нема економски услови за тоа, односно да ги почитуваме законите на економијата“, рече заменик-министерот Ристески.
Според досегашните податоци од Државниот завод за статистика, досегашната мерка, според Ристески, дала добри резултати, но за одлука дали таа ќе продолжи, ќе ги почекаат конечните резултати. Тие ќе бидат готови следната недела.
Во февруари годинава, Владата, за да го заузда покачувањето на цените, донесе одлука за ограничување на профитните бруто- маржи на над 1.000 прехранбени производи и средства за хигиена со важност до крајот на април.