Економија
„Македонија бележи двојно повисока инфлација во споредба со Европа, а платите остануваат мизерни“, велат од партијата Левицата

„Според најновите податоци, Македонија е втора во регионот по највисока инфлација од 4,9%, што значително ја надминува просечната инфлација во еврозоната (2,5%). Овој алармантен тренд покажува дека инфлацијата не е увезена, како што сакаат да се бранат владините претставници, туку е директен резултат на лошата структуираност на македонската економија, неолибералните политики и неспособноста на Владата да се справи со економската нестабилност и да ги заштити граѓаните од континуираниот пад на куповната моќ“, велат од партијата Левица.
„Додека соседни земји како Грција (2,7%), Словенија (2,0%) и Албанија (1,9%) имаат релативно стабилни цени, Македонија се соочува со инфлациска стапка која е двојно повисока од онаа на еврозоната. Ова покажува дека надворешните фактори не можат да бидат изговор, туку дека проблемот лежи во лошите административни решенија, катастрофалната кадровска политика, корупцијата, непотизмот и поразителните внатрешни економски политики.
Напливот на новоформирани лажни и измислени работни места во државната администрација со кои партиите им се оддолжуваат на своите партиски војници произведуваат нула новосоздадена вредност, а ја зголемува побарувачката за производи за широка потрошувачка, но и за недвижнини, сервиси и услуги, нарочито во главниот град каде цените се забележливо повисоки отколку во внатрешноста на републиката.
Владата не презема суштински мерки за контрола на инфлацијата и заштита на стандардот на граѓаните. Наместо да воведува регулирани маржи на основните прехранбени производи и да ја засили борбата против монополите, таа ги штити интересите на олигарсите и увозничките лоби групи, а граѓаните се оставени на милост и немилост на истите.
Македонија останува зависна од увозот на храна и енергенси, што ја прави ранлива на надворешни шокови. За разлика од земји како Србија (4,6%) и Бугарија (3,7%) кои имаат домашно производство што делумно ја амортизира инфлацијата, кај нас индустриското производство е во слободен пад. Тоа пред сѐ се должи на неповолната деловна околина, рудиментиран и застарен финансиски сектор и груба и сурова партизација на сите општествени текови. Накртко, државата, односно коалицијата на власт за некои е мајка, а за други маќеа!
Денес повеќе од секогаш е очигледна потребата од алтернативен економски модел!
Единствениот излез од овој кризен тренд е радикална промена во економската стратегија поради што Левица се залага за:
– Државна контрола, односно реално влијание врз стратешките сектори (енергија, храна, транспорт);
– Директна поддршка за домашното индустриско производство, земјоделие и сточарство;
– Регулација на трговските маржи за основните производи за широка потрошувачка;
– Оданочување на големите профити на корпорациите кои ги експлоатираат граѓаните;
– Праведна и рамноправна деловна околина каде што сите чинители би имале еднаков прстап до информации, финансии, инвестиции, но и владини и државни услуги.
Секторот Политичка економија при Левица, детално ги анализира овие трендови и активно предлага мерки за економска стабилност кои ќе ги заштитат работниците, пензионерите и сиромашните од економската експлоатација. Нашата борба е за економија во служба на народот, а не на профитерите. Владините политики ја втурнуваат Македонија во економска пропаст, оставајќи ги работниците и сиромашните да ги сносат последиците.
Време е за нов економски модел кој ќе ја стави државата во функција на граѓаните, а не на капиталот. Левица е подготвена да го предводи тој процес и да ја врати контролата врз економијата во рацете на народот“, соопштуваат од партијата Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Трамп до австралискиот амбасадор: Не те сакам и веројатно никогаш нема да те сакам

Претседателот на САД, Доналд Трамп, му рече на австралискиот амбасадор во САД и поранешен премиер, Кевин Рад, дека не го сака и веројатно никогаш нема да го сака.
Трамп вчера се сретна со сегашниот австралиски премиер, Ентони Албанезе. Политичкиот уредник на австралискиот „Скај њуз“, Ендру Кленел, го праша Трамп зошто требало толку долго време за да се организира состанокот. Тој беше заинтересиран дали има некаква врска со ставот на Австралија за климатските промени, Палестина или изјавите на Рад.
🤪 Trump to Australia’s ambassador: “I don’t like you either.”
An awkward exchange took place between the U.S. president and the Australian ambassador🇦🇺
After signing an agreement on rare earth minerals, a journalist reminded Trump that Ambassador Kevin Rudd had once called him… pic.twitter.com/UEooOxvqYs
— NEXTA (@nexta_tv) October 20, 2025
„Не знам ништо за него. Ако рекол нешто лошо, тогаш можеби би сакал да се извини. Дали амбасадорот рекол нешто лошо? Не кажувајте ми. Не сакам да знам. Каде е тој? Дали сè уште работи за вас“, Трамп го праша Албанезе.
Албанезе одговори дека Рад е сè уште амбасадор и покажа кон него. Рад призна дека кажал лоши работи за Трамп пред да стане амбасадор. „Ги повлекувам тие изјави“, рече тој.
„Ни мене не ми се допаѓаш. И веројатно никогаш нема да ми се допаднеш“, рече Трамп.
Во ноември минатата година, откако Рад беше потврден како избор на Албанезе за амбасадор на САД, се појави интервју од 2021 година во кое тој го опиша Трамп како селски идиот. Подоцна се дозна дека Рад избришал некои стари објави на социјалните мрежи во кои го нарекол Трамп предавник на Западот и лудак.
Економија
Цените на нафтата паѓаат

Цените на нафтата паднаа под 61 долар на меѓународните пазари денес, поради мрачни проценки за вишок понуда и знаци за затоплување на односите меѓу САД и Русија што би можело да значи полесен пристап до руска нафта.
На лондонскиот пазар, цената на барел по пладне беше за 72 центи пониска отколку на затворањето на трговијата на крајот од минатата недела, на 60,57 долари. На американскиот пазар, барелот се тргуваше по цена за 66 центи пониска, на 56,88 долари.
Расположението на пазарите е намалено од проценките за вишок понуда на крајот на оваа година и почетокот на следната година.
Понудата брзо расте, додека побарувачката е пригушена, објави Меѓународната агенција за енергија (ИЕА) минатата недела.
Во такви услови, светските залихи достигнаа највисоко ниво за четири години во август, од 7,9 милиони барели, пресмета агенцијата, а вишокот на понуда треба нагло да се зголеми најдоцна од следната година.
Инвеститорите се загрижени и за затворањето на американската влада поради спор околу буџетските трошоци.
Демократите го условуваат прифаќањето на предлогот за буџет за 2026 година со продолжено финансирање на програмата за здравствено осигурување за најранливите групи граѓани, додека републиканците ја отфрлаат оваа отстапка.
Дури 750.000 владини службеници би можеле да бидат испратени на неплатен одмор, што исто така ќе значи пониски трошоци, предупреди независниот институт CBO.
Економија
Инженерите на „Фероинвест“ го претставија на „МАКО CIGRE“ најновиот проект за батериски системи

Фероинвест учествуваше на годинешната конференција на МАКО CIGRE, каде беше презентиран трудот на тема „Интеграција на батериски систем од 1.6 MW / 3.73 MWh во постоечка фотоволтаична централа“.
Трудот, подготвен од инженерите Стефани Георгиевска, Сандра Цветанова, Сашо Милевски и Војдан Андонов, претставува практичен пример за примена на домашно знаење и технологија во проектирање и изведба на современи системи за складирање електрична енергија (BESS).
Со овој проект, ФЕРОИНВЕСТ ја демонстрира својата инженерска подготвеност за интеграција на батериски системи, кои се клучен дел од енергетската транзиција и овозможуваат поголема ефикасност, стабилност и исплатливост на инвестициите во обновливи извори на енергија.
„ Македонија располага со знаење и експерти кои можат да реализираат високотехнолошки енергетски решенија според европски стандарди, што се покажа со тоа што нашите инженери ја инсталираа првата лиценцирана батерија за складирање електрична енергија во земјава“ изјавија од Фероинвест.
Анализите прикажани во трудот потврдуваат дека ваквите системи се профитабилни и економски оправдани, со период на поврат на инвестицијата од околу 4 години и значителна добивка во текот на работниот век на батеријата.
Тоа ги прави батериските системи не само технолошка потреба, туку и одлична можност за инвеститорите кои сакаат да вложуваат во модерна, стабилна и исплатлива енергетика.
На советувањето на здружението на професионалци, инженери, универзитетски професори и компании од енергетскиот сектор во Македонија, МАКО CIGRE, ФЕРОИНВЕСТ одржа и посебна корпоративна презентација на која ги запозна присутните со сите проекти за кои компанијата нуди решенија ,,клуч на рака”, за батериски системи, фотонапонски електрани, мали хидроелектрани, биогасни електрани, производство на трафостаници, со комплетно вклучено проектирање, изведба, одржување и откуп на електричната енергија.
ПР