Економија
Сугарески: Почнуваме со реконструкција на речиси 450 километри локални патишта

Министерот за транспорт и врски, Горан Сугарески, ги презентира капиталните проекти што ќе се реализираат во Министерството за транспорт и врски оваа година. Еден од најзначајните проекти што ќе се работи оваа година, како што рече тој, е проектот за поврзување локални патишта.
„Проектот предвидува инвестиции во рехабилитација на локални патишта и улици во 80 општини во државата, вклучувајќи ги и општините во градот Скопје, што подразбира дека Министерството за транспорт и врски, односно Владата, директно ќе им помага на општините во подобрување на локалната патна мрежа преку рехабилитација на улици и патишта во сите општини. Вкупната вредност на овој проект изнесува 70 милиони евра, средства обезбедени од Светската банка, за што Собранието го изгласа Законот за задолжувањето, а Министерството за финансии веќе го потпиша договорот со Светската банка и средствата ни се дадени на располагање. Секоја општина според утврдена методологија одобрена од Светската банка на располагање има одредена висина на средства и секоја општина ќе добие од 500 илјади евра до 2 милиона евра“, нагласи Сугарески.
Во делот на гасификацијата рече дека во втората половина од оваа година преку Националните енергетски ресурси ќе се распишат јавни повици за изградба на магистралниот гасовод Велес – Свети Николе и магистралниот гасовод Гостивар – Кичево.
„Веќе се преговара со ЕБОР за финансирање на проектот и очекуваме да има позитивен одговор од нивна страна. Тоа што е многу важно, оваа година ќе заврши изградбата на делниците од Неготино преку Прилеп до Битола и делницата Скопје – Тетово – Гостивар.
Во делот на станбената политика оваа година ќе почнеме со изградба на социјална станбена зграда со 312 стана во општина Бутел. Договор со изведувач веќе имаме и во моментот се расчистува локацијата од постојни објекти. Понатаму, во соработка со АД за стопанисување со станбен и деловен простор се подготвуваме за изградба на социјални згради во Гевгелија, Пехчево, Виница, Свети Николе, Дебар, Сарај, Велес и Демир Капија или вкупно 320 социјални стана. Оваа година очекуваме да заврши изградбата на двете социјални станбени згради во Пробиштип и Неготино. Новиот правилник за распределба е веќе готов и со изградбата на становите веднаш ќе бидат распределени.
Многу важен проект на кој ќе посветиме посебно вниманите е изградбата на железницата кон Република Бугарија. Оваа година очекувам многу силно темпо за изградба и до крајот на годината, конечно, да го завршме делот од Куманово до Бељаковце. Исто така, знаете дека во овој момент тече тендерската постапка за изградба на втората фаза од Бељаковце до Крива Паланка. 15 компании се влезени во тендерската постапка и заедно со ЕБОР се работи на евалуација на понудите. До крајот на годината очекуваме да се избере изведувач и да почнеме со работа на терен.
Она што сакам да информирам е дека преку Фондот за финансирање проекти за Западен Балкан одобрени ни се 2,7 милиона евра за изградба на заедничка желеничка станица на Табановце со Република Србија.
Ќе се работи во Велес, Крушево, Карбинци, Јегуновце, Охрид, Куманово, Свети Николе, Чашка, Демир Хисар, Сарај, Старо Нагоричене и во други општини. Тука сакам да спомнам дека за десетина дена почнуваме со изградба на канализацијата во Визбегово и ќе потенцирам дека тоа беше едно од најгласните барања на стопанствениците што работат во индустриската зона. Исто така, ќе се работи и на изградба на канализација во Арачиново и во Волково.
И на крајот, не помалку важно е финансиската поддршка за нови авиолинии. Континуирано ќе го промовираме охридскиот аеродром, очекуваме нови линии оваа година, така што интензивно ќе се работи на унапредување на авиосообраќајот во земјата. Независно од изброниот процес, годинава планираме уште посилен интензитет на градежни активности насекаде во државата, што очекуваме да доведат до повисок раст на градежништвото и економијата во целина“, истакна министерот Сугарески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Славески: Народната банка е пример за креирање политики засновани на квалитетни податоци и истражувања

„Несомнено, квалитетните и навремени податоци и анализи се клучни во носењето на кредибилни политики со кои се одржува макроекономската стабилност. Затоа, Народната банка своите одлуки секогаш ги темели на робусни докази засновани на детални емпириски истражувања, статистички анализи и квалитетни податоци, коишто го одржуваат и јакнат нејзиниот кредибилитет. А во време на глобални неизвесности и повеќе последователни кризи, токму силниот кредибилитет претставува најмоќната алатка за успешно остварување на целите на монетарната политика“. Ова го порача гувернерот Трајко Славески во своето воведно излагање на годишната конференција „Применети економски истражувања: патот кон оптимални национални стратегии и политики во турбулентни времиња“ организирана од страна на Балканската асоцијација на економисти во применета економија, во соработка со и поддржана од Економскиот факултет – Скопјe при УКИМ и Сојузот на економисти на Македонија.
Славески се осврна на анкетното истражување на Global central banking околу главните приоритети на централните банки, оперативните поставености и, следствено нивните истражувачки активности во следниот период.
„На прво место е финансиската стабилност, при што над 45% од централните банки даваат приоритет на финансиската стабилност и отпорноста, во контекст на тековните глобални предизвици. На второ место е справувањето со инфлацијата, при што мерките што ги преземаат централните банки се во насока таа да се сведе на историските нивоа од околу 2%. Третата област е кибер-безбедноста и вештачката интелигенција, коишто се новите предизвици пред кои што се исправени централните банки“, истакна гувернерот Славески.
Во фокусот на истражувањата се и дигиталната трансформација, вклучително и воведувањето на дигиталните валути коишто сѐ помасовно стануваат дел од стратегиите на централните банки.
Славески посочи дека носењето на одлуки базирани на докази е неопходно за централните банки успешно да ја извршуваат својата функција во комплексноста на денешните економии, особено во услови на епизоди на висока инфлација, брзи технолошки трансформации, огромна неизвесност и гео-економска дезинтеграција.
Во своето обраќање тој порача дека Народната банка посветено и во континуитет работи на подготовка на напредни и сеопфатни истражувања и анализи, коишто претставуваат еден од главните чинители при носењето на одлуките со кои се одржува севкупната макроекономска и финансиска стабилност на земјата.
Економија
МФ: Исплатени 19,4 милиони евра нова транша за поддршка на домашните компании

Над 1 милијарда денари нова транша е исплатена од кон Развојната банка за подршка на домашните компании, средства кои Владата ги обезбеди по поволни услови од унгарскиот заем, извести МФ.
Од централниот Буџет кон Развојната банка се исплатени 1,2 милијарди денари, односно 19,4 милиони евра, средства со кои ќе се реазираат инвестициски проекти од страна на домашните компании, кои претходно се одобрени од страна на деловните банки.
Со оваа транша вкупната поддршка што од централниот Буџет е трансфериран кон домашната економија преку оваа владина мерка изнесува 190,5 милиони евра.
Во Буџетот за 2025 година проектирани се вкупно 250 милиони евра кои се наменети за поддршка на инвестициски проекти на домашните компании, а кои треба да покренат инвестициски циклус во приватниот сектор од околу 300 милиони евра. Средствата за оваа намена ги обезбеди Владата по поволни услови преку унгарската Експорт-импорт банка, соопшти Министерството за финансии.
Економија
Халкбанк со нова кредитна линија од 12 милиони евра за одржливо земјоделство

Халкбанк АД Скопје, како една од водечките банки во земјата која постојано се насочува кон поддршка на реалната економија, започнува со реализација на нова кредитна линија наменета за развој на одржливо земјоделство.
Средствата во износ од 12 милиони евра се обезбедени преку Европскиот фонд за Југоисточна Европа (ЕФСЕ) и ќе бидат ставени на располагање на земјоделците и земјоделските бизниси во наредните пет години.
Целта на оваа кредитна линија е да им овозможи на микро (вклучувајќи трговци поединци и индивидуални земјоделци), мали и средни претпријатија пристап до поволни извори на финансирање кои ќе им помогнат да ги реализираат своите планови за работен капитал, како и за инвестиции во опрема, модернизација и развој на одржливи агро-практики.
Кредитите ќе бидат одобрени под атрактивни услови, со варијабилна каматна стапка која започнува од 5,5% и со можност за флексибилна отплата преку месечни, квартални или полугодишни ануитети. Освен финансиската поддршка, програмата предвидува и дополнителни бенефити за земјоделците: организирани работилници и тренинзи преку кои ќе можат да стекнат нови знаења за современи и одржливи земјоделски практики, како и грант компонента до 1.000 евра по корисник, достапна до исцрпување на предвидениот буџет. На тој начин, кредитната линија не е само финансиски инструмент, туку и практичен поттик за модернизација и зголемување на конкурентноста на домашното земјоделство.
Халкбанк и ЕФСЕ соработуваат долги години, а ова партнерство овозможи континуирано насочување на финансиски средства кон микро, мали и средни претпријатија, со што се поддржа растот на многу бизниси и се даде значаен придонес во економскиот развој на државата. Новата кредитна линија претставува уште еден чекор во таа насока, ставајќи акцент на земјоделството како стратешка гранка со голем потенцијал за одржлив развој.
„Поддршката на земјоделството е од суштинско значење за иднината на економијата и благосостојбата на граѓаните. Со оваа нова кредитна линија, обезбедуваме не само поволни финансиски средства, туку и знаење и грантови кои ќе им помогнат на земјоделците да преминат кон одржливи практики и да ја зголемат својата продуктивност. Веруваме дека вложувањето во земјоделството значи вложување во долгорочна стабилност, храна со повисок квалитет и развој на руралните средини,“ велат од Халкбанк.
Европскиот фонд за Југоисточна Европа (ЕФСЕ) е формиран од страна на Банката за развој KfW, со финансиска поддршка од германското Федерално Министерство за економска
соработка и развој (BMZ) и Европската комисија. Фондот има за цел да го поттикне економскиот развој и благосостојбата во земјите од Југоисточна Европа преку овозможување пристап до финансирање за микро и мали претпријатија и за домаќинства со пониски приходи, со фокус на одржливост и позитивно влијание врз заедниците.
Со оваа програма, Халкбанк ја продолжува својата долгорочна стратегија за поддршка на одржливите иницијативи во економијата, инвестирајќи во иднината на земјоделството и обезбедувајќи подобри услови за оние кои ја движат оваа важна гранка.
ПР