Економија
Фонтаната „Лотос“ – инспирација за визуелниот идентитет на пакетот за млади Halk EZ

Фонтаната Лотос во Градскиот парк во Скопје, која е урбан симбол на дружење, заедништво и солидарност на голем број генерации млади, е главната инспирација за визуелниот идентитет на Halk EZ (Halk Easy), новиот пакет за млади на Халкбанк.
Halk EZ има поинаков концепт односно покрај банкарски услуги, на младите на возраст од 16 до 24 години, ќе им понуди и платформа за едукација, дружење, вмрежување и забава. Токму во таа насока, секоја боја од брендирањето асоцира на предвидените компоненти од пакетот, чија цел е да ги вклучи младите во многу активности кои ќе ги поттикнат нивните квалитети, знаења и вештини.
Брендирањето на Halk EZ се надоврзува на „Трајни културни вредности“, проект на Халкбанк посветен на промоција на вредните културни и уметнички дела од минатото, на што сега се додаде и фонтаната Лотос, која претставува архитектонски симбол на Скопје уште од нејзиното пуштање во употреба во 1971 година.
„Фонтаната Лотос во Градски парк отсекогаш претставувала синоним за социјализација меѓу младите низ многу генерации до денес. Поттикнати од лотусот како мемоар на безброј впишани приказни, овој дизајн се темели токму врз значењето на споменикот. Дизајнот е составен од геометриски форми кои јасно ја претставуваат нејзината градбена структура, а притоа преку стилизација прикажана е во духот на современието. Овој графички приказ е сочинет од богат колорит кој содржи дванаесет бои и секоја од нив е составен дел од севкупната приказна на HALK EZ“, вели Кристијан Јованоски, арт директор во Ефектива, агенцијата која го креираше визуелниот идентите на Halk EZ.
Фонтаната Лотос е дело на архитектката Мирјана Милановиќ-Волињец, се наоѓа на платото на влезот на Градскиот парк од страната на булеварот Илинден, а нејзиното корито има дијаметар од 10 метри. На оваа локација претходно имало мочуриште со бели лотосови цветови од каде се родила идејата за дизајнот на фонтаната.
Пакетот Halk EZ (Halk Easy) е креиран за да одговори на секојдневните потреби на студентите, средношколците, младите претприемачи кои водат брз и динамичен живот и ги користат дигиталните технологии. Тој нуди бесплатно мобилно и електронско банкарство, Visa бесконтактна картичка со која може да се повлекува готовина без надомест на сите банкомати во земјата и во странство, платежна сметка без трошоци за водење, и иновативни услуги како GarminPay, SmartSend, SmartCash.
Сите млади кои ќе станат дел од Halk EZ пакетот најдоцна до 4-ти јули, учествуваат во наградната игра „Со Halk EZ до Exit“ преку која ќе бидат доделени пет ВИП влезници за двајца на еден од најголемите музички фестивали во Европа.
(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Амазон ќе ја плати најголемата трговска казна во историјата

Амазон се согласи да плати 2,5 милијарди долари за да реши тужба од страна на американската федерална влада, која ја обвини дека измамила милиони луѓе да се регистрираат на Prime, а потоа им го отежнала откажувањето.
Според спогодбата објавена од Федералната трговска комисија (FTC), 1,5 милијарди долари ќе им бидат исплатени на клиентите кои биле измамени да ја користат услугата. Тоа е најголемата трговска казна што FTC некогаш ја обезбедила.
Спогодбата беше постигната неколку дена откако започна судењето пред порота во Сиетл. Амазон ниту ги призна ниту ги негираше обвиненијата и не одговори на прашањата на медиумите.
Prime нуди бесплатна достава, стриминг на филмови и други бенефиции. Услугата чини 139 долари годишно (или 14,99 долари месечно) во САД и 95 фунти годишно во Велика Британија, а ја користат стотици милиони луѓе ширум светот.
ФТЦ тврди дека Амазон користел агресивни скокачки прозорци за време на плаќањето за да ги охрабри клиентите да се регистрираат за Prime, честопати без јасно објаснување на условите или опцијата за одбивање на понудата.
Бесплатните едномесечни пробни периоди беа исто така проблематични бидејќи клиентите не беа јасно предупредени дека автоматски ќе им биде наплатено членството по завршувањето на пробниот период.
Економија
Електродистрибуција инвестираше 30 милиони евра во првите шест месеци од годината

Дистрибутивниот систем оператор – Електродистрибуција, својот главен фокус во првите шест месеци од годината го стави на дигиталната трансформација и модернизацијата на дистрибутивната мрежа.
Само во првата половина од 2025 година, компанијата инвестираше 30 милиони евра во проекти на високонапонско, среднонапонско и нисконапонско ниво. Преку овие инвестиции, Електродистрибуција обезбедува соодветен развој на дистрибутивната мрежа и намалување на загубите, следејќи ги потребите на корисниците, обезбедувајќи соодветна техничка и стручна подготвеност, брзо и ефикасно приклучување на новите корисници на мрежа и квалитетна услуга на постојните.
Континуираните инвестиции придонесуваат за намалување на техничките загуби, подигнувајќи го нивото на ефикасност на целиот систем.
Посветеноста на Електродистрибуција во создавањето на модерна и ефикасна дистрибутивна мрежа е од посебна важност. Со тоа се овозможува сигурно и непречено снабдување на корисниците и е темел за идниот економски развој на земјата.
ПР
Економија
Божиновска: Гасна интерконекција со Србија и борба со енергетската сиромаштија – приоритет во соработката со Светска банка

Министерката за енергетика, рударство и минерални суровини, Сања Божиновска, денес оствари работна средба со вишиот специјалист за енергетика при Светска банка, Редон Беголи.
На средбата се разговараше за тековната и идната соработка помеѓу Македонија и Светска банка во областа на енергетиката, со акцент на проекти кои ќе придонесат за зголемување на енергетската безбедност, ефикасност и одржливост.
Во октомври, на Годишното собрание на Светска банка во Вашингтон, државите ќе имаат можност да поднесуваат предлог-проекти за кои се бара финансиска и стратешка поддршка. Македонија ќе аплицира со неколку проекти, но како најзначаен се издвојува проектот за изградба на гасна интерконекција со Република Србија – инфраструктура од големо значење за регионалното поврзување и стабилноста на снабдувањето со енергенси.
Од Министерството посочуваат дека овој проект ќе овозможи диверзификација на изворите и правците на снабдување со природен гас, што е од суштинско значење за економската конкурентност и енергетската независност на земјата.
„Дополнително, Светска банка ќе биде непроценлив партнер и во финализирањето на методологијата за утврдување на енергетската сиромаштија, како и во подготовката на нови програми и политики за унапредување на енергетската ефикасност. Со овие активности ќе се создаде основа за поефикасно насочување на мерките кон најранливите категории граѓани и обезбедување праведна енергетска транзиција“, велат од Министерството.
Министерката Божиновска нагласи дека Владата останува посветена на спроведувањето на реформите во енергетскиот сектор и на зајакнувањето на партнерствата со меѓународните институции. „Со заеднички проекти и координирана поддршка, ќе ја унапредиме енергетската инфраструктура и ќе обезбедиме долгорочна сигурност и стабилност на енергетскиот систем во корист на граѓаните и економијата“, изјави министерката.