Економија
Реакција од директорот на ТИРЗ на прес-конференција на ВМРО-ДПМНЕ

Директорот на ТИРЗ Јован Деспотовски реагираше на вчерашната прес конференција на политичката партија ВМРО ДПМНЕ.
– Како одговорен човек, носител на јавна функција со јасно чувство на обврска за градење на здрави односи во општеството ја проследувам мојата лична реакција кон прес конференцијата на политичката партија ВМРО ДПМНЕ.
Прво и директно ќе одговорам дека државните пари за проектот за електрично возило се онаму каде рековме дека ќе бидат, а тоа е Буџетот на државата. Причината за тоа е едноставна: работам чесно и одговорно од првиот ден на мојот мандат и не менувам принципи на работење, посебно не оние што ги сметам за основни. Од самиот почеток на овој проект, јасно рековме дека средства за проектот ќе има, но откако инвеститорот ќе ги реализира сопствените обврски предвидени со договорот. Тоа останува услов до крај.
Второ и повторно директно ќе одговорам дека денес, во овој момент, се уште нема фабрика. Но, има проект, има конзорциум на домашни компании кои се избрани од инвеститорот да го реаизираат градежниот дел, има договор за закуп на земјиште, има подготовка за градба на клучна инфраструктура кон зоната.
Но, и без овие работи, навистина не сметам дека ова е причина за задоволство, па макар доаѓало и од нашите политички опоненти. Ефектите од оваа, како и од останатите инвестиции се за сите граѓани на оваа држава. Затоа навистина е, коректно кажано, несоодветно е да самите да креираме слика за неуспеси, а притоа и да се радуваме. Впрочем, ако е тоа пристап и политика со која се гради здрава држава и општество, тогаш секако и сите ние останатите, што не сме дел од врвот на ВМРО ДПМНЕ, би имале многу причини за вакво „радување“, почнувајќи од проектите во Скопје 2014, преку клучките на автопатот до Охрид, до зоната во Ранковце, каде во име на државата се ветувани работници за 8.000 денари месечна плата.
Трето, одговорноста кон граѓаните се гледа низ резултати, а не низ желбите и обидите да стигнеме до резултати. Денес можеме да зборуваме за над 4.000 нови работни места во компаниите во зоните во период од само 30 месеци. Истото е 2/3 од вкупно оствареното во цела деценија до 2017 година. Или дека средствата што со услови и по јасни правила се вложуваат како поддршка на инвестициите денес носат над 60 милиони евра приходи во Буџетот на годишно ниво. Тоа се 50 милиони евра годишно повеќе за училишна, болници, инфраструктура, пензии, плати на здравствените, образовните и работниците во војската и полицијата.
Конечно, во сета измината 1 година и институцијата и лично јас не сме избегнале ниту едно прашање, ниту пак барање за информации поврзани со овој проект. Така ќе остане и понатаму и за овој и за сите проекти што ги работиме“, се вели во реакцијата од директорот на Дирекцијата за ТИРЗ, Јован Деспотовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Николоски: Голем раст на градежништвото и транспортот

Бруто домашниот производ порасна за 3.4% во април, мај и јуни. Особено ми е драго што секторите градежништвото, транспорт и складирање силно растат! Тие се двигатели на македонската економија! Во вториот квартал секторот градежништво порасна за 7.3%, објави вицепремиерот и министер за транспорт Александар Николоски на својот фејсбук профил.
„Голем раст на градежништвото, транспортот и складирањето.
Премиерот Христијан Мицкоски објави одлични вести за македонската економија – во месеците април, мај и јуни бруто домашниот производ порасна за 3.4% . Особено ми е драго што секторите градежништвото, транспорт и складирање силно растат! Тие се двигатели на македонската економија!
Во вториот квартал секторот градежништво порасна за 7.3%, уште посилен раст од тој во првиот квартал од 7.1%, додека секторот транспорт и складирање порасна за 6.0% .
Со засилената активност во делот на изградба на патишта, инвестиции во железници и проекти од локално значење растот во третиот квартал ќе биде уште посилен благодарение на вредните работници кои работат во секакви временски услови и јасните политики и стратегија на Владата и Министерството за транспорт.
Ја градиме Македонија“, напиша вицепремиерот Николоски.
Економија
Славески од Глобалниот форум на АФИ: Финансиската вклученост е предуслов за одржлив раст и за стабилност

„Секој човек има право на фер и квалитетни финансиски услуги, а финансиската едукација е клучот за стабилен систем и за заштита на граѓаните“ – порача гувернерот на Народната банка, д-р Трајко Славески, на Глобалниот форум за политики на Алијансата за финансиска инклузија (АФИ), којшто се одржува во Намибија.
Во своето воведно обраќање пред регионалната иницијатива за Источна Европа и Централна Азија (ECAPI), гувернерот нагласи дека финансиската вклученост претставува темел на сеопфатниот економски раст и благосостојбата на општествата. „Само финансиски писмени граѓани можат да носат исправни одлуки за штедење, задолжување и за инвестирање, а со тоа придонесуваат и за стабилноста на целиот финансиски систем“, рече Славески.
Тој нагласи дека дигитализацијата и финтек-иновациите отвораат огромни можности за поширок пристап до финансиски услуги, но носат и нови ризици – како што се нови типови измами, злоупотреби на лични податоци и ризик од презадолжување на домаќинствата. „Во дигиталната ера е неопходно развивање ефикасни иницијативи за финансиска едукација и алатки за различни целни групи – од младите до постарите генерации“, истакна гувернерот.
Во обраќањето тој се осврна и на активностите на Народната банка во областа на финансиската вклученост. Посочи дека нашата земја оваа година стана членка на Единствената област за плаќања во евра (СЕПА), што ќе овозможи побрзи, поевтини и посигурни трансакции за граѓаните и за компаниите. Покрај тоа, се работи на воведување основна сметка за плаќање со фиксeн и пристапeн надоместок, наменета особено за ранливите категории граѓани. „Намалувањето на банкарските надоместоци и воведувањето нови механизми за заштита на потрошувачите се важни чекори за повисока вклученост“, нагласи Славески, додавајќи дека во подготовка е и втората Национална стратегија за финансиска едукација и финансиска инклузија.
„Да се биде дел од големото семејство на АФИ за нас претставува и чест и обврска за постојана размена на искуства и знаења. Народната банка и во иднина ќе биде целосно посветена на овој процес“, истакна гувернерот, изразувајќи благодарност за поддршката и соработката со АФИ и со институциите од регионот. На Глобалниот форум, заедно со гувернерот, учествуваат и главната економистка Анета Крстевска и советничката на гувернерот Весна Стојчевска.
Гувернерот Славески учествуваше и во панел-дискусијата на Глобалниот форум за политики на Алијансата за финансиска инклузија (АФИ), посветена на зголемувањето на вклученоста на жените на пазарот на труд. Во своето излагање, Славески нагласи дека сеопфатниот раст е незамислив без родова еднаквост и еднакви економски можности. „Според Глобалниот извештај за родовиот јаз за 2024 г., иако разликите во пристапот до образованието и здравството речиси исчезнаа, најголемиот јаз останува во економската и политичката застапеност на жените“, истакна тој, повикувајќи на проактивни светски политики. Воедно, тој ги претстави активностите на Народната банка во оваа област, меѓу кои и улогата на институцијата како национален координатор за спроведување на Кодексот за финансирање на жените претприемачи (We Finance Code − WeFi Code) – светска рамка за затворање на родовиот јаз во финансирањето на женските бизниси, поддржана од Светската банка, ЕБОР и од други меѓународни партнери.
Членството на Народната банка во Алијансата за финансиска инклузија е со поддршка на Европскиот фонд за Југоисточна Европа (ЕФСЕ) и Европската банка за обнова и развој (ЕБРД).
Економија
Дурмиши: Преку мерката за зелени инвестиции отворени се речиси 400 работни места во приватниот сектор

Министерот за економија и труд, Бесар Дурмиши, заедно со директорот на Агенцијата за вработување, Сељатин Бељули, и постојаниот претставник на УНДП, Армен Григорјан, денеска го посети ресторанот „Ксантика“, кој е еден од успешните примери на зелени инвестиции и создавање нови работни места.
За време на посетата министерот истакна дека преку Мерката 8 – „Создавање нови работни места преку зелени инвестиции“, досега се отворени речиси 400 нови работни места во приватниот сектор.
„Досега 228 компании инвестираа во зелени решенија – фотонапонски панели, енергетска ефикасност и модерна опрема. Компаниите вложија над 200 милиони денари сопствени средства, што е повеќе од државната поддршка. Тоа покажува дека политиката на Владата не е само субвенција, туку катализатор за приватен капитал и за зелена економија,“ рече министерот Дурмиши.