Во текот на вчерашниот ден, колку што имам информација, потпишан е тој ЕФЕТ-договор со што се тргуваат енергенти насекаде впо Европа од страна на позицијата и АД ЕСМ, изјави претседателот на ВМРО-ДПМНЕ, Христијан Мицкоски, одговарајќи на новинарско прашање дали има информација дали има напредок со позициите за набавка на енергенти, што ѝ ги предложи ВМРО-ДПМНЕ на Владата.

Мицкоски нагласи дека од она што го има како информација е дека компанијата треба да има состанок в петок во АД ЕСМ, каде што ќе биде и официјално презентирана понудата и доколку е сè во ред, треба да се потпише анекс или индивидуален договор, кој е составен дел на тој ЕФЕТ-договор, и врз основа на тоа што ќе биде потпишано, како што рече тој, да почне испораката таму некаде од почетокот на ноември, па сè до периодот до кога ќе го побара Владата.

„Од информациите со кои располагам, има таков состанок в петок, во просториите на АД ЕСМ, каде што ќе биде презентирана официјалната понуда од страна на позицијата. Нормално, има законски критериуми и правила како функционира правниот систем во Македонија, сепак АД ЕСМ не е приватна сопственост на никое приватно лице, таа е на народот, државна компанија. Компанијата треба да достави понуда и претпоставувам таму има комисија што ќе евалуира таа понуда, дали е таа понуда во ред или не. Доколку е во ред, не гледам причина уште в петок да биде потпишан тој анекс или индивидуален договор, кој е составен дел на овој ЕФЕТ-договор, на овој рамковен договор, и врз основа на тоа што ќе биде потпишано, очекувам да почне испораката таму некаде од почетокот на ноември, па сè до периодот до кога ќе го побара Владата од оваа позиција. Сепак, јас тука во деталите не сум учесник и не ни сакам да сум учесник бидејќи има институции, наше беше да помогнеме како што помогнавме“, рече Мицкоски.

За набавката на мазут, потенцира дека веќе е соопштена понудата од страна на позицијата, односно на кое било пристаниште во регионот цената ќе биде берзанската минус 40 долара за тон, што според него е квалитетна понуда бидејќи на тој начин ќе се заштедат околу 10-15 милиони евра.

А од позицијата, која требаше да достави понуда за мазут бидејќи имам овластување да го кажам тоа јавно, веќе е соопштена понудата, позицијата дека на кое било  пристаниште во регионот цената ќе биде берзанската минус 40 долара за тон. Ако се пресмета да речеме од Солун или Волос да се донесе во ТЕЦ „Неготино“, приближно 20 евра за тон, или од Волос 40 евра за тон, тоа би значело дека некаде во Македонија ќе ја имаме берзанската цена, што е исклучително квалитетна понуда, што е во моментот некаде околу 70, 80, 90 евра во зависност од цената регулирана со Регулаторната комисија за енергетика на мазутот, поевтина. Или ако земеме предвид дека се бараат 150.000 тона, тоа значи заштеда помеѓу 10-15 милиони евра, изјави Мицкоски.