Нема незаконски постапки во водењето на стечајната постапка за „Фени“, тврди стечајниот управник Мирослав Анастасиевски против кого вчера „Транспаренси интернешнл – Македонија“ поднесе кривична пријава за злоупотреба на службената должност. „Транспаренси“ почнала да го следи стечајот за „Фени“ кога добила претставки од засегнати страни и утврдила дека постапката е нетранспарентна и со низа незаконитости поради што вчера поднесе кривична пријава и против стечајната судијка Валентина Ѓоргиевска од велешкиот суд.

„Сите досегашни постапувања се во согласност со Законот за стечајот и врз основа на одлуките донесени од страна на Одборот на доверители и Собранието на доверители.

За неоснованите и тенденциозни обвинувања од страна на ‘Трансперенси интернешнл – Македонија’ официјално не сум запознаен и по однос на нив ќе дадам целосни и исцрпни објаснувања, поткрепени со докази и аргументи, пред надлежните државни органи доколку тоа биде побарано од мене“, изјави за „Макфакс“ стечајниот управител Мирослав Анастасиевски.

Од „Транспаренси“ кривичните пријави ги темелат на незаконски склучен договор со швајацарски ГСОЛ за преработка на руда врз основа на кој фабриката беше рестартирана на крајот на февруари годинава. Антикорупционерите тврдат дека не е утврден идентитетот на втората договорна страна и бараат да биде прогласен за ништовен. Во исто време банките и стечајниот управник беа задолжени да направат планови за реструктурирање на фабриката за кои „Транспаренси“ утврди дека роковите се истечени, а плановите не се презентирани. Стечајниот управник Анастасиевски вели дека веќе имаат закажано седница за претставување на плановите.

„Стечајната постапка на ‘Фени индустри’ е во фаза на разгледување на планот за реорганизација од страна на членовите на Одбор на доверители, кои на закажаната седница на 10.5.2018 година треба да дадат мислење на Собранието на доверители, кое гласа по планот за реорганизација“, вели стечајниот управник Анастасиевски.

Став дека постапката е законска има и стечајната судијка Валентина Ѓоргиевска за која „Транспаренси“ утврдила дека ја злоупотребила службената должност и дозволила швајцарската фирма заинтересирана за „Фени“ да добие неоправдана предност.

„Јас како стечаен судија во Основниот суд Велес, во согласност со моите законски овластувања, одговорно и совесно постапувам во стечајната постапка отворена над имотот на стечајниот должник Друштво за ископ на руди, производство на метали, трговија и услуги „Фени индустри“ АД од с. Возарци, Кавадарци, во стечај пред Основниот суд Велес. Органите на стечајната постапка во текот на отворената стечајна постапка над стечајниот должник постапуваат во согласност со надлежностите и овластувањата утврдени во законот за стечај. Стечајната постапка над имотот на стечајниот должник е во фаза на постапка за реорганизација на стечајниот должник во согласност со одредбите од Законот за стечајот“, вели стечајната судијка Ѓоргиевска за „Макфакс“.

На обвинувањата за оркестирање на стечајот за „Фени“ денес одговори и вицепремиерот за економски прашања, Кочо Анѓушев, кој ги охрабри антикорупционерите да направат подлабока истрага, која ќе ги доведе и до причините што ја довеле фабриката до стечај.