Економија
Ристова: СДСМ поддржува минимална плата од 31.500 денари

Во услови на постојан пораст на трошоците за живот, СДСМ изрази загриженост за општата економска состојба и нивниот став за подобрување на животниот стандард на работниците. Според најновите податоци, минималната синдикална кошница во Македонија за овој месец достигна 63.252 денари, што претставува пораст од скоро 400 денари во споредба со минатиот месец, додека за ист период од минатата година, зголемувањето изнесува 6.000 денари.
„Се соочуваме со ситуација каде што две минимални плати не се доволни за покривање на основните потреби на домаќинствата. Животот станува сè поскап, а платите не се зголемуваат. Ова не може да продолжи, бидејќи работниците не можат да ги издржат овие услови“, изјави Лолита Ристова, претставник на СДСМ.
„Грешките во економската политика на власта, предводена од Мицкоски и ДПМНЕ, ја збогатија малата елита, додека обичните луѓе се во борба за преживување. Владата не се грижи за работниците, туку за луксузни проекти. Со најголемиот буџет во историјата, власта нема средства за зголемување на минималната плата, но има пари за нови авиони“, додаде Ристова.
Таа потсети дека СДСМ во минатото беше и ќе остане на страната на работниците.
„За прв пат во историјата, Владата на СДСМ ја зголеми минималната плата за 100 проценти во однос на 2016 година, а просечната плата се зголеми за повеќе од 20.000 денари. Но, за жал, ова не е доволно. Поради растот на цените, минималната плата мора да биде повисока и треба да достигне минимум 31.500 денари“, рече Ристова.
Според неа, СДСМ се обврза да продолжи да ги поддржува барањата за зголемување на минималната плата и побара од владата да ги напушти погрешните економски политики и да ги стави работниците на прво место.
„Ние бараме власта итно да ја покачи минималната плата и да ги зголеми платите за вработените во сите сектори. Работниците заслужуваат повеќе и СДСМ ќе продолжи да се бори за нивните интереси“, изјави Ристова.
СДСМ ги повикува сите граѓани и работници да се приклучат во оваа борба за праведна и стабилна економија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.