Економија
Четири акцелератори ќе обезбедуваат средства и техничка поддршка за старт-ап компании на млади луѓе

Вицепремиерот задолжен за економски прашања, Кочо Анѓушев, и директорот на Фондот за иновации и технолошки развој, Јован Деспотовски, ги промовираа јавните повици за основање деловно-технолошки акцелератори за млади и за технолошки развој на македонските компании.
Како што информираат од неговиот кабинет, на промоцијата Анѓушев истакнал дека овие два инструмента се комплементарни и се надополнување со мерките од Планот за економски раст, а преку нив директно ќе се поддржат старт-ап компаниите и младите луѓе. Вицепремиерот додал и дека на овој јавен повик, за двата инструмента, на компаниите на располагање им се ставени вкупно 3,4 милиони евра.
„Преку овој повик стимулираме создавање бизнис-акцелератори, кои би биле поддршка за старт-ап компаниите. Поддршката е во форма на неповратен грант, кој може да достигне до 500 илјади евра, односно кофинансирање до 75% од вкупното учество на проектот, додека 25% од средствата треба да обезбеди компанијата која аплицира на јавниот повик. Наша намера е да се отворат четири акцелератори, на територијата на цела Република Македонија, кои ќе обезбедуваат средства и техничка поддршка за старт-ап компании на млади луѓе, да ги реализираат своите бизнис-идеи. Со вториот инструмент се поддржува поддршката за пораст на конкурентноста на македонските компании и особено е атрактивна за стопанските компании, бизнис-асоцијации и кластерските здруженија. Преку овој инструмент се обезбедуваат неповратни средства во висина до 500 илјади евра, односно до 50% од инвестициите во технолошки и технички раст и развој на компаниите“, потенцира вицепремиерот.
Директорот на Фондот за иновации и технолошки развој на промоцијата на јавните повици истакнал дека станува збор за два нови финансиски инструменти на Фондот, со кои се проширува понудата на младите луѓе, компаниите и научните институции за стимулирање на иновациите и раст на конкурентноста.
„Со двата нови инструменти целиме да ги поддржиме брзорастечките бизниси и да поттикнеме создавање високо платени работни места од над 30 илјади денари и повеќе. Преку овие два инструмента, користејќи ги меѓународните искуства, на младите им даваме можности кои ги имаат и во другите поразвиени земји. Со грантот од 3,4 милиони евра, очекуваме да се генерираат вкупни инвестиции до 5,5-6 милиони евра во наредните 2-3 години. Дури 80% од грантот кој ќе биде доделен за основање на акцелераторите, ќе биде наменет за директна финансиска поддршка за старт-ап компаниите. Преку акцелераторите младите луѓе ќе може да обезбедат средства и за почетни инвестиции, но и за инвестиции во натамошните фази на развој“, истакна Деспотовски.
Јавниот повик се спроведува преку Фондот за иновации и технолошки развој, средствата се обезбедени во соработка со Светска банка, а ќе биде отворен во наредните 2 месеци, поконкретно до 27 јули 2018 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски порача дека невработеноста паѓа, а економијата оди напред

Премиерот Христијан Мицкоски денеска преку објава на „Фејсбук“ порача дека најновите податоци ја потврдуваат економската стабилизација и растот кој, според него, е резултат на одговорни владини политики.
„Ја стабилизираме економијата, создаваме услови за економија која оди напред, граѓаните имаат повеќе работа, а трговската размена е во пораст“, напиша Мицкоски.
Тој посочи дека стапката на невработеност е намалена на 11,5 проценти, што претставува пад од еден процент во однос на истиот квартал минатата година.
„Во споредба со вториот квартал од 2024 година, денес имаме околу 10.000 нови вработени и над 7.000 помалку невработени. Тоа се илјадници семејства со поголема сигурност и иднина“, нагласи премиерот.
Мицкоски се осврна и на трговската размена, посочувајќи дека во јули извозот пораснал за 4,69 проценти, а увозот за 4,35 проценти.
„Во периодот јануари–јули, извозот е зголемен за 5,41 проценти, а увозот за 4,83 проценти. Вкупната трговска размена во првите седум месеци е поголема за 5,07 проценти во однос на истиот период лани“, додаде тој.
„Ова се реални резултати од одговорни политики. Додека опозицијата шири црнила и се надева на неуспех, ние испорачуваме резултати. Додека тие блокираат и кочат, ние градиме и носиме подобар стандард за секое семејство. Македонија оди напред, со повеќе работни места, посилен извоз и стабилна економија. Ова е времето на работа, резултати и развој“, порача премиерот во својата објава.
Економија
Стојаноски: Економијата се буди, граѓаните наскоро ќе почувствуваат подобар живот

Во рамки на новото издание на емисијата „Ставот на регионот“ гостуваше пратеникот од ВМРО-ДПМНЕ, Бојан Стојаноски, кој говореше за состојбата на македонската економија и најави подобрувања што, според него, ќе донесат повисок стандард за граѓаните.
„Три квартали по ред имаме раст на БДП од над 3%. Индустриското производство од месец јули, споредено со јуни претходната година, е зголемено за 4,1%, а преработувачката индустрија бележи раст од 7%. Дополнително, забележуваме и поголем број туристи кои доаѓаат во државата“, изјави Стојаноски.
Тој нагласи дека Македонија гради темели на нова економска филозофија, чија цел е повисок стандард, подобри плати и пензии и поквалитетен живот за сите граѓани.
„Овие показатели укажуваат дека македонската економија полека заздравува. А кога ќе влеземе во полн ек на реализација на капиталните инвестиции и ќе го развиеме градежништвото, како клучна гранка, ќе имаме уште повеќе можности да помагаме и со дополнителни мерки“, додаде Стојаноски.
Економија
Николоски: Голем раст на градежништвото и транспортот

Бруто домашниот производ порасна за 3.4% во април, мај и јуни. Особено ми е драго што секторите градежништвото, транспорт и складирање силно растат! Тие се двигатели на македонската економија! Во вториот квартал секторот градежништво порасна за 7.3%, објави вицепремиерот и министер за транспорт Александар Николоски на својот фејсбук профил.
„Голем раст на градежништвото, транспортот и складирањето.
Премиерот Христијан Мицкоски објави одлични вести за македонската економија – во месеците април, мај и јуни бруто домашниот производ порасна за 3.4% . Особено ми е драго што секторите градежништвото, транспорт и складирање силно растат! Тие се двигатели на македонската економија!
Во вториот квартал секторот градежништво порасна за 7.3%, уште посилен раст од тој во првиот квартал од 7.1%, додека секторот транспорт и складирање порасна за 6.0% .
Со засилената активност во делот на изградба на патишта, инвестиции во железници и проекти од локално значење растот во третиот квартал ќе биде уште посилен благодарение на вредните работници кои работат во секакви временски услови и јасните политики и стратегија на Владата и Министерството за транспорт.
Ја градиме Македонија“, напиша вицепремиерот Николоски.