Економија
Трипуновски: Три години земјоделците од Ѓорче Петров имаат проблем со каналот за наводнување

Дополнителниот заменик-министер за земјоделство, шумарство и водостопанство, Цветан Трипуновски, вчера се сретна со земјоделците од општина Ѓорче Петров, поточно од населените места Волково и Орман, каде ги слушна проблемите на жителите.
„Еден од соговорниците, чичко Ванчо, ми укажа дека има сериозен проблем со каналот за наводнување кој покрива површина од околу 300 хектари и практично значи нивна егзистенција. Јас им ветив дека во текот на денешниот ден ќе направам лично увид во фактичката состојба и она што ми го преточија сакам да го видам на терен. Трета година по ред овие земјоделци коишто одгледуваат житни и раноградинарски култури не можат да го обработуваат земјиштето, бидејќи каналот е нефункционален и практично водата од реката Лепенец не може да оди низ каналот што се користи за наводнување.
Ова е само уште еден доказ дека дополнителниот заменик-министер Цветан Трипуновски не зборува невистини и дека манипулира со јавноста. Ова е демант и за министерот Трајан Димковски, којшто три години заедно со неговиот директор на АД Водостопанство не излегол на терен за да го стави во функција овој канал којшто значи егзистенција за земјоделците во овој регион. Ова е уште еден доказ за манипулацијата што ја прават актуелните министри од СДСМ и нивната некадарност и немањето желба да работат во функција на овие луѓе коишто живеат од оваа гранка.
Јас од тука апелирам, ако имаат доблест, барем наредните месеци нека ги засукаат ракавите и нека го стават каналот во функција, затоа што доаѓа нова производна година каде што овие ниви ќе останат суви и ќе нема производство. Меѓутоа, очигледно е дека доколку сакале, ќе направеле некаква интервенција овие три години.
По 12 април, кога оваа ненародна власт ќе си оди од фотелјите на Илинденска број 2, наредната влада што ќе ја формира ВМРО-ДПМНЕ ќе ги засука ракавите и овој проблем веднаш ќе биде решен.
Исто така, сакам да потенцирам дека нефункционалноста на овој канал нема влијание само на земјоделските површини, од она што го видов идејќи наваму буквално целата вегетација и високите дрва коишто се на потегот на овој канал се исушени, загрозена е целокупната животна средина, односно флората и фауната во овој дел на општина Ѓорче Петров.
Сакам да кажам дека нефункционалноста на терен е очигледна и ова е демант на тоа што значи негрижа на институциите во овој регион на општина Ѓорче Петров, поточно во селото Орман каде што се наоѓаме сега“, порача Трипуновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Халкбанк со нова кредитна линија од 12 милиони евра за одржливо земјоделство

Халкбанк АД Скопје, како една од водечките банки во земјата која постојано се насочува кон поддршка на реалната економија, започнува со реализација на нова кредитна линија наменета за развој на одржливо земјоделство.
Средствата во износ од 12 милиони евра се обезбедени преку Европскиот фонд за Југоисточна Европа (ЕФСЕ) и ќе бидат ставени на располагање на земјоделците и земјоделските бизниси во наредните пет години.
Целта на оваа кредитна линија е да им овозможи на микро (вклучувајќи трговци поединци и индивидуални земјоделци), мали и средни претпријатија пристап до поволни извори на финансирање кои ќе им помогнат да ги реализираат своите планови за работен капитал, како и за инвестиции во опрема, модернизација и развој на одржливи агро-практики.
Кредитите ќе бидат одобрени под атрактивни услови, со варијабилна каматна стапка која започнува од 5,5% и со можност за флексибилна отплата преку месечни, квартални или полугодишни ануитети. Освен финансиската поддршка, програмата предвидува и дополнителни бенефити за земјоделците: организирани работилници и тренинзи преку кои ќе можат да стекнат нови знаења за современи и одржливи земјоделски практики, како и грант компонента до 1.000 евра по корисник, достапна до исцрпување на предвидениот буџет. На тој начин, кредитната линија не е само финансиски инструмент, туку и практичен поттик за модернизација и зголемување на конкурентноста на домашното земјоделство.
Халкбанк и ЕФСЕ соработуваат долги години, а ова партнерство овозможи континуирано насочување на финансиски средства кон микро, мали и средни претпријатија, со што се поддржа растот на многу бизниси и се даде значаен придонес во економскиот развој на државата. Новата кредитна линија претставува уште еден чекор во таа насока, ставајќи акцент на земјоделството како стратешка гранка со голем потенцијал за одржлив развој.
„Поддршката на земјоделството е од суштинско значење за иднината на економијата и благосостојбата на граѓаните. Со оваа нова кредитна линија, обезбедуваме не само поволни финансиски средства, туку и знаење и грантови кои ќе им помогнат на земјоделците да преминат кон одржливи практики и да ја зголемат својата продуктивност. Веруваме дека вложувањето во земјоделството значи вложување во долгорочна стабилност, храна со повисок квалитет и развој на руралните средини,“ велат од Халкбанк.
Европскиот фонд за Југоисточна Европа (ЕФСЕ) е формиран од страна на Банката за развој KfW, со финансиска поддршка од германското Федерално Министерство за економска
соработка и развој (BMZ) и Европската комисија. Фондот има за цел да го поттикне економскиот развој и благосостојбата во земјите од Југоисточна Европа преку овозможување пристап до финансирање за микро и мали претпријатија и за домаќинства со пониски приходи, со фокус на одржливост и позитивно влијание врз заедниците.
Со оваа програма, Халкбанк ја продолжува својата долгорочна стратегија за поддршка на одржливите иницијативи во економијата, инвестирајќи во иднината на земјоделството и обезбедувајќи подобри услови за оние кои ја движат оваа важна гранка.
ПР
Економија
НБРМ: Граѓаните сè почесто ги избираат дигиталните канали за плаќање

Најновите податоци од платежната статистика на Народната банка за вториот квартал од 2025 година покажуваат натамошен раст на електронските плаќања, при што сè поочигледно е дека граѓаните почесто ги избираат мобилните апликации и платежните картички за извршување на плаќањата, отколку шалтерите, соопшти НБРМ.
Во споредба со истиот период минатата година, електронските плаќања со платни налози бележат раст за 9% по број и за 20,9% по вредност. Особено е брз растот на електронски иницираните плаќања преку дигиталните канали, односно трансакциите растат за 18,6%, а вредноста за 28,3%. Најголемиот дел од платежните трансакции иницирани преку дигиталните канали (71,3%) се извршени преку мобилни апликации, што потврдува дека преовладува употребата на мобилниот телефон како најбрз и наједноставен начин на плаќање.
Се зголемува и користењето на платежните картички. Бројот на плаќањата со картички е поголем за 8,4%, а нивната вредност за 11,4%. Зголемувањето најмногу произлегува од зголеменото купување преку интернет (14,8%), но раст има и кај плаќањата во продавниците (7,9%).
Овие податоци, според НБРМ, јасно укажуваат дека сѐ повеќе граѓани се префрлаат на дигиталните начини на плаќање.
Економија
Позначајни движења кај каматните стапки на банките и штедилниците

Годишен раст на просечната каматна стапка на вкупните депозити од 0,23 п.п., при што во август таа изнесува 2,19%.
Просечната каматна стапка на вкупните кредити бележи годишен пад од 0,54 п.п. и изнесува 4,90%.
Најновото соопштение за позначајните движења кај каматните стапки на банките и штедилниците е достапно на следната врска.