Економија
Нема потреба од паника, парно ќе има до крајот на грејната сезона, уверуваат Ковачевски и Бектеши

Утринава беа пуштени топланите на температура од 9 степени Целзиусови. Истите работеа до 09:15 часот кога се постигна надворешна температура од 12 степени и при тоа во овој период беа испорачани 997 мегават часови топлинска енергија, изјави директорот на АД ЕСМ, Васко Ковачевски на прес-конференцијата по посетата на Топлана Исток каде со министерот за економија Крешник Бектеши го одбележаа почетокот на грејната сезона.
„Денес е 15 октомври и официјално согласно закон, почеток на грејната сезона. Во градот Скопје денеска има парно. Но, грејната сезона не е само парно греење. Истовремено грејната сезона значи намалување на температурите и зголемена потрошувачка на електрична енергија. Што се однесува до топлинската енергија, АД ЕСМ пред само помалку од еден месец го доби задолжението од Владата да ја преземе одговорноста да го менаџира топлинското греење во градот Скопје и во овој краток период успеавме да ги формираме трите компании, да преземеме поголем дел од вработените во БЕГ, да ги ангажираме сите вработени во нашата компанија и успешно да направиме старт на денешната грејна сезона“, појасни Ковачевски.
Додаде дека граѓаните треба да бидат безбедни бидејќи има обезбедено енергенс за до крајот на месецот, а следствено на тоа како понатаму ќе функционира приватаната гасна централа ТЕ-ТО ќе се знае дали ќе се повлекува топлинска енергија од ТЕ-ТО или и понатаму целосно ќе се произведува од топланите кои ги имаат под закуп од АД „Адора“, во топланите Исток и Запад.
Министерот за економија, Крешник Бектеши уверува дека цела зимска сезона потрошувачите ќе бидат снабдувани со електрична енергија од домашни капацитети.
„Ние не зависиме од другите држави, ние сами се подготвуваме за се да покриваме од домашни капацитети за да нема зголемување и на цените, а дополнително на тоа да не зависиме од тоа што би се случило во регионот, во Европа или, пак, глобално. Затоа сите капацитети веќе се ставаат во функција, а денешниот ден секако дека е потврда на тоа дека последните неколку месеци ЕСМ, секако со поддршка на Владата, ги направиле сите подготовки и денеска имаме парно во Градот Скопје, електрична енергија имаме во континуитет за сите наши граѓани и тоа ќе биде до крајот на грејната сезона“, потенцира министерот за економија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.