Министерот за земјоделство, шумарство и водостопанство, Љупчо Николовски, од денеска почнува теренска кампања за промоција на сите мерки и јавни повици што изминатиот период ги донесе Министерството.

Теренската кампања почна денеска од Свети Николе, каде што министерот Николовски оствари неколку средби со земјоделците и директно ги информира за мерките што се во тек и ги повика максимално да ги искористат и да аплицираат на сите објавени повици.

„Ги слушаме земјоделците и земјоделските стопанства и заедно со нив подготвивме пакет-мерки. Земјоделците денес добиват рекорна поддршка, обезбедивме 400 милиони денари финансиска поддршка, со која го стабилизираме и помагаме домашното производство. Сега редот е на земјоделците максимално да ги искористат мерките и да аплицираат за оваа поддршка. Токму затоа од тука, од Свети Николе, најавувам дека почнуваме теренска кампања преку која сакаме уште еднаш да им ги презентираме мерките директно на земјоделците, да ги повикаме максимално да ги искористат, но и да чуеме од нив нови предлози за заедно полесно да ги надминеме проблемите што оваа светска криза ни ги носи“, изјави Николовски.

Во рамките на посетата на Св. Николе министерот Николовски најпрвин ја посети земјоделката Цвета Нацева во селото Ерџелија, која е корисник на мерката „Рурална жена“ и добитник на грант од 3.000 евра за претходниот повик. Цвета Нацева ги повика сите жени земјоделки да ги искористат мерките што ги нуди државата и да аплицираат на новиот јавен повик за мерката „Рурална жена“, кој е во тек. Министерот Николовски ја информира г-ѓа Цвета дека двојно е зголемена поддршката за оваа мерка од 3.000 на 6.000 евра за корисник.

Овој повик е наменет за жени носители на земјоделски стопанства, кои преку оваа мерка може да извршат инвестиции во набавка на опрема за преработка или доработка на примарни земјоделски производи и набавка на услуги за спроведување на деловниот план на инвестицијата.

Министерот го посети и младиот земјоделец Александар Младенов, добитник на грант од 10.000 евра за мерката „Млад земјоделец“.

„Упатувам апел до сите млади земјоделци што сакаат да ја работат оваа работа дека на многу лесен начин може да се дојде до овие грантови, само ако се сака. Се надевам дека и понатаму ќе се создаваат услови за подобар начин на работа“, рече земјоделецот Александар и информира дека со грантот набавил трактор, елеватор за жито и мелница со мешалка до 300 кг.

Заедно со земјоделците МЗШВ подготви Национален план за производство на храна, чија главна цел е поддршка и зголемување на домашното производство на стратешки култури, а со тоа и намалување на увозната зависност. За таа цел, обезбедени се нови дополнителни 5.722 хектара обработливо земјоделско земјиште, што го ставаме на располагање за обработка на стратешки култури. Свети Николе е една од општините во која се предвидени нови над 700 хектари земја за обработка на стратешки култури. Јавниот оглас е веќе распишан, а рокот за аплицирање е до 10 мај.

Министерот Николовски попладнето оствари средба на отворено со земјоделците од овој крај и ги повика да ја искористат оваа можност и да учествуваат на јавниот оглас. Министерот на средбата директно ги информира земјоделците и за мерките од интервентниот фонд и дека веќе течат пет јавни повици за набавка на траткори, силоси, изградба на мандри, набавка на опрема за производство на тутун и за мерката „Рурална жена“. Рокот за аплицирање за овие јавни повици е до 20 мај.

Преку јавниот повик за набавка на трактори акцентот е ставен на полјоделското производство. Овој јавен повик може да го искористат сите земјоделски стопанства запишани во ЕРЗС, кои не ја користеле поддршката во последните пет години. Поддршката е во форма на кофинансирање во висина до 75 % од вкупната вредност на набавениот трактор. Максималниот износ на поддршката за набавка на трактори е до 3.500.000 денари за корисник.

„Работиме неуморно и сме во постојана консултација земјоделците грижејќи се за секој од вас. Максимално искористете ги мерките што ги нудиме за зголемување на домашното производство. Да си помогнеме сами, а со тоа да му помогнеме на секој граѓанин во нашата земја. Во услови на криза се грижиме за секој килограм домашно производство со цел да не бидеме дополнително зависни од увоз на земјоделски производи од странство. Токму затоа ќе инсистираме секој килограм домашно производство на стратешка култура да заврши првин во домашните капацитети за преработка. Така е чесно, така е одговорно кон сите граѓани“, рече Николовски на денешната средба со земјоделците од Свети Николе.