Економија
Мицкоски: Од профитабилна компанија, СДСМ го направи ЕСМ најголем загубар

Минатата година од централниот буџет, според податоците кои се јавни и ги има во „Отворени финансии“ (Open Finance), префрлени се речиси 200 милиони евра на АД ЕСМ. Повеќе од 200 милиони евра, тоа досега не се случило, изјави лидерот на ВМРО-ДПМНЕ, Христијан Мицкоски.
„Се сеќавам, 2015, 2016, 2017 година, тогаш ЕЛЕМ, денешно АД ЕСМ, префрлуваше пари на други јавни претпријатија за работниците од тие јавни претпријатија да добијат плати. За само 5 години го направија најголем загубар и ако ме прашате зошто тоа е така – бидејќи договараат тендери во четири очи, затоа што крадат. Крадат на увозот на јаглен и на неговиот транспорт, крадат на увозот на мазут и на неговиот транспорт, крадат на тендерите и на ископот на јаглен и јаловина. И сето тоа предизвикува, денеска ЕЛЕМ, односно ЕСМ, да се најде во ваква состојба“, вели претседателот на ВМРО-ДПМНЕ, Христијан Мицкоски, одговарајќи на новинарско прашање како ја оценува состојбата со енергетиката изминатата 2022 година.
Тој истакна дека од профитабилна компанија со 25 милиони евра во банки и 7 милиони на сметка, без долгови, Владата на СДСМ успеала да ја направи најголем загубар во Македонија додавајќи дека само за една година компанијата зела околу 200 милиони евра државна помош.
„Од таму, некаде на 7 ноември до крајот на 2022 година АД ЕСМ само за увоз на електрична енергија плати повеќе од 45 милиони евра. А целата 2022 година доби донации од централниот буџет повеќе од 200 милиони евра. Ете така работи оваа Влада на СДСМ – од профитабилна компанија, што ја оставив со 25 милиони евра депозити во банки и околу 6-7 милиони на сметка, без долгови, со исплатена плата за само 5 години, успеаја да ја направат најголем загубар во Македонија“, потенцира Мицкоски.
Тој порача дека следната влада на ВМРО-ДПМНЕ ќе ја врати компанијата на вистинската патека и ќе ги санира сите проблеми и штети што ги има направено Владата на СДСМ изминативе 6 години во делот на енергетиката.
„Но, не треба да очајуваме и да губиме надеж бидејќи по предвремените избори, доаѓа раководство што ќе знае да го санира овој проблем и ќе може, практично, АД ЕСМ да го врати на тие патеки на кои беше пред 5-6 години“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
МЗШВ: Во четвртиот квартал од 2025 година ќе биде објавен јавниот повик за претприемачите во прехранбената индустрија

Министерството за земјоделство, шумарство и водостопанство ја информира јавноста дека во четвртиот квартал од оваа година ќе биде објавен Јавниот повик 02/2025 за користење на средства од ИПАРД Програмата 2021-2027, мерка 3 – „Инвестиции во основни средства за преработка и маркетинг на земјоделски и рибни производи”.
Оваа мерка претставува исклучителна можност за македонските претприемачи во прехранбената индустрија да ги унапредат своите капацитети и да станат поконкурентни на домашниот и меѓународниот пазар.
Мерката 3 – „Инвестиции во основни средства за преработка и маркетинг на земјоделски и рибни производи”од ИПАРД Програмата овозможува финансиска поддршка за модернизација на преработувачките капацитети, инвестиции за преработка и маркетинг на земјоделски и рибни производи, како и усогласување со европските стандарди. Преку оваа мерка се поддржува зголемувањето на конкурентноста на земјоделското производство и земјоделско-прехранбениот сектор во целина.
Средствата за оваа мерка се обезбедени преку Инструментот за претпристапна помош за рурален развој на Европската Унија (ИПАРД Програмата за периодот 2021 – 2027 година).
Министерството ги повикува сите заинтересирани да започнат со навремена подготовка на потребната документација и да ги следат официјалните објави на Агенцијата за финансиска поддршка во земјоделството и руралниот развој.
Економија
Издадени првите лиценци за батериски систем за складирање на електрична енергија од обновливи извори

Регулаторната комисија за енергетика, водни услуги и услуги за управување со комунален отпад (РКЕ) ги издаде првите лиценци за батериски систем за складирање на електрична енергија од обновливи извори на компанијата ЕНЕРГО СОЛАР СИСТЕМИ.
Станува збор за два батериски системи со вкупна инсталирана моќност од 2 600 kW, што се инсталирани во склоп на две различни фотонапонски електроцентрали кои се веќе изградени и во функција.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава. Во РКЕ очекуваме голем број сопственици на ФЕЦ да поднесат барање за инсталирање на “сториџи“, но исто така очекуваме интерес да појават и компании кои би биле самостојни оператори на складишта само со батериски системи. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар. Истите можат да даваат услуги на операторот на електропреносниот систем за балансирање на истиот, како и одржување на одредени параметри на мрежата во пропишани граници. Складирањето на енергија во периоди кога има вишок и нејзино користење во периоди кога потребите од електричната енергија се зголемуваат се очекува дека ќе влијае и врз намалување на вкупните трошоци во системот.“ посочи Марко Бислимоски, претседател на РКЕ.
Условите, постапката и потребната документација за добивање на лиценца за складирање на електрична енергија се уредена во Законот за енергетика и Правилникот за лиценци, .
Економија
Владата усвои измени: Се укинува ослободувањето од ДДВ за онлајн пратки во вредност до 22 евра

Со цел зајакнување на домашната економија, поддршка на локалните компании и создавање нови работни места, Владата усвои измени и дополнувања на Законот за данок на додадена вредност, со кои се укинува ослободувањето од ДДВ за онлајн пратки во вредност до 22 евра. Законските измени веќе се во собраниска процедура, а нивното спроведување се очекува да има директни позитивни ефекти врз економијата и работењето на домашните компании.
Со оваа мерка, околу 4 милиони денари месечно, колку што во одредени периоди изнесува прометот кон странските онлајн платформи, ќе се пренасочат кон домашното стопанство. Овие средства ќе придонесат за развој на локалните компании, отворање нови работни места и исплата на повисоки плати на вработените.
Ова претставува значаен чекор во заштита и поддршка на домашната економија, особено во услови на зголемена глобализација и дигитална трговија.
Дополнително, измените ќе помогнат во намалување на сивата економија, имајќи предвид дека досегашниот систем овозможуваше злоупотреби – односно увоз на стоки ослободени од данок кои понатаму се продаваат на домашниот пазар.
Со оваа измена, државата испраќа јасен сигнал на поддршка за домашните компании кои создаваат додадена вредност и вработуваат граѓани во земјата, велат од Министерството за финансии.