Економија
Први во регионот почнуваме со ИПАРД 3-програмата, објави Агенцијата за финансиска поддршка во земјоделството и руралниот развој

Во организација на Министерството за земјоделство, шумарство и водостопанство, денеска во Скопје се одржа настан со кој официјално беше означен почетокот на ИПАРД 3-програмата. На настанот присуствуваа вицепремиерот задолжен за европски прашања, Бојан Маричиќ, градоначалници, претставници на социо-економски партнери, ЛАГ-ови, претставници на планските региони, здруженија и земјоделци. Свое обраќање имаа вицепремиерот Маричиќ, министерот Николовски и директорот на Платежната агенција, Никица Бачовски.
„ИПАРД е нашата успешна приказна, ние сме лидери во регионот. Една мала земја како нашата успеа да се избори за лидерско место во конкуренција со двојно поголеми држави и држави кои се членки на ЕУ. Доказ е тоа што ние имаме број на инвестиции колку Србија, Црна Гора и Албанија заедно! Ние сме лидери по три основи. Имаме најголема искористеност од 98 % на средствата од ИПАРД 2-програмата со склучени 2.369 договори, нула евра поврат на средства за целиот ИПАРД 2-период и први во регионот ние почнуваме со ИПАРД 3-програмата. Успех што се мери во милиони евра инвестирани дома! Успех преточен во инвестиции по европски стандарди за модернизација на земјоделството и зголемен рурален развој“, изјави министерот Николовски.
Во своето обраќање Николовски посочи дека реализирани се многу нови преработувачки капацитети, објекти за рурален туризам, фарми, модерна земјоделска механизација, системи за наводнување и мали бизниси од рурални средини. Новите капацитети значат зголемено производство, нови вработувања, поголем рурален туризам и зголемена домашна економија. Радува фактот што од 2.369 договори, дури 859 се млади земјоделци, чии инвестиции во земјоделството изнесуваат 9 милиони евра. А она што дава уште поголема тежина на овие бројки е фактот дека сите инвестиции финансирани од ИПАРД ги исполнуваат строгите ЕУ-стандарди.
„Ова е нова страница во развојот на македонското земјоделство, кое ќе го зголемува извозот на македонските земјоделски производи на пазарот на ЕУ и ќе ни даде добра основа за многу повеќе и поголеми структурни европски фондови бидејќи тоа го носи членството во Унијата. И ова е потврда и најсилен доказ зошто сме и зошто треба да останеме на европскиот пат“, потенцира Маричиќ.
Новиот програмски период со ИПАРД 3 почнува со 62 % поголем буџет во споредба со ИПАРД 2.
„Ако за ИПАРД 2 имавме на располагање 60 милиони евра, за ИПАРД 3 имаме 97 милиони евра доделени од ЕУ, кои заедно со нашите пари за национално кофинансирање достигнуваат вкупно 128 милиони евра. Ако на овие 128 милиони ги додадеме и очекуваните суми за сопствено учество на корисниците, вкупната вредност на новите инвестиции надминува 210 милиони евра. Овие средства се наменети за граѓаните и тие ќе останат дома претворени во нови инвестиции во сите сектори во земјоделството и руралниот развој“, истакна Николовски.
За целиот ИПАРД 2-период, фокусот на Владата, министерството и Платежната агенција беше насочен кон создавање предуслови за подобра имплементација на програмата и крајно – поголема искористеност на овие неповратни средства.
„Институциите, пред сè, Министерството и Агенцијата вложија големи напори во промовирање и афирмирање на програмата со цел запознавање на крајните корисници со сите услови, критериуми и правила, подобрување на имиџот на самата програма и испраќање силна порака дека ИПАРД не познава вери, нации, припадности, политички проминенции. ИПАРД е тука да го поддржи секој што приоѓа со добар проект“, изјави директорот на Платежната агенција, Никица Бачовски, и дополни дека целта на ИПАРД е да го поддржи земјоделството, да ги поттикне руралниот развој и стопанството во руралните средини.
На настанот беше презентирана новата ИПАРД 3-програма, која се разликува од ИПАРД 2 по неколку основи. Покрај 4-те веќе акредитирани мерки од ИПАРД 2, ќе се акредитираат дополнителни 4 мерки, и тоа мерка за рурална инфраструктура, мерка за ЛАГО-вите за локален економски развој, мерка за агроекологија, клима и органско производство, што ќе придонесе за заштита на животната средина и надминување на влијанието од климатските промени и мерка за советодавни услуги.
Николовски ги информира присутните градоначалници за новата мерка за рурална инфраструктура, која ќе биде акредитирана во 2024 година и која е наменета за општините. На располагање ќе имаат буџет од 17 милиони евра за инвестиции во обновливи извори на енергија, локална патна инфраструктура, водовод и канализација за поголем развој на руралните подрачја. Се воведува и нов начин во обезбедување на потребната документација, ќе се користи електронски системи за набавка на документи од Централниот регистар, со што ќе се поедностави, олесни и ќе се забрза процесот и ќе се намалат трошоците за корисниците.
А најголемата новост е тоа што со ИПАРД 3 се овозможува авансна исплата до 50 % од висината на финансиската поддршка веднаш по потпишување на договорот, што ќе биде големо олеснување за побрза реализација на сите инвестиции и голема финансиска помош за полесен почеток на проектите.
Во текот на мај и јуни ќе биде спроведена интензивна теренска информативна кампања во сите региони пред да биде објавен првиот повик од ИПАРД 3-програмата, кој треба да се објави кон крајот на јуни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
ВМРО-ДПМНЕ: Заврши времето на матни тендери во енергетиката, СДС да се помири дека државата оди напред

ВМРО-ДПМНЕ испрати реакција на прес-конференцијата на Методија Илиевски, потпретседател на СДСМ.
„Заврши времето на матни тендери во енергетиката, СДС да се помири дека државата оди напред.
Ветерниот парк во Штип, Карбинци и Радовиш е најголема енергетска инвестиција од осамостојувањето до денес. 500 милиони долари ќе влезат во државата, а СДД наместо да се радува лее солзи.
Многу скоро од денес, Македонија од увозник на струја, ќе стане извозник.
Владата ја обезбедува енергетската сигурност на државата.
Иднината во Македонија ќе биде сигурна, сите ќе живееме во држава која ги има сите придобивки на 21-от век. А, СДС слободно може да останат со реториката во минатиот век, народот тоа го гледа и ќе ги избрише на следните избори“, стои во реакцијата на ВМРО-ДПМНЕ.
Економија
(Видео) Илиевски: Има ли „Алказар Енерџи“одобрение за градба или не, каков е бизнис интересот на Божиновска и Мицкоски?

Владата на ВМРO-ДПМНЕ прави класична распродажба на националните ресурси од македонската енергетика, кажа денеска на прес-конференција, Методија Илиевски, потпретседател на СДСМ.
„Иако Владата го претставува ветерниот парк на „Алказар“ како историска инвестиција – фактите говорат нешто сосема поинаку. Моделот на „Алказар Енерџи“ е јасен: развиј, изгради и продади. Токму тоа се случи со нивниот прв фонд – проектите развиени на Блискиот Исток беа продадени 100% на кинески државен конзорциум“, вели Илиевски.
Според него, „прашањето не е дали ветерниот парк ќе биде продаден, туку кога и на кого“.
„Кој е вистинскиот бизнис интерес на Мицкоски? Дали тука се вклучени и контроверзни имиња од регионот, добро познати од трговијата со струја? Дали со нив соработувал тандемот Мицкоски – Божиновска? Пред една година од ВМОР-ДПМНЕ тврдеа дека паркот ќе обезбеди струја за 100.000 граѓани. Сега Мицкоски смени лента, од собраниска говорница најавува дека странска компанија ќе ја откупува струјата. Па, кого навистина ќе снабдува овој проект – народот или приватниот купувач? Зошто бизнис модел кој се темели на продажба се претставува како долгорочно стратешко партнерство?“ истакна меѓудругото потпретседателот на СДСМ, Илиевски.
На прес-конференцијата регираше ВМРО-ДПМНЕ.
„Заврши времето на матни тендери во енергетиката, СДС да се помири дека државата оди напред. Ветерниот парк во Штип, Карбинци и Радовиш е најголема енергетска инвестиција од осамостојувањето до денес. 500 милиони долари ќе влезат во државата, а СДД наместо да се радува лее солзи. Многу скоро од денес, Македонија од увозник на струја, ќе стане извозник. Владата ја обезбедува енергетската сигурност на државата. Иднината во Македонија ќе биде сигурна, сите ќе живееме во држава која ги има сите придобивки на 21-от век. А, СДС слободно може да останат со реториката во минатиот век, народот тоа го гледа и ќе ги избрише на следните избори“, стои во реакцијата на ВМРО-ДПМНЕ.
Економија
„Најголемиот пораз од 1515 година“ – високите царини од САД за Швајцарија ќе остават без работа илјадници луѓе

Иако швајцарската претседателка Карин Келер-Сатер го напушти мајскиот состанок со американскиот министер за трговија Скот Бесант со насмевка, уверена дека постигнала договор за воведување царина од 10 проценти наместо најавените 31, Вашингтон сепак воведе многу повисока царина за Женева, дури 39 проценти. Оваа царинска стапка ја рангира Швајцарија на четврто место во светот по нивото на американските царини, веднаш зад Сирија, Лаос и Мјанмар.
Непосредно пред 1 август, крајниот рок за завршување на трговските преговори со САД, претседателката се обиде да го спречи овој исход преку директен разговор со Трамп, но без успех.
Швајцарскиот весник „Блик“ ја нарече оваа царинска мерка „најголемиот швајцарски пораз од Битката кај Марињано во 1515 година“. Мислењата во земјата се поделени, додека некои веруваат дека Швајцарија била премногу строга во преговорите, додека други ја критикуваат дека е премногу попустлива. Третите, од друга страна, ладнокрвно наведуваат дека Швајцарија е едноставно премногу мала за да го склучи големиот договор со Трамп на кој се надеваше.
Новиот трговски поредок што го воведуваат САД, според Би-Би-Си, никому не му носи добри вести.
Американскиот претседател со години се обидува да ги корегира трговските дефицити што САД ги имаат со одредени земји преку царини, иако повеќето економисти не се согласуваат со ова. Тој верува дека царините ги штитат домашните производители и работните места, особено во секторите кои со децении се соочуваат со жестока странска конкуренција.
Трговскиот дефицит на САД со Швајцарија изнесуваше 47,4 милијарди долари во 2024 година. Кога ќе се вклучат услугите, тој се намалува на 22 милијарди. Швајцарија најмногу извезува фармацевтски производи, златен накит, часовници и машински алати во САД.
Во обид да се намали нерамнотежата, швајцарската влада ги укина царините за американските индустриски производи, додека големи компании најавија повеќемилионски инвестиции во производствени капацитети во Соединетите Американски Држави.
Денес, Швајцарија е шестиот најголем странски инвеститор во САД, а нејзините компании директно вработуваат околу 400.000 луѓе во таа земја.
Швајцарските фирми сега предупредуваат дека десетици илјади работни места би можеле да бидат изгубени ако царината од 39 проценти остане во сила, откако ќе се примени на 7 август.
Би-Би-Си наведува дека Женева има многу малку простор за контрамерки и веќе им понудила на САД речиси сè што има.
Единствената преостаната опција би можела да предизвика сериозна трговска војна: повлекување на најавените инвестиции, воведување реципрочни царини и откажување на нарачките за американски борбени авиони.
Карин Келер-Сатер испрати јасна порака во петокот: одговорноста за трговската криза е кај – Доналд Трамп.