Економија
Реплек најавува уште поголем раст во 2024 година

„Реплек АД“ и во 2023 година продолжи со стратегијата на зајакнување на пазарните позиции, производното портфолио како и промоцијата на потенцијалите што придонесе годината да ја заврши со успешни резултати. Позитивниот тренд на финансиските резултати кои заклучно со септември донесоа 44% раст на приходите од продажба од фармација на Реплек продолжуваат до крајот на оваа година.
За 2024 година од компанијата најавуваат нов инвестициски циклус, кој ќе придонесе кон зголемување на производствените капацитети и во таа насока на натамошно унапредување на пазарните позиции. Исто така, ќе продолжат и со вложувањето во кадровскиот потенцијал и поддршката на заедницата.
„Се радуваме на успешно завршената година и со нова мотивација и свежина продолжуваме со засилено темпо во Новата година. Во 2023 година останаа многу од предизвиците поврзани со нестабилното опкружување, се појавија и нови, но и покрај тоа Реплек успеа да расте и да ги унапредува своите позиции како на странските така и на домашниот пазар. За Реплек оваа година беше една од најуспешните. Вложениот труд и јасниот стратешки пат по кој тргнавме носи успеси за нашата компанија и јас верувам дека во Новата година со инвестиции и иновации ќе оствариме уште поголем раст.“ – истакна Душан Пецовски, генерален директор на „Реплек АД“.
Извозната стратегија, позиционирањето на домашниот пазар, како и внатрешната реорганизација, кадровското освежување и имплементацијата на иновации во производствениот процес се клучните фактори за растот на компанијата. Како резултат на тоа во првите девет месеци од 2023 година 52% од растот на приходите е остварен во сегментот фармација на странски пазари, додека 21% раст на приходите е остварен на домашен пазар.
Реплек годинава доби и потврда за високиот квалитет на производите од Европската Агенција за лекови (ЕМА) која и го додели сертификатот EUGMP (Good manufacturing practice) по четврти пат. Сертификатот е потврда за добра производствена пракса и претставува услов за влез на пазарот на ЕУ, како и за пласман на производите и на други пазари. Ова претставува дополнителна можност за уште посилно зајакнување на извозот и освојувањето на нови пазари.
Компанијата е присутна на пазарите во Европската Унија, регионот Адриа, како и на пазарите во Централна и Југоисточна Азија, а дел од производите од фармацевтската програма на компанијата се едни од најпродаваните на одделни пазари, што е дополнителна потврда за квалитетот и висока конкурентност на глобално ниво.
(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Скајп“ заминува во историјата

По една година одржување „на апарати“, „Скајп“ официјално ќе биде исклучен денеска.
„Мајкрософт“ веќе некое време најавува затворање на некогаш исклучително популарната апликација за видео повици „Скајп“. Од денеска, оваа апликација повеќе нема да биде достапна, а „Мајкрософт“ им советуваше на корисниците да мигрираат на новото решение на компанијата.
„Почнувајќи од мај, ‘Скајп’ повеќе нема да биде достапен. Продолжете ги вашите повици и разговори преку ‘Тимс’“, им соопшти „Скајп“ на корисниците претходно оваа година.
„Скајп“ беше првата платформа што им овозможи на корисниците пристап до бесплатни аудио и видео повици од компјутер до компјутер низ целиот свет од 2003 година и ги донесе фиксните и мобилните повици на интернет.
„Мајкрософт“ вели дека неговата цел е да ја поедностави понудата за корисниците и да се фокусира на сопствената моќна бизнис платформа, „Тимс“. Токму кон „Тимс“ ќе бидат пренасочени милионите преостанати корисници кои останаа лојални на „Скајп“, а тоа ќе се случи во наредните денови и недели.
Економија
Грција бара 80.000 работници

Грција можеби е меѓу најпопуларните европски дестинации, но има недостиг од работници. Според проценките и недостасуваат 80.000 работници.
На фасадата на меаната „Каријатис“, сместена на плоштадот под Акропол, има знак: „Бараме персонал, готвачи, келнери, кујнски работници“. Со оглед на рекордниот број туристи што се очекува да ја посетат Атина ова лето, сопствениците на ресторани не сакаат ништо да остават на случајноста.
„Станува сè потешко да се најдат вработени“, изјави за „Гардијан“ Димитрис Статокостопулос, кој го води ресторанот со својот брат: „Туризмот дефинитивно расте, но денес Грците претпочитаат да избираат канцелариски работи од 9 до 5 кои не бараат работа ноќе или викенди“.
Со оглед на тоа што туристичката сезона е пред вратата, потрагата по персонал доби неочекувана итност. Грција можеби е меѓу најпопуларните европски дестинации, но има недостиг од работници.
Недостатокот е толку голем што се проценува дека угостителскиот и хотелскиот сектор – ‘рбетот на туристичката индустрија што ја движи грчката економија со удел од 25% од БДП – сè уште има недостиг од околу 80.000 работници.
Статокостопулос не е единствениот претприемач кој се бори да најде персонал за својата популарна таверна во текот на веројатно најпрометниот период од годината. Низ целата земја, хотелиерите се натпреваруваат да најдат рецепционери, чистачи, спасители, портири, келнери и готвачи.
Од популарните острови како Крит и Родос, има извештаи дека хотелиерите крадат работници од своите конкуренти нудејќи подобри плати и услови за работа.
„Делумно ова е последица на пандемијата што ја почувствува цела Европа, но во Грција проблемот е особено изразен“, рече Јоргос Хоцоглу, претседател на Грчкото здружение на угостителски и туристички работници (ПОЕЕТ).
„Сведоци сме на невиден недостиг на квалификувани и искусни работници, особено во хотелската и угостителската индустрија, по егзодусот на вработените за време на карантинот. Многумина никогаш не се вратија. Резултатот е потреба од приближно 80.000 нови работници“, објаснува Хоцоглу.
Економија
Димитриеска-Кочоска во работна посета на Турција

Министерката за финансии Гордана Димитриеска-Кочоска од денеска престојува во тридневна работна посета на Република Турција, каде ќе оствари средби со претставници на турската Влада и ќе учествува на 28. Евроазиски економски самит.
За време на посетата министерката Димитриеска-Кочоска ќе оствари средби во Министерството за финансии на Турција и Министерството за трговија на Турција, односно со министерот за трезор и финансии Мехмет Шимшек и министерот за трговија Омер Болат.
Димитриеска-Кочоска, исто така, ќе учествува на 28-от Евроазиски економски самит, каде ќе има воведно обраќање. Самитот којшто е посветен на тема „Похуман свет“, претставува место на кое се присутни евроазиски лидери кои годинава ќе зборуваат на актулени теми поврзани со екологија, економија, енергија, вештачка интелегенција, меѓународна соработка во здравствениот сектор и слично. Самитот традиционално го организира Фондацијата Мармара.
Во составот на делегацијата што ја предводи министерката се и државниот секретар во МФ Андриана Матлиоска, Катерина Антовска, шеф на кабинет и посебен советник во МФ, како и директорите на Управата за јавни приходи Елена Петрова, на Царинската управа Бобан Николовски и на Управата за финансиска полиција Слободан Ивановски.