Економија
„Пуцко петрол“ и „Бауер БГ“ ги добиле највредните договори за јавни набавки со општините

Нафтениот дистрибутер „Пуцко петрол“ и градежните компании „Бауер БГ“ од Скопје и „НБ-компани“ од Тетово се на врвот на листата според вредноста на добиените тендери од општините, покажа базата податоци која ја изработи Центарот за граѓански комуникации.
На прво место според вредноста на склучените договори во текот на 2017 година е компанијата „Пуцко петрол“ од Пласница, која склучила 29 договори за продажба на нафтени деривати на општините во вкупна вредност од околу 3 милиони евра. Во споредба со претходната година произлегува дека „Пуцко петрол“ ја дуплирал вредноста на јавните набавки (во 2016 година вредноста на договорите на овој трговец на нафтени деривати изнесувала 1,5 милион евра).
На второ место според вредноста е градежната компанија „Бауер БГ“, која во 2016 година беше прва. Третото место ѝ припадна на тетовската градежна компанија „НБ-компани“, која во 2016 година беше на деветтото место според вредност на договорите за јавни набавки.
Според податоците, општините и Градот Скопје во 2017 година склучиле 2 737 договори за јавни набавки во вкупна вредност од приближно 80 милиони евра. Вредноста на набавките на стоки, услуги и работи од единиците на локална самоуправа во 2017 година е помала од претходната година за 62 милиони евра.
Градот Скопје е на врвот и според бројот и според вредноста на договорите. Притоа, во 2017 година Скопје склучило 153 договори за јавна набавка во вредност од околу 10 милиони евра, што е за 6 милиони евра помалку од претходната година.
Втора на листата според вредноста на склучените договори за јавни набавки лани е скопската општина Аеродром со потрошени 4,7 милиони евра или 5,9% од вредноста на сите општински тендери. На третото место, пак, според вредноста на тендерите во 2017 година е општина Куманово со потрошени околу 4,4 милиони евра, што е за 20,7% помалку од 2016 година.
На дното, пак, според бројот на договори е општина Градско, а според вредноста на договорите општина Пласница. Градско има склучено само 3 договори во вредност од околу 56 илјади евра, а Пласница, пак ,има 4 договори, но во вредност од само 21 илјада евра. Притоа две општини, Ранковце и Шуто Оризари, немале ниту еден договор за јавна набавка.
Дури 58% од парите за јавни набавки во 2017 година се потрошени за работи, потоа 26% за услуги и само 16% за набавка на стоки.
Сиве овие податоци произлегуваат од Базата на податоци за јавните набавки на општините во 2017 година изработена од Центарот за граѓански комуникации, во која се вклучени вкупно 2 737 договори на општините склучени со 1 048 фирми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Почнува ESG Adria Самитот: Се гледаме во Тиват!

Во среда, на 9 април, во Порто Монтенегро, во Тиват започнува ESG Adria Самитот – најголемиот регионален настан посветен на темите за одржливост, инвестиции, иновации и економски развој.
Во текот на трите дена на самитот се очекуваат повеќе од 700 учесници, високи претставници, владини функционери, бизнис лидери, носители на одлуки, претприемачи и претставници на меѓународни организации од регионот и светот. Повеќе од 140 светски познати говорници, претставници на над 300 компании и над 60 млади лидери од регионот ќе имаат можност да ги презентираат најдобрите деловни практики и да дискутираат за одржлив развој, иновации и зелена транзиција.
Заменик-претседателот на Владата за економски развој, Ник Гјелошај, по тој повод изјави дека Црна Гора е горда што е домаќин на овој дијалог, затоа што, како што нагласи, „повеќе од кога било досега веруваме дека одржливоста не е само концепт – туку наша реалност, обврска и пат напред“.
Тој порача дека ESG не е список на желби туку оперативна политика, и потсети дека Владата во изминатиот период вложила многу напори во уредување на институционалниот и економскиот систем.
„Кога пред три години го започнавме ESG Adria Самитот, сакавме да отвориме простор за сериозен и конкретен разговор за иднината на регионот. Денес, гледајќи го бројот на учесници, длабочината на темите и квалитетот на дијалогот, сметам дека е јасно оти создадовме нешто што ја надминува класичната форма на конференција“, изјави Билјана Брејтвеит, извршна директорка на Sustineri Partners, организатор на ESG Adria Самитот.
Црна Гора е домаќин на ESG Adria Самитот третa година по ред, а како што истакна Брејтвеит, оваа година учесниците на настанот ќе отворат низа теми – од геополитичката ситуација и нејзиното влијание врз регионот, правната сигурност како клуч за економски просперитет и привлекување странски инвестиции, енергетската транзиција, па сè до вештачката интелигенција и иднината на трудот, одржливиот туризам и, секако, улогата на младите во трансформацијата на регионот.
„Како водечка дестинација на Јадранот, нашата цел е да бидеме предводници во интеграцијата на ESG практиките. Преку оваа конференција сакаме да ги собереме нашите партнери, закупци и клиенти, со цел заеднички да размениме знаења и искуства и дополнително да го унапредиме нашиот пристап кон одржливо работење. ESG повеќе не е само иднина – тој е сегашност и обврска. Нашата улога е да предничиме во одговорно управување со ресурсите и зачувување на природната и општествената средина“, изјави Предраг Лековиќ, директор за односи со влада и управување со имот во Порто Монтенегро.
„Universal Capital Bank со гордост го поддржува ESG Adria Самитот, затоа што веруваме дека одржливоста, одговорното работење и зелената транзиција се клучни за иднината на економијата. Како финансиска институција, свесни сме за нашата улога во обликувањето на одржливо општество и сметаме дека е наша одговорност да бидеме дел од таа промена. Дополнително, Црна Гора како домаќин на самитот испраќа силна порака до инвеститорите за нејзината посветеност на одржливиот развој. Тоа отвора нови можности за развој на пазарот, привлекување инвестиции и зајакнување на економијата“, изјави Милош Павловиќ, претседател на Управниот одбор на Universal Capital Bank, платинумски партнер на ESG Adria Самитот.
ESG Adria Самитот, кој ќе се одржи од 9 до 11 април во Тиват, е организиран од страна на Sustineri Partners и Порто Монтенегро, во партнерство со Владата на Црна Гора и под покровителство на Претседателот на Црна Гора.
ПР
Економија
РКЕ потпиша меморандум за соработка со Регулаторната агенција за енергетика на Црна Гора: Градењето професионални капацитети е приоритет за нас

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) и Регулаторната агенција за енергетика и водни услуги на Црна Гора (REGAGEN) потпишаа Меморандум за соработка. Методологиите за утврдување на тарифи за електрична енергија и водни услуги, заштита на потрошувачите како и институционалниот развој низ призма на градење на професионални капацитети се дел од интересот на кој се фокусира регулаторната соработка.
„Градењето на професионални капацитети е приоритет за нас регулаторите. Формирањето на цени се чини како едноставен процес, но во суштина бара исклучителна експертиза не само од технички аспект туку и од економски и правен. Цените што ги носиме треба да обезбедат сигурна, стабилна и непречена испорака на енергенси / односно снабдување со вода, но во исто време цената треба да биде прифатлива за потрошувачите, воедно да ги заштити и ранливите категории. За да се реализира успешно овој комплексен процес неопходно е континуирана надоградба и едукација на вработените – и тоа е единствениот правилен пат како се градат професионални регулаторни капацитети“, изјави Марко Бислимоски, претседател на РКЕ.
Регулаторната работилницата е втора по ред која се одржува помеѓу РКЕ и РЕГАГЕН
„Потпишувањето на меморандумот со РКЕ е формализирање на нашата долгогодишна соработка. Пандемијата и енергетската криза ни покажаа дека сите заедно – земјите од регионот се соочуваме со исти предизвици. Синхронизираниот пристап во делувањето се наметна како природен чекор посебно во турбулентно време. Размената на искуства не е само декларативна заложба, има практично влијание во креирање на решенија кои се предуслов за сигурна, стабилна и непречена испорака на електрична енергија и вода“, изјави Бранислав Прелевич, претседател на одборот на РЕГАГЕН.
Претходно, РКЕ потпиша Меморандум за соработка во областите: енергија, вода и отпад и со Грчката регулаторна комисија за енергија, вода и управување со отпад (RAAEY).
Економија
Владата: Обезбедени 550 милиони денари за раст на платите во здравството

Од државниот буџет се обезбедени 550 милиони денари за раст на платите во здравството, соопшти Владата.
За само 6 месеци, велат од таму, здравствените работници, медицински сестри, технички и административен персонал добија второ покачување од 5 проценти, со што платата на докторите е зголемена за 4.815 денари, додека на медицинските сестри за 6.200 денари.
„Дополнително, со Буџетот се издвојуваат околу 4.5 милијарди денари за зголемување на капитациониот бод за матичните доктори од општа медицина и гинекологија од 75 на 100 денари или зголемување од 33 проценти, додека за стоматологија од 61 на 75 денари односно зголемување од 23 проценти. Со ова покажуваме дека никој не е заборавен и изоставен, напротив максимално се трудиме за унапредување и поддршка на здравствениот систем и поттикнување на мотивацијата на матичните лекари“, соопштија од Владата.
Наша цел, додаваат од таму, е до крајот на мандатот, платите во здравството да се покачат за 50 проценти.