Економија
Нема повеќе гарантирани цени во маркетите, секое нелогично зголемување ќе биде санкционирано

Од денеска нема повеќе гарантирани цени на производите во маркетите. Како што порача претходно вицепремиерот за економски прашања, Фатмир Битиќи, секое нелогично зголемување на производите, кое ќе биде надвор од пазарната логика, ќе биде санкционирано.
„Доколку не се донесе законот за нефер трговски практики, соодветно ќе реагираме. Секое нелогично зголемување на цените, кое ќе биде надвор од пазарната логика, ќе биде санкционирано, а што тоа ќе значи – знаеме од минатото“, рече Битиќи.
Тој оценува дека, конечно, лекцијата кај трговците е научена.
„Ние сметаме дека, конечно, лекцијата е добиена, дека во државата, освен правење бизнис и креирање профит, мора да има морал и етика кај компаниите. Сметам дека замрзнувањето на цената не е една од мерките што соодветствува со пазарната економија, оценувам дека треба да се вратиме во нормалните текови на живеење, а на бизнисмените им останува соодветно да се однесуваат. Тоа нема да значи дека, еве, ако во Собранието нема разум за носењето на законот за нефер трговски практики, ние нема да реагираме“, рече Битиќи.
Директорот на Државниот пазарен инспекторат, Горан Трајковски, вчера порача дека излегуваат на терен и дека ќе извршуваат надзори во сите големи маркети во државата.
Тој апелира до трговците на мало, но и до трговците на големо, да бидат општествено одговорни и да ги приспособат цените во согласност со стандардот на граѓаните.
„Пазарниот инспекторат при надзорите ќе опфати поширок обем на закони за постапување, како што се Законот за заштита на потрошувачите, Законот за трговијата, Законот за забрана и спречување вршење нерегистрирана дејност, Законот за инспекциските надзор, Законот за Државниот пазарен инспекторат итн.
Повеќепати напоменав, а ќе повторам и сега, никој не е над законот, а оној што ќе применува нечесни трговски практики и ќе ги прекрши законите, ќе биде санкциониран, а во зависност од сторениот прекршок, заклучно со денес, постои можност и за затворање објекти за вршење дејност на определен временски период“, изјави директорот на ДПИ, Горан Трајковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.