Претседателот на Владата на Република Северна Македонија, Димитар Ковачевски, заедно со министерот за земјоделство, шумарство и водостопанство, Љупчо Николовски, денеска присуствуваше и се обрати на настан по повод доделувањето на договорите на земјоделците поддржани со новата мерка „Бизнис-план во земјоделството“.

На настанот, премиерот Ковачевски, министерот Николовски, директорот и заменик-директорот на Агенцијата за финансиска поддршка во земјоделството и руралниот развој, Никица Бачовски и Ремзи Абдулахи, како и државниот секретар во Министерството за земјоделство, шумарство и водостопанство, Реџаил Исмаили, доделија договори на земјоделците што ќе ја користат поддршката во форма на кофинансирање во висина до 10.000 евра за корисник.

„Денес, доделуваме 206 договори на индивидуални земјоделци поддржани преку мерката ‘Инвестиции во модернизација на земјоделските стопанства’ или популарно наречена мерка ‘Бизнис-план’ од Програмата за рурален развој, која ја воведовме првпат како дел од најголемата земјоделска реформа. Со новата мерка ‘Бизнис план’ овозможивме помош во висина до 10.000 евра како кофинансирање за набавка на производствена опрема и механизација. Земјоделците имаат можност да набавуваат земјоделска механизација, како пчеларска опрема, силоси, опрема во објекти за производство на храна од животинско или неживотинско потекло, опрема за навигација и смарт-земјоделство на постојни трактори, комбајни и приклучна механизација и широк спектар на друг вид опрема, со која сме во чекор со потребите и современите светски трендови“, истакна премиерот Ковачевски во своето обраќање на настанот додавајќи дека со оваа мерка се инвестираат 1,5 милион евра за поддршка на земјоделците при набавка на опрема.

Премиерот Ковачевски во своето обраќање ги потенцира мерките што се преземаат во насока на поддршка на земјоделството и нагласи дека Владата е партнер на земјоделците. Притоа премиерот ја спомена финансиската поддршка за малите производители на храна, за малите семејни винарници, за малите дестилерии, како и за младите земјоделци, жените земјоделки и поддршката во рамките на ИПАРД-програмата.

„Целта на секоја држава е да произведе повеќе домашна храна. Затоа, ставивме силен фокус на зголемување на домашното производство на земјоделски производи и храна преку конкретни мерки од кои придобивки имаат и земјоделците, меѓутоа и граѓаните. Реализираме еден од нашите врвни приоритети – со повеќе инвестиции за модернизација до стабилно, продуктивно земјоделство и задоволни земјоделци. Ги помагаме нашите вредни земјоделци за остварување на нивните визии за добар бизнис, поквалитетно домашно производство и побогати приноси. Овозможуваме тие да се профилираат и да станат поконкурентни и на домашните и на странските пазари“, рече премиерот Ковачевски.

Министерот за земјоделство, шумарство и водостопанство, Љупчо Николовски, во своето обраќање рече дека мерката „Бизнис-план“ е воведена првпат годинава, а денес се финализира со бројки за почит.

„Оваа мерка се покажа како една од најдобрите, најпотребните или народски кажано полн погодок. Сме успеале да допреме до сржта на очекувањата на земјоделците, да им го дадеме токму тоа што го сакаат и што им треба. Одобрени се 206 апликации.

Тоа се 206 одлични идеи за земјоделски бизнис. Ова значи дека сме иницирале лавина мисли, идеи, предлози, тоа е лавина нова надеж кај земјоделците и нивните семејства, нова желба за работа, нов поттик, ново ентузијастичко размислување дека државата силно ги поддржува земјоделците, со неповратни финансиски средства во форма на грант до 10.000 евра за корисник“, истакна министерот Николовски на денешниот настан.