Економија
Трамп се закани со данок од 25 проценти за европските автомобили

Американскиот претседател, Доналд Трамп, ја обвини Европската Унија дека го прави „практично невозможно“ американското тргување со нејзините земји членки, при што истакна дека евентуално воведување царини за европски автомобили би можело да ја промени ваквата ситуација во иднина.
„Европската Унија е особено тврда во однос на САД“, рече Трамп на заедничката прес-конференција со шведскиот премиер, Стефан Левен, во Белата куќа.
„Тоа го прави речиси невозможен нашиот бизнис со нив, а тие, сепак, успеваат да ги пласираат своите автомобили во САД“, изјави Трамп, додавајќи: „Ако им воведеме данок од 25 отсто, верувајте ми, тоа нема да го прават уште многу долго“.
Прашан во врска со наводите дека Европската Унија го пратила во САД со цел да го предупреди Трамп да се откаже од плановите за воведување царини на челикот и алуминиумот, Левен рече дека го цени Трамп поради политиките кои одат во корист на неговата земја.
„Како членови на Европската Унија, мислам дека е важно за нас да најдеме начин да работиме заедно“, рече шведскиот премиер.
Овие коментари следуваат откако европските производители предупредија за планот на Трамп за воведување царини при увоз на автомобили.
„Европските производители во САД не сакаат само да извезуваат автомобили… Тие таму имаат големи производни капацитети, обезбедуваат работни места на локално ниво и плаќаат даноци на остварените приходи“, вели Ерик Јонаерт од Асоцијацијата на европските автомобилски производители (ACEA).
„Всушност, најголемите фабрики на некои европски производители не се во ЕУ туку во САД“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.