Економија
Технолошко-индустриската зона во Гевгелија прва зелена и здравствена зона во земјата

Технолошко-индустриската зона во Гевгелија ќе стане првата зелена инвестициска зона во земјата што ќе се фокусира на поддршка на зелените индустрии и ќе функционира како јавно-приватно партнерство. Во оваа зона првпат се отвора можност и за инвестиции во здравствениот сектор. ТИРЗ ја изработи во партнерство со меѓународната консултантска компанија „Дилоит“.
„Отвораме можност за прва зелена и здравствена зона во Северна Македонија. Целосно го менуваме концептот на развој. Луѓето и земјата се ограничени ресурси и ќе извадиме најголема добивка за сите граѓани. Со овој нов модел се очекува да се вложат 120 милиони евра во инфраструктурата и развој на зоната во Гевгелија и да се поттикнат инвестиции во обем од 400, како и да се отворат над 3.000 работни места. Со студијата и договорот за јавно-приватно партнерство поставуваме јасни и мерливи цели. Колку државата треба да заработи од еден квадратен метар земја што се дава. Не преку цена на продажба, туку преку реална економија што ќе се случува на тој квадратен метар. Од компании што ќе плаќаат данок на добивка, персонален данок и придонеси за вработените. Моделот предвидува земјиштето да го добие оној што ќе понуди највисоки приходи за државата, за граѓаните. Платите првпат во вакви договори за ЈПП имаат значајна улога. Ова е и тест на новиот концепт на ТИРЗ, кој веќе не се базира на тоа дека Северна Македонија е земја на евтина работна сила, туку инвестициска дестинација за висококвалитетни инвестиции“, порача Јован Деспотовски, директор на ТИРЗ.
Тој додаде и дека зоната во Гевгелија ќе се финансира преку моделот на новиот Зелен стратешки фонд, кој се базира на инвестиции во проекти што генерираат конкретни приходи за ТИРЗ и инвеститорите, а во исто време нема дополнително оптоварување ниту за буџетот ниту за граѓаните.
Зоната во Гевгелија предвидува и можност за развој на здравствена економска зона, која би била прва ваква и во земјата, но и во регионот.
„Идејата за здравствена зона произлезе од анализата и во консултации со Министерството за здравство. Државата ќе поддржи и инвестиции во напредни технологии во здравствениот сектор и здравствени услуги. Клучен аспект е близината на границата со Грција, која е сериозен пазар за овој сектор и отвора можност за значителни приходи и нови високоплатени работни места“, појасни Деспотовски.
Договорот за јавно-приватно партнерство за оваа зона треба да биде реализиран до крајот на 2022 година, а според студијата, развојот ќе оди во три фази. Првата фаза опфаќа можност за наем на 50 хектари земја за кои концесионерот треба да изготви финансиска план, план за изградба, дизајн и одржување на зоната, како и проекција на потенцијалниот приход за државата. Втората фаза на проширување на зоната со дополнителни 70 хектари, ќе зависи од успешната имплементација на првата фаза, односно дали се постигнати цели за приход на државата од квадратен метар.
Студијата за изводливост ќе биде поднесена до Владата по што ќе почне реализација на процесот. Ова е дел од новиот пристап за развој на ТИР-зоните, а зоната во Гевгелија е пилот-модел по кој ќе се развиваат и други вакви индустриски зони во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Светските берзи паднаа поради заканата на Трамп за ЕУ

На светските берзи цените на акциите паднаа минатата недела бидејќи инвеститорите беа загрижени за намалувањето на кредитниот рејтинг на САД, а на пазарите негативно влијаеа и новите закани на Вашингтон за зголемување на царините за увозот од Европската унија.
На Волстрит минатата недела, Dow Jones се лизна за 2,5 отсто, на 41.603 поени, додека S&P 500 падна за 2,6 отсто, на 5.802 поени, а индексот Nasdaq 2,5 отсто, на 18.737 поени.
Од самиот почеток на неделата индексите беа во минус бидејќи агенцијата Мудис го намали кредитниот рејтинг на САД од Ааа на Аа1 поради големиот дефицит на федералниот буџет, високите финансиски трошоци и планираните даночни намалувања.
Јавниот долг на САД е околу 36.200 милијарди долари, а може да се зголеми за уште 3.800 милијарди во следните десет години бидејќи претседателот на САД Доналд Трамп има намера да ги намали даноците. Поради ова, приносите на државните обврзници значително се зголемија, што значи дека владата мора да се задолжува по повисока цена.
Намалувањето на даноците веројатно би ја стимулирало потрошувачката и би го поддржало економскиот раст, но од друга страна, јавниот долг би се зголемил доколку не се намалат државните трошоци. И намалувањето на федералните трошоци, што е еден од приоритетите на Трамп, не оди толку глатко како што најави претседателот. Освен тоа, се чини дека проектот не е доволно добро подготвен.
Сепак, на крајот на неделата, приносите на обврзниците донекаде се стабилизираа, откако Претставничкиот дом на Конгресот тесно го поддржа предлог-законот на Трамп за даночни намалувања, па се уште се чека поддршката од Сенатот.
Но, во петокот, Трамп повторно ги потресе пазарите заканувајќи ѝ се на Европската унија со царини од 50 отсто од 1 јуни, бидејќи не е задоволен од тоа како напредуваат трговските разговори меѓу САД и ЕУ.
И на повеќето европски берзи цените на акциите паднаа минатата недела. Додуша, лондонскиот FTSE индекс зајакна за 0,4 отсто, на 8.717 поени, но франкфуртски DAX се лизна за 0,6 отсто, на 23.629 поени, а париски CAC 1,9 отсто, на 7.734 поени.
Економија
Нова авиолинија од Скопје до Ларнака во Кипар

Од 31 октомври ќе биде пуштена нова авиолинија од Скопје до Ларнака, Кипар, објави вицепремиерот и министер за транспорт Александар Николоски на својот фејсбук профил.
„На пат кон Охрид за одбележувањето на празникот Св. Кирил и Методиј сакам да споделам информација за нова авиолинија Од 31.10.2025 почнува новата авиолинија Скопје – Ларнака Кипар! Ова е 11. нова линија за 10 месеци, а е резултат на политиките на Владата на ВМРО-ДПМНЕ. Субвенциите и политиките на Владата за развој на авиолиниите даваат резултати. Продолжуваме да работиме на развојот на авиосообраќајот во Македонија“ објави вицепремиерот Николоски на социјалните мрежи.
Економија
Дурмиши се сретна со норвешка делегација: Зголемен интерес за норвешки инвестиции во Северна Македонија

Министерот за економија и труд, Бесар Дурмиши, денеска во просториите на Министерството пречека висока делегација од Кралството Норвешка, предводена од амбасадорката Кристин Мелсом, амбасадор на Норвешка за Северна Македонија и Србија, како и претставници на владини институции и познати норвешки компании.
На средбата се разговараше за можностите за проширување на норвешките инвестиции во Северна Македонија, со посебен акцент на Технолошко-индустриската развојна зона Тетово (ТИРЗ Тетово), која е препознаена од норвешката влада како еден од најзначајните инвестициски проекти во регионот.
Министерот Дурмиши истакна дека иако политичките и билатералните односи меѓу двете земји се одлични, економската соработка сè уште не го следи истиот интензитет. Според официјалните податоци, вкупната трговска размена помеѓу Северна Македонија и Норвешка изнесува просечно околу 8 милиони евра годишно – бројка која е релативно ниска во однос на реалниот потенцијал за соработка.
Министерот потсети дека во 2021 година е потпишан Договор за јавно-приватно партнерство со компанијата “Normak Investment Group AD Тетово”. Покрај постоечките инвестиции, како онаа на компанијата LEAR, се најавени и две нови инвестиции, меѓу кои и инвестиција од компанијата “Norsksolar”, која веќе има донесено инвестициска одлука.
Министерот подвлече дека Северна Македонија во моментов привлекува повеќе норвешки инвестиции отколку која било друга земја од Западен Балкан – успех кој ја потврдува довербата и конкурентните предности што ги нуди нашата држава.
Во заклучокот на средбата, министерот уште еднаш го потврди силниот институционален ангажман за подобрување на бизнис-климата, привлекување на странски инвестиции, поддршка на домашните компании и развој на пазарот на трудот, како дел од новите надлежности на Министерството за економија и труд.