Економија
Филип Арсов на „Што го врти светот“, први инвеститори во нашата апликација беа пилоти

Објавена е и третата епизода од „Што го врти светот“, овој пат тема е авиоиндустријата. Гостин во поткастот е Филип Арсов, коосновач на Synapsis Aviation, македонска компанија која создаде софтвер за брифирање пилоти и ѝ го продаде на Групацијата Луфтханза, една од најголемите групации на авиопревозници во Европа и светот.
„Најголем дел од идејата дојде од мојот партнер, кој е пилот, неговото име е Кочо Мојсов. Тој во еден момент истакна дека му е чудно дека управува со прекуокеански авион, кој чини речиси 400-500 милиони евра, во една од најголемите авиокомпании во светот, сѐ уште да користи материјали за брифирање кои се со застарена технологија.
По идејата што ја дал капетан Кочо Мојсов, тој и Арсов почнале со создавање на апликацијата. Првите инвеститори што ги донеле и до првите клиенти биле пилоти. Тие верувале во нивната идеја познавајќи го пазарот. Потоа следувала продажба на некои помали авиокомпании, кои биле првите клиенти на компанијата. Сето ова им дало поттик да побараат и државно финансирање. Ги поддржал Фондот за инвоации и развој. На овој начин се финансирала апликацијата, која по завршувањето на ковид-пандемијата е откупена од „Луфтханза“. Според Арсов, важно е да се прават обиди, да се развиваат производи. Тој пред овој продукт имал и други обиди за сопствен производ што ќе го пласира на светскиот пазар. Арсов работи и во областа на веб-дизајн и развој на визуелни решенија, па во поткастот со Јована зборуваат и за тоа на кој начин вештачката интелигенција ќе го смени начинот на кој работиме, реалноста во која живееме, па и безбедноста на авионскиот превоз.
Видете повеќе во третата епизода од „Што го врти светот“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Трет ден хаос со „МојДДВ“, граѓаните револтирани, не можат да скенираат фискални сметки

Апликацијата „МојДДВ“ не функционира веќе трет ден, а револтирани граѓани масовно пријавуваат дека не можат да ги скенираат фискалните сметки и да го остварат своето право на поврат на ДДВ.
Проблемите со апликацијата започнаа уште пред неколку дена, а Управата за јавни приходи (УЈП) вчера официјално потврди дека станува збор за технички проблем и увери дека се работи на негово отстранување.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција“, велат од УЈП.
Од институцијата не прецизираат кога „МојДДВ“ ќе проработи, а засега корисниците се оставени да чекаат, со надеж дека нема да изгубат право на поврат на средства.
Во меѓувреме, на социјалните мрежи се појавуваат реакции од граѓани кои се жалат дека изгубиле време обидувајќи се безуспешно да ја користат апликацијата. Многумина бараат одговорност и транспарентност од институциите, но и посочуваат дека слични прекини во работата на апликацијата се случуваат сè почесто.
Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“