Економија
Побрз проток на патници на Табановце и нови зелени коридори како дел од Отворен Балкан
Согласно Договорот за примена на заеднички гранични премини – One Stop Shop контроли во делот на проток на стоки и патници со Република Србија на Табановце – Прешево кој беше воспоставен во септември 2019 година, комплетно се завршени дополнителните инфраструктурни активности и реконструкции, и тоа: поставени се нови кабини за работа на граничните полиции и царинските службеници од двете земји, нови рампи и извршено е реновирање на помошни простории за користење од страна на колегите од Србија. Дополнително поставена е и потребната мрежна и телекомуникациска инфраструктура за непречено одвивање на процесот, информираат владините служби.
Со реконструкцијата и новопоставените кабини и рампи, појаснуваат од таму, покрај подобрување на условите за работа, се постигнува и дополнително забрзување, пред сè при пасошката проверка, бидејќи новата поставеност на кабините е таква (и за патнички и за товарни возила), да овозможува истовремено работење (без празен ‘од) на граничните полициски службеници од двете држави, што дополнително ќе влијае на забрзување на протокот на патнички и товарни возила, кое е особено важно во летниот период во тек на туристичката сезона.
Дополнително, додаваат дека за сите увозници, извозници, транспортери и други учесници во царинската постапка од трите земји во иницијативата Отворен Балкан, како и за економските оператори иматели на ОЕО одобренија и стоки од Зелените коридори, на граничните премини Табановце и Ќафасан во март 2022, поставени се табли за зелени (приоритетни) ленти. По истиот принцип, вакви табли се поставени и на Прешево и Ќафтане, од страна на Србија и Албанија.
„Во моментот на ГП Табановце функционираат 5 ленти за патнички, 2 за товарни возила и една за автобуси. Со цел понатамошно подобрување на условите за побрз проток на патници на ГП Табановце каде се врши гранична и царинска проверка на излез од Србија и влез во Северна Македонија, Царинската управа работи на прилагодување на уште две ленти за влез на патнички моторни возила, со што дополнително ќе се забрза протокот, посебно важно во летниот период и зголемената фреквенција на патници-туристи кои поминуваат преку овој граничен премин.
Исто така, со цел забрзување и намалување на времето за чекање на граница, Царинската управа ги разгледува можностите за граничниот премин Пелинце, кој се користи само за патнички промет, односно поминување на патнички моторни возила, да се актуелизира како алтернативен премин за патниците првенствено од Северна Македонија и Србија. Toa би било во согласност со иницијативата Отворен Балкан и со предложениот начин за примена на концептот one stop shop, со цел побрз проток на патници и патнички моторни возила.
„Зелените коридори“ за проток на осетлива стока успешно и непречено функционираат во регионот со земјите на ЦЕФТА. Во Република Северна Македонија тие се применуваат на граничните премини: Табановце, Блаце и Ќафасан, при што важат за усогласена ЦЕФТА-приоритетната листа каде се предвидени стоките што ќе имаат првенство на минување. Листата е јавно достапна (на веб-страницата на Царинска управа) и содржи прехранбени производи – месо, зеленчук, потоа медицинска опрема, лекови – точно определени по тарифни броеви. За овие стоки Царинските управи обезбедуваат приоритетен третман при премин на границата и при царинење, a списокот на овие стоки може да се менува и усогласува со сите ЦЕФТА земји. Исто така, информациите за овие видови стоки пред пристигнување се праќаат и се добиваат преку електронскиот систем на ЦЕФТА – СЕЕД. Идентификацијата се врши врз основа на тарифните ознаки, внесени во извозните и транзитните декларации“, се дополнува во владиното соопштение.
Имајќи ги предвид позитивните искуства од примена на Зелените коридори во рамките на ЦЕФТА, во тек се активности за нивно проширување кон соседните земји членки на ЕУ. Во таа насока, на 7.7.2022 година, во рамките на Форумот за конективност во Солун, директорката на Царинската управа на Република Северна Македонија и гувернерот на Независната управа за јавни приходи на Република Грција, потпишаа Меморандум за разбирање за електронска размена на податоци, со кој се овозможува примена на Зелените коридори за стоки кои излегуваат кон Република Грција, како и електронска размена на сет на податоци, пред пристигнување, преку системот ЦЕФТА – SEED системот. Во следните 6 месеци предвидено е можно проширување на опфатот на Меморандумот, со цел размена на податоци за стоки на влез во Република Северна Македонија од страна на Грција. Со тоа, граничниот премин Богородица – Евзони со Република Грција е првиот пример на воспоставен Зелен коридор со земја членка на ЕУ.
На Форумот учествуваа високи претставници од 11 земји од регионот (Западен Балкан и ЕУ), од Министерствата за надворешни работи и транспорт и врски, директорите на царините, како и претставници од Европската комисија, ЦЕФТА и Транспортната заедница. Во рамки на Форумот беа одржани и билатерални средби со соседните земји – членки на ЕУ, вклучително и средба на нашите претставници со претставниците од Република Бугарија, на која беше искажан позитивен став за проширување на оваа иницијатива и на граничните премини со Република Бугарија, информираат од Владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Зеколи Шаќири: Патниот транспорт е важна алка во синџирот на економијата за целата држава, за следната година го зголемивме бројот на ЕКМТ дозволи
Заменик министерката за транспорт, Калтрина Зеколи Шаќири денеска присуствуваше на традиционалната средба со превозници организирана од страна на асоцијацијата МАКАМ – ТРАНС.
Заменик министерката во својот говор пред траспортерите го истакнa огромното значење на патниот транспорт во развојот на економијата на државата. Таа, исто така додаде дека Министерството за транспорт оваа година воведе нов систем за распределба на ЦЕМТ дозволите.
„За нас како Влада и како Министерство, развојот на оваа дејност, развојот на вашите компании и зачувување на работните места се многу важни во одржување на стабилноста во економијата и затоа преземаме иницијативи и активности да обезбедиме непречен и континуиран транспорт.
Веќе знаете дека министерството разви нов систем за распределба кој е поефикасен, надрграден од претходниот и систем кој е интероперабилен и за прв пат е поврзан со Агенцијата за вработување и Централниот регистар.
Би ја искористила приликата да информирам и за бројот на транспортните дозволи за следната година за кои знам дека интересот е најголем.
За наредната 2025 година имаме зголемување на бројот на дозволи така што на располагање имаме 1.750 годишни ЦЕМТ дозволи што е за 70 дозволи повеќе отколку оваа година. Во однос на месечните, за 2025 година на располагање имаме 2.736 месечни ЦЕМТ дозволи и тоа за ЕВРО 5 имаме 720 дозволи, а за ЕВРО 6 имаме 2016 дозволи“, истакна заменик министерката Зеколи Шаќири.
Таа пред транспортерите најави дека министертвото и во наредниот период ќе продолжи со преговори со неколку држави околу зголемувањето на квотите на дозволите.
Економија
25 години успешно деловно работење: „Рехау“ отвори нов изложбен салон во Македонија
РЕХАУ Македонија прослави 25 години успешно деловно работење со отворањето на новиот деловен објект со интегриран изложбен простор, прв од ваков вид за компанијата во земјава. Салонот кој се наоѓа во населбата Илинден, во близина на Скопје, е уреден во модернистички стил кој овозможува лесно претставување на асортиманот на РЕХАУ, како и на визуелно запознавање со решенија за прозорци и врати, решенија за површинско греење и ладење и водоводни инсталации во објекти, решенија мебелската индустрија. Креирајќи услови производите на РЕХАУ да се подостапни за потенцијалните клиенти и партнери, заинтересираните посетители на салонот ќе имаат можност да го разгледаат секое решение, детално да се запознаат со него и со придобивките од неговото користење.
Изложбениот салон и деловниот објект се круната на четвртина век успешно работење на РЕХАУ во Македонија, но и своевидно одбележување на 75 годишнината од основањето на германската компанија РЕХАУ, која брендот ја прославува годинава. Со над 22.000 вработени на 170 локации во 54 земји низ целиот свет, Групацијата РЕХАУ е еден од глобалните премиум брендови за решенија кои се засноваат на полимери во градежниот, автомобилскиот и
индустрискиот сектор ширум светот.
Новото поглавје за компанијата на македонскиот пазар, кое почнува со новата локација на компанијата го демонстрира и растот и развојот на РЕХАУ Македонија, која е една од водечките премиум брендови за полимерни решенија во домашниот градежен сектор. Улога која би била невозможна без партнерите и клиентите на РЕХАУ Македонија, објаснува Сашко Даев, директор на РЕХАУ Македонија, Косово и Албанија.
„Oваа 2024 година за нас е значајна пресвртница, затоа што после две и пол децении на македонскиот пазар влегуваме во нова фаза од нашата приказна, на нова локација и со нов деловен простор. Преку нашите претставништва во Тирана и Приштина, за кои во Групацијата е надлежна Рехау Македонија, нашите производи се достапни во трите земји приближувајќи го врвниот премиум квалитет на РЕХАУ до крајниот корисник. Во нашиот фокус е раст на
портфолиото на производи кои ги нудиме на трите пазари и преку нашите партнерски мрежи и клиенти да ги позиционираме производите на овие пазари. Денес поставуваме основа за иден раст и развој, која ќе биде од полза на сите нашите партнери и клиенти, кои имаат значајно место во досегашниот раст. Нашиот бренд е изграден врз иновации, поместувајќи ги границите на технолошки напредок и фокусирајќи се на одржливоста за идните генерации. Ова се вредности кои ги делиме со партнерите, клиентите, но и крајните корисници на нашите производи.
Сите заедно оставивме незаменлив отпечаток врз она што денес РЕХАУ го претставува на македонскиот, албанскиот и косовскиот пазар, водени од принципите на одржливо работење. Овие вредности се пренесуваат на сите пазари и преку иновативните производи како што е новата генерација прозорски профили ARTEVO и како и најновата фузија на REHAU со MEPA. Со нив правиме и еволуциски исчекор кој ја трансформира индустријата за подобро утре“, вели Сашко Даев, директор на РЕХАУ Македонија, Косово и Албанија.
Целта на РЕХАУ е да се олесни и подобри животот на крајниот корисник. Овие вредности се пренесуваат и во Македонија. Компанијата РЕХАУ е присутна на македонскиот пазар од 1999 година со полимерни решенија за градежништвото, и решенија за индустријата за мебел.
Останува да биде лидер во сегментот на премиум производи за полимерни решенија нудејќи различни решенија за подобро живеење.
Тим од експерти, со своето големо знаење и посветеност, поучени од искуството, но почитувајќи ја традицијата, ги исполнуваат барањата на секој поединец на пазарот, а резултатите што ги постигнува компанијата се во исто време вредности со кои РЕХАУ Македонија живее: иновации, сигурност и доверба. Тие ја обликуваат работата, културата и однесувањето внатре во компанијата, но се пренесуваат кон клиентите преку партнерската мрежа. Нашата цел е: Инжинерски напредок. Подобрување на живеењето (Engineering progress. Enhancing lives)
Прозорски систем REHAU ARTEVO
ARTEVO комбинира бројни предности во револуционерно решение за експерти од индустријата. Станува збор за нова генерација на веќе добро познатиот прозорски систем GENEO, со армирани стаклени влакна, кој е во исто време визионерски, единствен на пазарот, продуктивен и одржлив. Со оптимизираната употреба на материјалот со високи перформанси RAU-FIPRO X, ARTEVO ги редефинира границите во однос на големината. Интеграцијата на композитниот материјал со влакна во целиот дел од профилот обезбедува рамномерен и сигурен пренос на товарот. Засилените јачински зони во надворешните ѕидови му обезбедуваат дополнителна стабилност, торзиона ригидност и климатска стабилност.
Предѕидни системи MEPA nextVIT
Новата генерација на предѕидна инсталација MEPA NextVIT нуди оптимизирана и лесна инсталација. NextVIT е добро осмислен комплетен систем. Со новите функции EasyConnect за брзо склопување без алатки и голема флексибилност при употреба, MEPA nextVIT го обезбедува она што ви треба: едноставна, лесна и непречена инсталација. Има предѕидни елементи за секоја област на примена и сите варијанти на инсталација, сигурно казанче, широк спектар на типки за испирање и новодизајниран систем на шини за побрза работа.
Тука е и револуционерната технологија nexVIT Air WC која работи со извлекување наместо со рециркулирање на воздухот за да ја извлече миризбата – без одржување и дополнителни трошоци.
ПР
Економија
Министрите за економија на Западен Балкан се собраа во рамките на Берлинскиот процес: фокус на регионалната економска интеграција
Министрите за економија се собраа во Берлин за да одбележат десет години од Берлинскиот процес и да ја постават идната агенда. Даниела Гацевиќ, вршител на должноста директор на Секретаријатот на ЦЕФТА, присуствуваше на конференцијата организирана од сојузниот министер за економски прашања и климатска акција, Роберт Хабек.
Конференцијата, која ги собра министрите, бизнис-лидерите и меѓународните експерти, се фокусира на оценување на напредокот кон создавање заеднички регионален пазар (ЗРП). Економските можности на регионот во неговото приближување кон интеграција во ЕУ беа во центарот на дискусиите заедно со десет важни ЦЕФТА-договори за олеснување на трговијата, кои се во процес на усвојување.
Гацевиќ го истакна значењето на овие одлуки за постигнување целосна слобода на движење стоки и услуги: „Усвојувањето на овие договори ќе биде важен чекор кон создавање заеднички регионален пазар во согласност со ЕУ. Секој од нив е пакет-придобивки за бизнисите и потрошувачите, кој не само што ќе нè приближи едни кон други туку и кон ЕУ. Затоа е од клучно значење што побргу да ги усвоиме“.
Договорите под ЦЕФТА го усвојуваат заедничкиот комитет во форма на одлуки, дополнителни протоколи или препораки. Во моментот десет вакви договори се чека да бидат усвоени во разни области: електронска трговија, услуги за испорака на пакети, спречување неоправдано геоблокирање, професионални квалификации, интелектуална сопственост, управување со ризици, услуги на патнички агенции, автомобилско осигурување, признавање авторизирани економски оператори и решавање трговски спорови.
Резултатите од конференцијата го потенцираат сè поголемото значење на Западен Балкан на европската економска сцена. Напредокот кон ЗРП отвора врата кон единствениот пазар на ЕУ користејќи ги можностите обезбедени од планот за раст на ЕУ.
Пред конференцијата, форумот за бизнис ги собра германските и западнобалканските компании за B2B-настан насочен кон поттикнување заеднички синџири на снабдување и промовирање инвестициски можности во регионот.