Измените на Законот за земјоделско земјиште претставуваат сериозна реформа на целокупниот сектор и начин за отстранување на сите проблеми во доделувањето на државно земјоделско земјиште под закуп, посочи на денешната прес-конференција министерот за земјоделство, шумарство и водостопанство, Љупчо Николовски.

Притоа, Николовски потенцираше дека измените се направени врз основа на детални анализи на тимот од секторот за земјишна политика на МЗШВ и консултации со земјоделските здруженија.Вистинската распределба на државното земјоделското земјиште согласно предвидени законски измени ќе значи зголемени обработливи површини и зголемено производство на квалитетни, конкурентни и безбедни земјоделски производи.

„Со измените на Законот за земјоделско земјиште овозможуваме правилна и транспарентна распределба на државното земјоделско земјиште под закуп и ставање во функција на целокупното земјоделско земјиште во државата. Една од клучните измени коишто ја правиме е во делот за младите земјоделци. Со цел нивна поголема вклученост во земјоделството и можност да почнат сопствен агробизнис, младите лица до 40 години ќе бидат ослободени од плаќање  закупнина три години од склучување и стапување на сила на договорот. Решаваме еден долгогодишен проблем на одгледувачите на пчели, а тоа е недостигот на површини за поставување пчелни семејства. Со новите измени се проширува намената на земјоделско земјиште кое може да се додели во закуп со можност и за поставување  пчелни семејства“, изјави Николовски.

Дел од измените предвидуваат низа можности кои не биле регулирани со постоечкиот закон, а кои, како што се посочува, се од исклучително значење за земјоделците кои конкурираат на јавните огласи и повици, како и за ефикасна и поголема искористеност на расположливите обработливи површини.

„Ја отстрануваме пречката која досега ја имавме за огласите над 3 хекатри, каде што имаше наддавања и до 100 милијарди евра, односно огромни суми, а на крајот за атрактивни локации не се склучуваа договори. Сега, со измените ставаме ограничување да не може никој да си дозволува да врши електронско наддавање до огромни нереални суми, а при тоа да нема никаква обврска.Конкретно, ги обврзуваме тие што ќе понудат каква било сума а не склучат договори, да не стои земјиштето необработено, државата ќе има право на надомест на штета во износ од една годишна закупнина којашто тие ја понудиле. На овој начин ќе ги отстраниме несериозните апликанти, заради кои  лицата кои навистина сакаат да инвестираат не можат да добијат можност.Внесуваме уште една можност, односно при електронското наддавање за земјоделско земјиште над 3 хектари, доколку прворангираниот не го склучи договорот, тоа може да го стори второрангираниот. Со оваа измена ја забрзуваме целата процедура, да не ги повторуваме постапките, оти се соочивме за две години да не можат да се реализираат одредени јавни огласи само заради пречки кои постојано стоеја од ваков вид во законот“, изјави Николовски.

Со измените се овозможува на земјоделско земјиште да се градат објекти за промоција на земјоделски производи, односно угостителски објекти и изградба на објекти за спортско-рекреативни активности. Од МЗШВ велат дека тоа ќе придонесе за зголемување на инвестициите во ваков тип објекти од страна на земјоделските стопанства, ќе се зголеми искористеноста на ИПАРД-програмата и ќе се придонесе за развој на рурални средини преку рурален туризам.

Николовски појасни дека оваа измена е во корелација со измените на Законот за вино во којшто се олеснуваат критериумите за физичките лица кои произведуваат вино и за отворање и работа на малите и средни винарници.

Досегашниот закон не дозволуваше доделување земјоделско земјиште на земјоделци кои веќе имаат склучено договор за закуп, иако тој договор може да е само за 1, 2 или 3 хектари. Со сегашните измени им се овозможува на овие земјоделски стопанства да аплицираат на огласи за закуп  до обезбедување површини од 10 хектари. На тој начин се создваат услови за окрупнување на површините и за зголемување на производството.

Николовски посочи дека во комуникација со земјоделците преку измените на законот ќе се решаваат и одредени договори коишто беа раскинати во претходниот период, ќе се регулира пребивањето со Платежната агенција, ќе се решаваат затекнати состојби во одредени региони, а измените се предвидени и во делот на банкарските гаранции, раскинувањата и склучувањето на договорите и друго.