Економија
Мицкоски: Владата ја продава енергетската сувереност на Македонија за кредит од 100 милиони евра

Претседателот на ВМРО-ДПМНЕ, Христијан Мицкоски, за време на денешната посета на Кочани се осврна на тоа како Владата за кредит од 100 милиони евра ги турка кон бездна двата стожера на македонската енергетска сувереност, РЕК „Битола“ и РЕК „Осломеј“, со што илјадници граѓани би останале на улица, а таквата погрешна енергетска политика директно би се одразила и на политичката сувереност на Македонија.
„Мислам дека Владата оди чекор понапред, односно ги турка директно во бездна, сака да ги затвори РЕК ‘Битола’ и РЕК ‘Осломеј’, двата стожера на македонската енергетска сувереност, а со тоа и сувереноста во политичка смисла на државата земајќи кредит од 100 милиони евра. Толку приближно тие ја процениле сувереноста на Македонија за да не ве чуди после зошто потпишуваат овие луѓе вакви договори какви што потпишуваат. Тие државноста на Македонија ја проценуваат приближно за 100 милиони и толку ним им значи Македонија. Потпишувајќи го овој кредит, тие се обврзале до крајот на 2023 година да го затворат ‘Осломеј’, а на крајот на 2027 година да го затворат и РЕК ‘Битола’, со што директно 4 илјади луѓе ќе остават на улица, а уште најмалку 40-ина илјади луѓе, кои соработуваат со АД ЕСМ, поранешно ЕЛЕМ, ќе трпат навистина сериозни загуби во тековното работење, луѓе што работеле на ремонтни активности, доставувачи итн., така што тој е погрешен пристап во енергетската политика, која директно ја афектира и политичката сувереност на Македонија, истакна Мицкоски.
Тој исто така додаде дека ВМРО-ДПМНЕ ќе се спротивстави на ваквиот погрешен чекор на Владата и дека наместо затворање на овие производствени комбинати, треба да се изнајде начин за нивна модернизација.
„Ние како ВМРО-ДПМНЕ ќе се бориме со сите сили што ги имаме во рамките на парламентот за ова да не се случи, туку, напротив, да најдеме сили и средства да ги модернизираме овие два производни комбината и да се вратат на оние патеки што беа пред 7-8 години кога произведуваа рекордни количини електрична енергија“, потенцира Мицкоски и додаде:
„Јас најодговорно тврдам дека доколку овие два производни капацитета работат онака како што треба, доколку се води сметка и правилно се менаџира водниот потенцијал во хидроелектраните, Македонија денеска немаше да увезува електрична енергија, односно ќе извезуваше. Но, за жал, овие 5 години се случува економско енергетско и политичко цунами, на кое, за среќа, набргу ќе му дојде крајот, а по крајот, доаѓа и одговорност“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Нови правила за одобрување возила од 1 септември

Министерството за енергетика, рударство и минерални суровини (МЕРМС) одржа работен состанок со над 40 овластени застапници и импортери на возила во Македонија.
На средбата присуствуваа министерката Сања Божиновска, директорот на Државниот пазарен инспекторат Влатко Стојкоски, претставници на Биро за метрологија и Царината како и професорот Дарко Данев кој ги презентираше измените во постапките за одобрување на возила, кои ќе стапат на сила од 1 септември 2025 година.
Овие измени се однесуваат на постапките за: одобрување на тип на возило, единечно одобрување на возило, идентификација и оцена на техничката состојба и издавање на потврди за исполнетост на техничките барања за возилата.
Клучната промена е тоа што, по 17 години од донесувањето на Законот за возила, истиот конечно ќе почне да се применува согласно европските стандарди.
„Го зајакнуваме системот на доверба меѓу институциите и импортерите, со јасни правила и навремена услуга за граѓаните. Ова е значаен чекор за приближување кон европските стандарди и подобрување на квалитетот на услугата која ја добиваат нашите граѓани“, изјави министерката Божиновска.
Клучни промени во постапките за одобрување на возила:
· Одобрување на тип на возило за сите негови варијанти и изведби според WVTA документот, освен ако импортерот не побара поинаку.
· Единечно одобрување ќе се врши исклучиво за возила за кои не е одобрен типот во РСМ и немаат одобрение за тип во ЕУ преку Биро за метрологија. Возила со претходно одобрен тип во ЕУ или во РСМ немаат потреба од посебна постапка за единечно одобрување и директно одат во постапка за идентификација и оцена на техничката состојба.
· Импортерите имаат обврска да издаваат потврди за исполнетост на техничките барања за сите возила за кои постоиевропско одобрение на тип (WVTA) или национално одобрување на тип. За останатите возила за кои немаат возила не постои одобрение на тип во РСМ или не постои одобрение на тип во ЕУ, импортерите немаат обврска да ги издаваат потврдите, ваквите возила ќе обезбедуваат потврди од независни институции прифатени од Бирото за метрологија.
· Грубата пресметка вели дека 1,3 милиони евра годишно досега оделе за TÜV потврди кои не требало да се бараат и тоа најголемиот дел од средствата оделе кај странски компании на кои им се плаќало – процесот сега ќе се регулира преку овластените застапници, домашни македонски компании.
· Роковите за одобрување на тип во Бирото за метрологија ќе бидат скратени двојно, за побрза и поефикасна постапка.
· Цените на услугите од Биро за метрологија ќе се регулираат со нов правилник.
· Потврдите за исполнетост на техничките карактеристики кај застапниците ќе чинат 40-50 евра.
Министерството нагласува дека соработката со застапниците е клучна за успешна примена на Законот и изграден функционален систем на доверба.
„Градиме партнерски однос со импортерите како клучен елемент во процесот на усогласување со европските стандарди. Граѓаните треба да се чувствуваат заштитени и поддржани при секоја постапка за одобрување на возила“, додаде министерката Божиновска.
Економија
Лагард предупредува: Економијата на ЕУ зависи од странските работници

Претседателката на Европската централна банка (ЕЦБ), Кристин Лагард, изјави дека приливот на странски работници во изминатите години значително ја поттикнал економијата на еврозоната, помагајќи да се надомести намаленото работно време и падот на реалните плати.
Говорејќи на годишниот симпозиум на Федералните резерви на САД, што се одржува во Џексон Хол, сојузната држава Вајоминг, Лагард нагласи дека миграцијата кон Европската Унија довела до рекорден број жители и покрај негативниот природен прираст.
„Странските работници дадоа значителен придонес за европската економија. Тие овозможија да се компензираат структурните предизвици, како што се пократкото работно време и пониските плати во одредени сектори“, изјави Лагард.
Таа додаде дека иако растот на бројот на работници ја поддржа економската стабилност, одредени влади на земјите-членки воведуваат ограничувања за нови мигранти, поради зголемено незадоволство кај дел од локалното население.
Според Лагард, оваа динамика ќе остане еден од клучните фактори во обликувањето на идните економски и социјални политики во Унијата.
Економија
Македонија е големо градилиште, над 1.200 проекти во општините, велат Перински и Николоски

Во моментов целата Македонија е едно големо градилиште, а само во општините се реализираат повеќе од 1.200 активни проекти поддржани од Владата и Министерството за транспорт, истакна Александар Николоски, потпретседател на ВМРО-ДПМНЕ и министер за транспорт, на Саем-Отчетот на градоначалниците на ВМРО-ДПМНЕ.
„Тоа се само проекти преку Министерството за транспорт, а да не зборуваме за големите инфраструктурни проекти како автопатите Охрид-Кичево, Кичево-Букојчани, Букојчани-Гостивар, Гостивар-Тетово, Прилеп-Битола, како и експресните патишта Прилеп-Градско и Куманово-Крива Паланка. Сега започнатите проекти се завршуваат, а граѓаните гледаат резултати“, рече Николоски.
Министерот подвлече дека ова ја враќа самодовербата кај граѓаните и покажува дека Македонија е способна да води големи проекти.
„Не е само патната инфраструктура, туку и железничките линии, аеродромите, авио линиите и обновливите извори за енергија. Во помалку од година дена завршивме еден проект со вредност од половина милијарда евра“, додаде тој.
Министерот за локална самоуправа, Златко Перински, истакна дека Владата финансирала околу 1.200 проекти во сите општини.
„На првиот повик беа пријавени 288 проекти, од кои 137 се завршени. На вториот повик беа поднесени 887 апликации, а прифатени беа 828 проекти. Кумулативно, тоа се околу 1.200 проекти кои се реализираат со помош на централната власт“, рече Перински.
Министерот додаде дека општините се соочувале со големи предизвици и немале поддршка од претходната власт.
„Ние им помогнавме да ги детектираат проблемите, да обезбедат одржливост и да ги реализираат поголемите проекти. Секој градоначалник се бори да направи што е можно повеќе, а по изборите се надеваме дека мотивацијата ќе биде уште поголема“, рече Перински.