Економија
Министерката Апостолска ја посети фабрика „Кромберг и Шуберт“ во Жабени

Министерката без ресор задолжена за странски инвестиции, Зорица Апостолска, ja посети компанијата „Кромберг и Шуберт“, која работи во индустриската зона Жабени во Битола. Во рамки на посетата министерката Апостолска направи обиколка на компанијата и се запозна со производствените процеси и начинот на организација на работата.
Апостолска имаше и работен состанок со Уве Шилинг, технички директор, и Тања Милисковиќ, комерцијален директор на компанијата. Министерката Апостолска пред менаџментот на компанијата истакна дека Владата работи како партнер на бизнисот, посветена на градење стабилно и предвидливо деловно опкружување со силна институционална грижа за надминување на сите предизвици, а со цел обезбедување непречена работа на странските компании во земјава и нивно стимулирање за реализирање нови инвестициски проекти.
„Преку законски втемелени економски политики на стимулација и конкретна поддршка на странските компании за реализација на нови инвестиции, Владата спроведува јасна визија за индустријализација на земјава и креирање нови и добро платени работни места. Странските компании, како што е и случајот со Кромберг и Шуберт, се значаен фактор во овие владини определби и во смисла што внесуваат современа технологија и напредни менаџерски знаења, односно отвораат потенцијал и за развој на човечкиот капитал“, рече министерката Апостолска и изразувајќи задоволство за економските бенефиции кои компанијата ги дава за Пелагонискиот Регион испрати порака на охрабрување до менаџментот за продолжување на инвестициските активности.
Министерката Апостолска од страна на менаџментот на компанијата беше запознаена со реализираните и тековни проекти на производство на кабелски снопови кои се користат од страна на реномирани компании од автомобилската индустрија.
„Во изминатите години постојано расте бројот на вработените и во моментов компанијата има над 6.400 вработени, што ја прави една од најголемите работодавачи во Северна Македонија. Грижата за вработените во компанијата е главната водилка на Кромберг и Шуберт, а фактот дека во оваа компанија се вработени граѓани од целиот Пелагониски Регион и пошироко, компанијата е позната и по многуте добротворни акции и придонеси во здравството и образованието пред сè како и во другите сфери од животот“, беше порачано од страна на менаџментот на средбата со министерката Апостолска.
Скопје, 26.07.2019
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.
Економија
Вреди: Поддршка за 200 нови зелени работни места во микро, мали и средни претпријатија

Од Вреди како коалициски партнер на Владата денеска објави историска мерка за поддршка на создавање нови работни места преку зелени инвестиции, во соработка со Министерството за економија и труд и Агенцијата за вработување.
Оваа мерка ќе овозможи вработување на 200 невработени граѓани во микро, мали и средни претпријатија, кои ќе добијат финансиска поддршка преку неповратен грант од 250.000 до 750.000 денари, во зависност од бројот на новите работни места: 250.000 денари за едно работно место, 500.000 за две и 750.000 за три.
Грантовите ќе овозможат компаниите да инвестираат во нова опрема и машини, софтвер и лиценци, како и технологии за обновлива енергија и материјали за енергетска ефикасност. На тој начин, мерката создава не само работни места, туку и зелени работни места кои придонесуваат за одржлива економија.
Јавниот повик е отворен за сите микро, мали и средни претпријатија кои ги исполнуваат законските услови, со приоритет за стратешките сектори: преработувачка индустрија, земјоделство, шумарство, водостопанство, водоснабдување и управување со отпад, градежништво и транспорт. Апликациите можат да се поднесуваат до 1 септември секој работен ден од 08:00 до 14:00 часот во Центрите за вработување низ целата земја, а сите информации се достапни на веб-страницата на Агенцијата за вработување.
„Ова е чекор кој покажува дека владата не се мери со слогани, туку со резултати. Инвестираме во вработување, развој, зелена економија и безбедна иднина за сите. Ова е промената што ја ветивме – влада која работи со срце и визија“, се наведува во соопштението.