Економија
„Ние сме луѓе, а не бројки на хартија“, вработени од „Фени“ протестираат пред судот во Велес

Вработени во „Фени“ со транспаренти протестираат пред судот во Велес каде што повторно се разгледува планот за реорганизација на комбинатот. Преку пораки „Крај за стечајот“, „Не ми го чепкај лебот“ и „Живот за Фени“ , тие бараат на денешното рочиште да се донесе конечна одлука и да заврши на стечајната постапка.
„Стечајот многу се одолговлече. Тука бевме и во мај и во јули и еве во ноември. Маката нè тера. Тука сме да дадеме поддршка уште еднаш, да се стави крај на нашата агонија. Сè е кристално јасно. Ние работиме, земаме плати редовно, произведуваме, исплатени се доверителите, не ни е јасно зошто некој си поигрува со нашите судбини. Бараме од судот и сите надлежни институции ова да биде последно наше доаѓање, тука да биде крајот на стечајот. Ние сме луѓе, а не бројки на хартија и никој не смее да си поигрува со нас и нашите семејства, тука сме и секогаш ќе бидеме спремни да се избориме за ‘Фени’ и за нашата иднина“, рече Миле Ѓорѓиев, претседател на синдикалната организација на „Фени“.

Бараме од судот и сите надлежни институции ова да биде последно наше доаѓање, тука да биде крајот на стечајот. – Вработени во „Фени“ пред судот во Велес
Денеска судот во Велес повторно одлучува за планот за реорганизација на „Фени“, откако Апелацискиот суд одлучувајќи по жалба од дел од доверителите го врати на повторно разгледување. Од „Фени“ објаснија дека планот е вратен на повторно одлучување поради административни забелешки, за кои веднаш по одлуката на Апелација тие доставиле известувања и ревидиран план.
Откако со комбинатот под закуп стопанисува швајцарски ГСОЛ преку македонското претставништво „Еуроникел“, вработени во „Фени“ ги следат сите судења. Во мај годинава кога собранието на доверители го изгласа планот за реорганизација на „Фени“ предложен од ГСОЛ, вработените кои стоеја пред судот прогласија победа и почнаа да слават оти изгласаниот план за нив значи крај на стечајната постапка. Но одлуката ја обжалија дел од доверителите, што ја издолжи постапката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.