Економија
Потребни се повеќе од 2.000 работници, аплицирале 370: Бочварски и Рустеми на саемот за вработување на „Бехтел и Енка“

Министерот за транспорт и врски, Благој Бочварски, заедно со директорот на ЈП за државни патишта, Ејуп Рустеми денеска во Прилеп го отворија саемот за вработување во организација на „Бехтел и Енка“, како дел од процесот на ангажирање на домашни работници за реализација на проектот за изградба на автопатските делници на Коридор 8 и 10 – Д.
Тие ја потенцираа важноста од одржување на ваков тип на саеми, каде граѓаните ќе можат да се информираат за можностите за вработување понудени од светски реномирани градежни компании како „Бехтел и Енка“.
На саемот очекуваат интерес од стручни лица од повеќе области, градежни инженери, архитекти, работници, со цел што поголема ангажираност на домашна работна сила во реализација на овој најголем инфраструктурен проект во независна Македонија.
„Градежништвото во овој регион значи развој и ќе биде дополнителен мотор на економијата и за време на градбата на овие патишта, но од друга страна и по завршувањето на овој автопат ние ќе добиеме комплетно нова слика на овој регион, каде што ќе се отвораат нови работни места, ТИРЗ зоните ќе се раздвижат, компаниите ќе ги планираат своите бизниси овде, тоа е практично еден цел ланец кој што ќе придонесе да ги задржиме нашите граѓани во овој регион. Навистина ми е драго што по 32 години независност започнува изградбата на првиот автопат во Пелагонијата, но се гради и целиот друг дел од Коридорот 10-Д. Тука на саемот има понуди за секакви работни позиции и мене ќе ми биде драго доколку се вклучат што повеќе граѓани од Македонија, и во делот на градежништвото, но и во сите пропратни дејност“, изјави Бочварски.
Директорот на ЈПДП, Рустеми, истакна дека оваа година активно се работат сите капитални проекти и очекува рекордна реализација на капиталните инвестиции за 2023 година.
„Владата преку Министерството за транспорт и врски и преку Јавното претпријатие за државни патишта силно се залага патната инфраструктура да ја издигнеме до европските стандарди. Затоа оваа година имаме 480 милиони евра капитални инвестиции за патната инфраструктура, со што сите може да се увериме како работиме буквално во секој дел од државата. Ги градиме и рехабилитираме патните правци, се наоѓаме во силна градежна офанзива. Сакам да информирам дека до крајот на месец август имаме реализација од 60% од капиталните инвестиции, односно околу 300 милиони евра, а очекуваме до крајот на годината целосно да ги реализираме сите 480 милиони евра, што ќе биде историски потег на Владата“, истакна Рустеми.
„Оптимисти сме во однос на саемите, очекуваме голем интерес од граѓаните, бидејќи навистина станува збор за работни позиции кои опфаќаат повеќе области и многу различни профили. На нас ни се потребни повеќе од 2 илјади работници, а до сега имаме примено апликации од околу 370 работници, кои ќе ги прегледаме и уредно ќе ги информираме во однос на вработувањето. Исто така, до сега имаме ангажирано 37 македонски градежни компании кои ќе работат како подизведувачи на овој огромен проект. Продолжуваме со одржување на саемите за вработување, сакам да известам дека веќе од 20 септември ќе бидеме и во Велес, Кичево и Куманово“, изјави Џошуа Бејкер, директор на проектот и претставник од компанијата Бехтел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.
Економија
Во Народната банка се одржа 54. сесија на Клубот на истражувачите

Во Народната банка се одржа 54. сесија на Клубот на истражувачите на која беше претставен научниот труд „Макроекономски, институционални и финансиски детерминанти на дефицитот на тековната сметка во Северна Македонија: Согледувања преку временски серии“ од авторот Бардул Даути.
Сесијата ја отвори директорката на Секторот за монетарна политика, истражување и статистика, Султанија Бојчева-Терзијан, која посочи дека презентираниот труд нуди значајни сознанија за макроекономските и институционалните фактори коишто влијаат на дефицитот на тековната сметка во Република Северна Македонија. Таа нагласи дека надворешната позиција на македонската економија има особено значење, имајќи ја предвид стратегија на фиксен девизен курс, што ја спроведуваме. Во таа насока, одржливата тековна сметка претставува клучен елемент за зачувување на севкупната макроекономска стабилност.
Главниот заклучок на емпириската анализа е дека дефицитот на тековната сметка е резултат на макроекономски фактори – производниот јаз, како индикатор на домашната побарувачка, трговската отвореност и реалниот девизен курс. Дополнително, влијание имаат и фискални и финансиски фактори, како што се јавниот долг и паричната маса (М2), соодветно. Сепак, клучниот придонес на овој труд е вклучувањето на т.н. институционални фактори и оцената на нивното влијание врз билансот на тековната сметка. Студијата покажува дека силните институции – особено поефикасното управување, зголемениот квалитет на јавните услуги и заштитата на економските права, како што е правото на сопственост – можат значително да придонесат за подобрување на тековната сметка на платниот биланс. Овие заклучоци упатуваат дека, институционалните реформи се исто така важен сегмент за зајакнување на надворешната стабилност на економијата.
По презентацијата, следеше дискусија меѓу учесниците и презентерите, поттикната од презентацијата на трудот и од изнесените заклучоци. Следната сесија е планирана за септември годинава.