Економија
Нема намалување на каматите на кредитите кај нас, НБРМ не гледа масовен тренд за намалување кај водечките централни банки

Народната банка на Македонија засега нема да го следи трендот на централните банки во светот, кои од почетокот на минатиот месец првпат од јануари 2021 година почнаа да ги намалуваат каматните стапки. Намалувањето е регистрирано во последниот извештај на Дојче банк, кој укажува дека по 18 месеци немилосрдно зголемување на каматите, сега поголем е бројот на банки што ги намалуваат каматите отколку оние што ја зголемуваат.
„Сè уште не гледаме помасовен тренд на намалување на каматните стапки од страна на централните банки, а тука, пред сè, мислиме на водечките централни банки во светот. Евидентно е привремено стабилизирање во трендот на затегнување имајќи предвид дека на последните состаноци овие централни банки не продолжија со натамошно зголемување на каматните стапки, туку ги задржаа на непроменето ниво, со оценки дека тековното ниво на каматните стапки, најверојатно, ќе треба да се задржи подолг период со цел одржливо сведување на инфлацијата на целните нивоа. Секако, одлуките на носителите на монетарната политика се водени од податоците и од тоа како тие се движат во однос на очекувањата, така што тоа ќе продолжи да биде главната детерминанта за идната насока на движење кај каматните стапки“, велат од Народната банка.
Досега направените промени во монетарната политика кај нас, според Народната банка, како што констатираат и последниот извештај на ММФ и извештајот на Европската комисија за напредокот на земјава, се соодветни на економските и на финансиските услови во домашната економија.
„Идните промени во каматната стапка ќе зависат од неколку клучни показатели. Прво, ова се однесува на динамиката на инфлацијата, која значајно забавува и исклучително е важно да се види понатамошно намалување на инфлациските притисоци на потрајна основа. Понатаму, со оглед на стратегијата на одржување стабилен девизен курс на денарот, важни се и поместувањата на девизниот пазар. На овој сегмент движењата засега се стабилни и во голема мера условени од значајно намалените притисоци врз трговскиот дефицит, солидните дознаки и приливите од странски директни инвестиции. Промените во поставеноста на Европската централна банка, со оглед на нашата врзаност за курсот на еврото, исто така влијаат на носењето на нашите монетарни одлуки“, изјавија од Народната банка.
Џим Рид, стратегот за истражување на Дојче банк, констатирал дека има тренд на намалување на каматите анализирајќи 81 централна банка во светот. Сепак, во извештајот тој остава можност каматите повторно да почнат да се качуваат поради тоа што големите централни банки, како Европската централна банка и Федералните резерви на САД, не ги намалуваат, туку само ги одржуваат стабилни каматните стапки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.
Економија
Во Народната банка се одржа 54. сесија на Клубот на истражувачите

Во Народната банка се одржа 54. сесија на Клубот на истражувачите на која беше претставен научниот труд „Макроекономски, институционални и финансиски детерминанти на дефицитот на тековната сметка во Северна Македонија: Согледувања преку временски серии“ од авторот Бардул Даути.
Сесијата ја отвори директорката на Секторот за монетарна политика, истражување и статистика, Султанија Бојчева-Терзијан, која посочи дека презентираниот труд нуди значајни сознанија за макроекономските и институционалните фактори коишто влијаат на дефицитот на тековната сметка во Република Северна Македонија. Таа нагласи дека надворешната позиција на македонската економија има особено значење, имајќи ја предвид стратегија на фиксен девизен курс, што ја спроведуваме. Во таа насока, одржливата тековна сметка претставува клучен елемент за зачувување на севкупната макроекономска стабилност.
Главниот заклучок на емпириската анализа е дека дефицитот на тековната сметка е резултат на макроекономски фактори – производниот јаз, како индикатор на домашната побарувачка, трговската отвореност и реалниот девизен курс. Дополнително, влијание имаат и фискални и финансиски фактори, како што се јавниот долг и паричната маса (М2), соодветно. Сепак, клучниот придонес на овој труд е вклучувањето на т.н. институционални фактори и оцената на нивното влијание врз билансот на тековната сметка. Студијата покажува дека силните институции – особено поефикасното управување, зголемениот квалитет на јавните услуги и заштитата на економските права, како што е правото на сопственост – можат значително да придонесат за подобрување на тековната сметка на платниот биланс. Овие заклучоци упатуваат дека, институционалните реформи се исто така важен сегмент за зајакнување на надворешната стабилност на економијата.
По презентацијата, следеше дискусија меѓу учесниците и презентерите, поттикната од презентацијата на трудот и од изнесените заклучоци. Следната сесија е планирана за септември годинава.
Економија
Ранливите потрошувачи и натаму незаштитени: итни мерки барат Инжинерите на Македонија

Додека Владата и Министерството за енергетика се фалат со новиот Закон за енергетика, илјадници граѓани остануваат без никаква реална заштита од енергетската сиромаштија, реагираат од Инжинери на Македонија.
Соопштија дека имаат поднесено претставка до Владата, Министерството за енергетика, Министерството за труд и Регулаторната комисија, со барање да се преземат итни мерки за ранливите потрошувачи пред да пристигне зимата.
„Иако новиот Закон за енергетика предвидува заштита за граѓаните кои живеат во сиромаштија, самохрани родители, пензионери со ниски примања и лица со инвалидитет, досега нема функционален регистар, нема методологија, ниту се врши исплата на ветените субвенции. На повикот за субвенции се пријавиле само 745 лица, од кои 454 биле прифатени“.
Оваа бројка, како што оценуваат, е далеку од реалните потреби, бидејќи според проценките, ранливите потрошувачи се најмалку 110.000.
„Претставката која ја поднесовме бара итно донесување на методологија до крајот на август, формирање на регистар до октомври, исплата на веќе одобрените субвенции и објава на реална проценка на ранливите граѓани“.