Инвестираме во поздрава животна средина за подобар стандард на живеење, истакнаа заменик претседателот на Владата, Кочо Анѓушев и министерот за животна средина и просторно планирање, Садула Дураки, кои денеска присуствуваа на отворањето на пречистителната станица во Кичево за третман на отпадни води,

Пречистителната станица која е сместена во близина на Кичево е со инсталиран капацитет за 48.000 жители. Реализацијата на проектот вклучува и изградба на колектор и пристапен пат.

При своето обраќање, Анѓушев истакна дека финансиската вредност на проектот од 8,3 милиона евра, дел обезбеден од ЕУ и со 15% партиципација на Владата, е надмината од значењето на проектот за граѓаните, за унапредување на квалитетот на животот и за примената на технолошко-иновативни решенија во подигнување на животните стандарди на граѓаните.

„Секогаш е добро кога нешто се прави соодветно на ЕУ стандардите, а ЕУ не носи само желба Македонија да биде дел од тоа семејство, туку со себе носи и стандарди за квалитет на животот на граѓаните, на индустријата и на секојдневието. Со оваа донацијата од Европската Унија и нејзините граѓани, ние имаме уште поголема обврска да достигнеме повисоки стандарди, критериуми и квалитет на живот и на нашите граѓани. Проектот значи голем исчекор во заштита на животната средина во регионот и со примена на ова иновативно решение стандардите на европскиот живот се пренесени тука“, изјави вицепремиерот.
Македонија за да биде комплетно покриени со пречистителни станици, треба да бидат направени 87 вкупно, ова е 16-ти успешен проект во рамките на ИПА. Проектот за изградба на пречистителната станица за отпадни води во Кичево е финансиран од Европската Унија преку Инструментот за претпристапна помош (ИПА), од делот за регионален развој – компонента три.

На отворањето обраќање имаше шефот на Делегацијата на Европската Унија, амбасадорот Самуел Жбогар.

„Овој проект е дел од активностите финансирани од ЕУ за унапредување на инфраструктурата која овозможува заштита на животната средина согласно стандардите на ЕУ преку изградба на пречистителни станици за отпадни води. Паралелно со инвестициите во инфраструктурата, ЕУ исто така работи заедно со државата на реформи во секторот води, со цел да се обезбедат одржливи услуги за водоснабдување на сите граѓани“, истакна амбасадорот Жбогар.

Реализацијата на проектот е во соработка со Секторот за ЕУ при Министерството за животна средина и просторно планирање и Секторот за централно финансирање и склучување на договори при Министерството за финансии. Министерот за животна средина и просторно планирање Садула Дураки, го потенцираше значењето на проектот за заштита на животната средина и воедно најави дека успешната реализација на овој проект е предуслов за реализирање на уште поголем проект за општина Кичево во рамките на ИПА 2 кој предвидува рехабилитација и изградба на нова канализациона мрежа во должина од приближно 100 километри.

Изградбата на Пречистителната станица за отпадни води во Кичево ја реализираше компанијата WTE Group, која е во сопственост на ЕВН Групацијата.

Пречистителната станица во Кичево е изградена за помалку од две години и е втора што е пуштена во употреба во рамки на проектот. Првата пречистителна станица беше пуштена во употреба кон крајот на минатата година, а лоцирана е во с. Сачево, Струмица. Се очекува наскоро да биде пуштена во употреба и третата пречистителна станица која се наоѓа во Радовиш. Вкупната вредност на овие објекти изнесува 21 милион евра.
На настанот присуствуваше и Крешник Бектеши, министер за економија.