Економија
Портпаролите на Влада: Продолжува агендата за стабилно снабдување со енергенси
Портпаролите на Владата, Муамет Хоџа и Душко Арсовски, на денешната прес-конференција информираа за донесените одлуки и заклучоци од 82. седница на Владата.
Владата на вчерашната седница ги усвои заклучоците, мерките и препораките на Управувачкиот комитет за координација и управување во системот за управување со кризи. Согласно тоа, беше прифатен предлогот за продолжување на кризната состојба во снабдувањето со топлинска енергија на подрачјето на Град Скопје, поради недостиг на топлинска енергија, можност за користење на алтернативно гориво и состојбите на пазарот на топлинска енергија, до 30.4.2023 година. Воедно, беше прифатен и предлогот за продолжување на кризната состојба во снабдувањето со електрична енергија на целата територија на Република Северна Македонија, до 30.4.2023 година, беше соопштено на прес-конференцијата.
Предлог-одлуките за одобрување на продолжување на рокот за постоење кризна состојба на целата територија на Република Северна Македонија, како што беше соопштено, ќе бидат доставени на разгледување и одлучување до Собранието.
На прес-конференцијата портпаролите информираа и за дополнителни мерки за поддршка на земјоделието како еден од приоритетите на Владата. Имено, на вчерашната седница Владата ги усвои измените и дополнувања на Програмата за спроведување на интервентен фонд за земјоделството и согласно новите финансиски средства ќе се имплементираат нови мерки.
Портпаролите истакнаа дека Владата продолжува со интензивната агенда поврзана со обезбедување стабилно снабдување со електрична енергија во период на глобален недостиг и високи берзански цени на енергенсите.
Тие информираа дека во духот на регионалната соработка, делегацијата предводена од премиерот Ковачевски вчера во Атина договори соработка со Република Грција за справувањето со енергетската криза. Договорено е непречено снабдување со лигнит и јаглен од грчките рудници, со што ќе можат да бидат ставени во непречено функционирање производствените капацитети на јаглен во РЕК „Битола“ и во РЕК „Осломеј“. Постигнат е договор и за непречено снабдување со мазут преку Грција како и до сега, за да може непречено да функционира ТЕЦ „Неготино“, со што ќе се обезбеди снабдување на електрична енергија и од овој капацитет. Доколку се случи какво било ограничување на извозот од Грција, договорено е дека тоа нема да се однесува на извоз во Северна Македонија.
Оваа посета на владината делегација, како што беше наведено, била искористена и за разговори за големи енергетски проекти како што е гасна централа и изградба на „ХЕЦ Чебрен“ за што има интерес од грчки инвеститори.
На прес-конференцијата портпаролите информираа дека согласно јавниот повик за избор на вршител на енергетска дејност регулирано производство на топлинска енергија, вршител на енергетска дејност дистрибуција на топлинска енергија и вршител на енергетска дејност снабдување со топлинска енергија, во Владата на Република Северна Македонија се одржа јавно отворање на понудите. Процесот го спроведе комисија составена од претставници на владини институции. Како што истакнаа на сите три повици се јавил по еден понудувач.
За избор на вршител на енергетска дејност регулирано производство на топлинска енергија, се јавил „ЕСМ Производство на топлина ДООЕЛ Скопје“. За избор на вршител на енергетска дејност дистрибуција на топлинска енергија, пристигнала понуда од „ЕСМ Дистрибуција на топлина ДООЕЛ Скопје“, а за избор на вршител на енергетска дејност снабдување со топлинска енергија, се јавил „ЕСМ Снабдување со топлина ДООЕЛ Скопје“. Откако ќе биде извршена евалуацијата на пристигнатите понуди, како што беше соопштено, Комисијата ќе достави предлог до Владата, што ќе биде разгледан на една од наредните седници.
Информираа и за успешното враќање на туристичката индустрија во земјава по турбулентниот период предизвикан од пандемијата со Ковид-19.
Според последните статистички податоци, како што истакнаа, за седум месеци од годинава остварени без малку 1.400.000 ноќевања, а со август ќе се надмине бројката од 2,1 милиони. Ова е доказ дека можеме да обезбедиме до 2,6 милиони ноќевања во 2022 година и повеќе од 400 милиони долари во македонската економија од туристичката индустрија. Во периодот јануари – јули годинава во однос на истиот период од претходната година, бројот на туристите е зголемен за 53,3% и тоа: кај домашните туристи има зголемување за 13,7%, кај странските зголемувањето е за 109,9%.
Овие податоци, како што беше истакнато, се резултат од досега преземените мерки и политиката на владата за поддршка на туристичкиот сектор.
На новинарското прашање околу барањата на бизнис-секторот за справување со енергетската криза и субвенционирање на дел од струјата на бизнис-омпаниите, беше посочено дека со ребалансот на буџетот за 2022 година, обезбедени се 76 милиони евра за нови антикризни мерки и дека се финализира дизајнирањето на нов пакет антикризни мерки првенствено наменет за ранливите категории граѓани.
Мерките, како што беше напоменато, ќе бидат насочени кон стопанството и дека се очекува на наредните седници да се расправа и за ова.
Околу цената на електричната енергија од Република Бугарија од 420 евра за мегават, беше информирано дека цената за мегават час сè уште не е утврдена и дека работните групи на двете влади интензивно работат на нејзино дефинирање. Конечната цел и на неодамнешната посета на владината делегација на Република Бугарија, како што посочија, беше да се добие цена на електричната енергија под берзанската.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Меџити на отворањето на Инвестициско-трговски форум меѓу Македонија и Турција: турските инвестиции помогнаа во развојот на инфраструктурата и отворањето работни места
Првиот потпретседател на Владата и министер за животна средина и просторно планирање Изет Меџити денеска учествуваше и имаше oбраќање на отворањето на Инвестициско-трговскиот форум меѓу Северна Македонија и Турција.
Меџити го оцени како значаен овој настан организиран од Инвестициско-трговскиот форум меѓу Северна Македонија и Турција, како одлична можност уште еднаш да се истакнат силните врски меѓу Северна Македонија и Турција, а особено големиот потенцијал напред, заснован на многу пријателските односи.
„Економската соработка меѓу нашите две земји донесе бројни придобивки, додека турските инвестиции во Северна Македонија помогнаа во развојот на инфраструктурата и отворањето работни места, придонесувајќи за стабилноста и економскиот раст на Скопје, Тетово, Гостивар и Северна Македонија во целина“, изјави Меџити.
Оцени дека интересот на нашите бизниси да ги искористат можностите на турскиот пазар е голем, додека инвестициите од Турција се охрабрувачки и модел како се развива вистински бизнис.
“Во овој контекст, Форумот за инвестиции и трговија игра клучна улога, бидејќи нуди платформа за размена на идеи, искуства и за создавање нови врски. Тоа е одлична можност да се истражат можностите за соработка во различни сектори, од градежништво и производство до технологија и услуги“, рече Меџити.
На Форумот присуствуваа бизнисмени од Турција и Македонија, претседатели на стопански комори, пратеници и амбасадори.
Економија
Потпишан нов договор за соработка меѓу Народната банка и Државниот завод за статистика
Квалитетната статистика е клучна за процесот на носење добри одлуки и за водењето солидни економски политики. Оттаму, функционалниот статистички систем и соработката помеѓу институциите од тој систем се од суштинско значење за осмислувањето на јавните политики, но и за носењето деловни одлуки од приватниот сектор.
Потпишувањето на новиот договор за меѓусебна соработка и размена на податоци и публикациски материјали помеѓу Народната банка и Државниот завод за статистика, со кој понатаму се унапредува досегашната соработка на овие две институции, е од особено значајно за функционалноста и ефикасноста на домашниот статистички систем, којшто го исполнува највисокиот статистички стандард за дисеминација на податоците на Меѓународниот монетарен фонд – СДДС плус. Со новосклучениот договор се проширува опфатот на податоците коишто се разменуваат, се олеснува и се осовременува начинот на таа размена, а истовремено се скусуваат и роковите за доставување податоци. Сето ова ќе придонесе за исполнување на статистичките барања на европските и меѓународните институции и подготовка на квалитетни, веродостојни и навремени статистички податоци. Договорот за соработка во име на институциите го потпишаа гувернерката на Народната банка, Анита Ангеловска-Бежоска и в. д. директорот на Државниот завод за статистика, Дејан Станков.
На средбата беше истакнато дека во изминатиот период, следејќи ги глобалните статистички трендови и меѓународните иницијативи, националната статистика е надградена со нови податоци, како и дека подготовката и дисеминацијата на статистичките податоци е во согласност со најновите европски и меѓународни стандарди. Беше посочено и дека секој учесник има своја улога и одговорност во производството на статистики од својот домен на работење, затоа координацијата и усогласеноста на сите чинители во статистичкиот систем е предуслов за исполнување на целите и обврските на овие институции.
Економија
Зеколи Шаќири: Патниот транспорт е важна алка во синџирот на економијата за целата држава, за следната година го зголемивме бројот на ЕКМТ дозволи
Заменик министерката за транспорт, Калтрина Зеколи Шаќири денеска присуствуваше на традиционалната средба со превозници организирана од страна на асоцијацијата МАКАМ – ТРАНС.
Заменик министерката во својот говор пред траспортерите го истакнa огромното значење на патниот транспорт во развојот на економијата на државата. Таа, исто така додаде дека Министерството за транспорт оваа година воведе нов систем за распределба на ЦЕМТ дозволите.
„За нас како Влада и како Министерство, развојот на оваа дејност, развојот на вашите компании и зачувување на работните места се многу важни во одржување на стабилноста во економијата и затоа преземаме иницијативи и активности да обезбедиме непречен и континуиран транспорт.
Веќе знаете дека министерството разви нов систем за распределба кој е поефикасен, надрграден од претходниот и систем кој е интероперабилен и за прв пат е поврзан со Агенцијата за вработување и Централниот регистар.
Би ја искористила приликата да информирам и за бројот на транспортните дозволи за следната година за кои знам дека интересот е најголем.
За наредната 2025 година имаме зголемување на бројот на дозволи така што на располагање имаме 1.750 годишни ЦЕМТ дозволи што е за 70 дозволи повеќе отколку оваа година. Во однос на месечните, за 2025 година на располагање имаме 2.736 месечни ЦЕМТ дозволи и тоа за ЕВРО 5 имаме 720 дозволи, а за ЕВРО 6 имаме 2016 дозволи“, истакна заменик министерката Зеколи Шаќири.
Таа пред транспортерите најави дека министертвото и во наредниот период ќе продолжи со преговори со неколку држави околу зголемувањето на квотите на дозволите.