Економија
Тутунопроизводителите да си ги проверат сметките, денес исплатени 1,5 милијарда денари за субвенции, порача Николовски

Денеска, на сметките на речиси 14.300 тутунопроизводители се исплатени субвенциите за реколтата од 2023 година во вредност од речиси една и пол милијарда денари. Исплатени се субвенциите за основната мерка од 80 денари и дополнителната мерка за оваа година од дополнителни 20 денари.
„Народски кажано, исплатени се субвенциите за договорен и предаден ориентиран ароматичен тутун, нашето жолто злато. Ова е најголемата исплата и најголема поддршка на тутунопроизводителите досега со рекордна субвенција. Ги повикувам земјоделците да ги проверат сметките и со здравје да си ги трошат парите, кои се чесно заработени, а еве и чесно им се исплатени на сите што ги исполнуваат условите, без никакви притисоци, списоци, партиски поделби, туку чесно и рамноправно со едно решение и една исплата во еден ден за сите тутунопроизводители“, рече министерот за земјоделство, Љупчо Николовски.
Откупени се вкупно 14.763 тони тутун произведен во 2023 година. Министерот Николовски вели дека немало вишоци и немало неоткупен тутун.
„Она што особено ни значи на сите е тоа што заедно со земјоделците оваа година постигнавме највисока откупна цена досега. Тутунот од реколтата 2023 година има рекордна откупна цена од 365 денари за килограм за целокупната количина предаден тутун. Се исплатија субвенциите, кои се зголемени за дополнителни 20 денари за сите три класи. Со тоа зголемување тутунот од прва класа првпат досега достигна вредност на субвенција од 100 денари. До 2017 година субвенцијата беше 60 денари. Најголемата количина откупен тутун и оваа година е од прва класа. Тоа значи дека ако на откупната цена од 365 денари додадеме по 100 денари за килограм од субвенцијата, се достигнува вредност од 465 денари за килограм тутун. Ова се рекордни бројки и треба да бидат рекордни“, нагласи министерот Николовски.
Од тутунот државата годишно остварува девизен прилив од над 120 милиони евра, а овој сектор вработува или ангажира над 20.000 семејства. Првпат оваа година тутунопроизводителите ќе може да пријават површини и да добијат субвенција, освен за килограм, и за површина, а со тоа се стекнуваат и со правото да добијат и зелена нафта, 12.000 денари за хектар.
Директорот на Агенцијата за финансиска поддршка во земјоделството, Никола Бачовски, извести дека од почетокот на годината досега на земјоделците им се исплатени над четири милијарди денари и најави дека нивните служби веќе ги прават потребните административни процедури и системски приспособувања за почеток на новата кампања за поднесување барања за финансиска поддршка за субвенции по програмата за 2024 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“
Економија
Дизелот поевтинува за 2,5 денари

Од ноќеска на полноќ дизелот ќе поевтини за 2,5 денари, додека цените на бензините остануваат исти, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Од 28.6.2025 година од 00:01 часот максималните цени на нафтените деривати ќе изнесуваат:
– Моторен бензин – ЕУРОСУПЕР БС – 95 – 77,50 (денари/литар)
– Моторен бензин – ЕУРОСУПЕР БС – 98 – 79,50 (денари/литар)
– Дизел гориво – ЕУРОДИЗЕЛ БС (Д-Е V) – 70,50 (денари/литар)
– Масло за горење – Екстра лесно 1 (ЕЛ-1) – 72,00 (денари/литар)
– Мазут М-1 НС – 40,188 (денари/килограм)
Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Мазутот М-1 НС, се намалува за 1,499 ден/кг.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Екстра лесното масло за домаќинство на (ЕЛ-1), не се менуваат.
Економија
Во Народната банка се одржа 54. сесија на Клубот на истражувачите

Во Народната банка се одржа 54. сесија на Клубот на истражувачите на која беше претставен научниот труд „Макроекономски, институционални и финансиски детерминанти на дефицитот на тековната сметка во Северна Македонија: Согледувања преку временски серии“ од авторот Бардул Даути.
Сесијата ја отвори директорката на Секторот за монетарна политика, истражување и статистика, Султанија Бојчева-Терзијан, која посочи дека презентираниот труд нуди значајни сознанија за макроекономските и институционалните фактори коишто влијаат на дефицитот на тековната сметка во Република Северна Македонија. Таа нагласи дека надворешната позиција на македонската економија има особено значење, имајќи ја предвид стратегија на фиксен девизен курс, што ја спроведуваме. Во таа насока, одржливата тековна сметка претставува клучен елемент за зачувување на севкупната макроекономска стабилност.
Главниот заклучок на емпириската анализа е дека дефицитот на тековната сметка е резултат на макроекономски фактори – производниот јаз, како индикатор на домашната побарувачка, трговската отвореност и реалниот девизен курс. Дополнително, влијание имаат и фискални и финансиски фактори, како што се јавниот долг и паричната маса (М2), соодветно. Сепак, клучниот придонес на овој труд е вклучувањето на т.н. институционални фактори и оцената на нивното влијание врз билансот на тековната сметка. Студијата покажува дека силните институции – особено поефикасното управување, зголемениот квалитет на јавните услуги и заштитата на економските права, како што е правото на сопственост – можат значително да придонесат за подобрување на тековната сметка на платниот биланс. Овие заклучоци упатуваат дека, институционалните реформи се исто така важен сегмент за зајакнување на надворешната стабилност на економијата.
По презентацијата, следеше дискусија меѓу учесниците и презентерите, поттикната од презентацијата на трудот и од изнесените заклучоци. Следната сесија е планирана за септември годинава.