Економија
„Мудис“ го урна највисокиот рејтинг, Трамп во незгодна ситуација

Агенцијата за кредитен рејтинг „Мудис“ го намали кредитниот рејтинг на Соединетите Американски Држави од највисокото ниво „Ааа“ на „Аа1“, наведувајќи ја загриженоста за експлозивниот раст на јавниот долг кој достигна 36 трилиони долари. Овој потег претставува сериозен удар за администрацијата на претседателот Доналд Трамп, која се обидува да ги намали даноците и да ја стабилизира економијата.
„Мудис“, која ѝ го додели највисокиот рејтинг на Америка уште во 1919 година, стана третата водечка агенција што го деградираше американскиот рејтинг. Агенцијата соопшти дека повеќе американски влади, вклучително и Конгресот, не успеале да донесат ефективни мерки за да ги намалат годишните фискални дефицити и зголемените каматни трошоци.
„Товарот на федералниот долг ќе се искачи на околу 134% од БДП до 2035 година, во споредба со 98% во 2024“, предупреди „Мудис“, притоа менувајќи ја перспективата за американската економија од „негативна“ во „стабилна“.
Иако претседателот Трамп по неговото враќање во Белата куќа изјави дека има намера да го балансира буџетот, напорите досега не вродија со плод. Финансискиот секретар Скот Бесент вети намалување на трошоците за финансирање, но според проценките, ниедна предложена мерка не нуди одржливо намалување на дефицитот.
Дополнителен притисок доаѓа и од создавањето на нови тела како Одделот за ефикасност на владата, предводен од Елон Маск, кој не ги исполни очекувањата. Истовремено, трговските политики на Трамп, вклучително и новите царини за клучни партнери, ги зголемија стравувањата за економско забавување и нарушување на глобалната трговија.
„Тоа во основа придонесува на доказите дека САД имаат премногу долг“, вели Дарел Дафи, професор по финансии на Стенфорд. „Конгресот едноставно ќе мора да се дисциплинира: или да собира повеќе приходи или да троши помалку.“
Рејтингот на САД беше намален и од другите големи агенции: „Фич“ тоа го направи во август 2023 година, а „Стандард и Пурс“ уште во 2011 година. Според експертите, новото намалување ќе значи повисоки трошоци за задолжување и за јавниот и за приватниот сектор.
„Ова е продолжение на долгорочниот тренд на фискална неодговорност“, предупредува Спенсер Хакимијан од Толоу Капитал. „Последиците ќе ги почувствуваат и граѓаните и бизнисите.“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.
Економија
Во Народната банка се одржа 54. сесија на Клубот на истражувачите

Во Народната банка се одржа 54. сесија на Клубот на истражувачите на која беше претставен научниот труд „Макроекономски, институционални и финансиски детерминанти на дефицитот на тековната сметка во Северна Македонија: Согледувања преку временски серии“ од авторот Бардул Даути.
Сесијата ја отвори директорката на Секторот за монетарна политика, истражување и статистика, Султанија Бојчева-Терзијан, која посочи дека презентираниот труд нуди значајни сознанија за макроекономските и институционалните фактори коишто влијаат на дефицитот на тековната сметка во Република Северна Македонија. Таа нагласи дека надворешната позиција на македонската економија има особено значење, имајќи ја предвид стратегија на фиксен девизен курс, што ја спроведуваме. Во таа насока, одржливата тековна сметка претставува клучен елемент за зачувување на севкупната макроекономска стабилност.
Главниот заклучок на емпириската анализа е дека дефицитот на тековната сметка е резултат на макроекономски фактори – производниот јаз, како индикатор на домашната побарувачка, трговската отвореност и реалниот девизен курс. Дополнително, влијание имаат и фискални и финансиски фактори, како што се јавниот долг и паричната маса (М2), соодветно. Сепак, клучниот придонес на овој труд е вклучувањето на т.н. институционални фактори и оцената на нивното влијание врз билансот на тековната сметка. Студијата покажува дека силните институции – особено поефикасното управување, зголемениот квалитет на јавните услуги и заштитата на економските права, како што е правото на сопственост – можат значително да придонесат за подобрување на тековната сметка на платниот биланс. Овие заклучоци упатуваат дека, институционалните реформи се исто така важен сегмент за зајакнување на надворешната стабилност на економијата.
По презентацијата, следеше дискусија меѓу учесниците и презентерите, поттикната од презентацијата на трудот и од изнесените заклучоци. Следната сесија е планирана за септември годинава.