Економија
Четири компании со иновации изјавиле дека се поврзани со функционери

Четири од вкупно 77 компании добитници на грантови за иновации изјавиле дека во сопственичката структура имаат лице носител на јавна функција или член на неговото потесно семејство. Две од изјавите се однесуваат на поврзаност со лица од претходната влада, една е поврзана со сегашниот министер за култура и една со советничката на премиерот, Цветанка Ласкова.
„’Микросам Прилеп“ АД е поврзана со Веле Самак, акционер, министер без ресор, задолжен за странски инвестиции во владата на Република Македонија, функцијата ја извршувал заклучно со 30.5.2017 година. ‘Контура’ ДОО Скопје со Елена Донева, сопственик, член на потесно семејство на Јован Донев, поранешен амбасадор во МНР на Република Македонија, функцијата ја извршувал заклучно со 28.2.2017 година. ‘Т-сенс консалтинг“ ДОО Скопје со Мерита Адеми, малцински содружник, член на потесното семејство на Асаф Адеми, министер за култура во Владата на Република Македонија од 1.6.2018 година. Од страна на компанијата до Фондот е доставено и известување за извршена промена на сопственичката структура, односно бришење на лицето Мерита Адеми од таму. Како дополнение на изјавата, во посебен документ, лицето Христина Керкез, еден од сопствениците на ‘Декодикс“ ДОО експорт-импорт Скопје, декларира поврзаност како член на потесното семејство на Цветанка Ласкова, посебен советник во канцеларијата на претседател на Владата на Република Македонија, иако посочената советничка не е носител на јавна функција“, извести Фондот за иновации и технолошки развој.
Две од команиите добитници на грантови, „ДОО Гинис 3Д Прилеп“ и „Каст инвест“ ДОО Скопје се откажаа и ги повлекоа своите инвестициски проекти. Во сопственичката структура на „Гинис“ се јавува пратеникот од СДСМ, Хари Локвенец, а во сопственичката структура на „Каст иневст“ се јавува вицепремерот за економски прашања, Кочо Анѓушев.
Инвестициските проекти на четирите компании кои изјавиле дека се поврзани со функционери ќе бидат повторно доставени на разгледување до Комитетот за одобрување инвестиции според критериумите за селекција и во согласност со правилниците на повикот.
Со компаниите што немаат носител на јавна функција, директорот на Фондот, Јован Деспотовски, за „Макфакс“ изјави дека очекува договорите да бидат подготвени и потпишани до крајот на август.
Исплатата на првата рата ќе биде веднаш по потпишувањето и кога ќе се достави доказ дека компаниите ги уплатиле своите средства за инвестицијата. Следните исплати од Фондот ќе се реализираат квартално, односно кога ќе се изврши контрола и ќе се утврди дека средствата се искористени наменски и во согласност со инвестицискиот план.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
МЗШВ: Во четвртиот квартал од 2025 година ќе биде објавен јавниот повик за претприемачите во прехранбената индустрија

Министерството за земјоделство, шумарство и водостопанство ја информира јавноста дека во четвртиот квартал од оваа година ќе биде објавен Јавниот повик 02/2025 за користење на средства од ИПАРД Програмата 2021-2027, мерка 3 – „Инвестиции во основни средства за преработка и маркетинг на земјоделски и рибни производи”.
Оваа мерка претставува исклучителна можност за македонските претприемачи во прехранбената индустрија да ги унапредат своите капацитети и да станат поконкурентни на домашниот и меѓународниот пазар.
Мерката 3 – „Инвестиции во основни средства за преработка и маркетинг на земјоделски и рибни производи”од ИПАРД Програмата овозможува финансиска поддршка за модернизација на преработувачките капацитети, инвестиции за преработка и маркетинг на земјоделски и рибни производи, како и усогласување со европските стандарди. Преку оваа мерка се поддржува зголемувањето на конкурентноста на земјоделското производство и земјоделско-прехранбениот сектор во целина.
Средствата за оваа мерка се обезбедени преку Инструментот за претпристапна помош за рурален развој на Европската Унија (ИПАРД Програмата за периодот 2021 – 2027 година).
Министерството ги повикува сите заинтересирани да започнат со навремена подготовка на потребната документација и да ги следат официјалните објави на Агенцијата за финансиска поддршка во земјоделството и руралниот развој.
Економија
Издадени првите лиценци за батериски систем за складирање на електрична енергија од обновливи извори

Регулаторната комисија за енергетика, водни услуги и услуги за управување со комунален отпад (РКЕ) ги издаде првите лиценци за батериски систем за складирање на електрична енергија од обновливи извори на компанијата ЕНЕРГО СОЛАР СИСТЕМИ.
Станува збор за два батериски системи со вкупна инсталирана моќност од 2 600 kW, што се инсталирани во склоп на две различни фотонапонски електроцентрали кои се веќе изградени и во функција.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава. Во РКЕ очекуваме голем број сопственици на ФЕЦ да поднесат барање за инсталирање на “сториџи“, но исто така очекуваме интерес да појават и компании кои би биле самостојни оператори на складишта само со батериски системи. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар. Истите можат да даваат услуги на операторот на електропреносниот систем за балансирање на истиот, како и одржување на одредени параметри на мрежата во пропишани граници. Складирањето на енергија во периоди кога има вишок и нејзино користење во периоди кога потребите од електричната енергија се зголемуваат се очекува дека ќе влијае и врз намалување на вкупните трошоци во системот.“ посочи Марко Бислимоски, претседател на РКЕ.
Условите, постапката и потребната документација за добивање на лиценца за складирање на електрична енергија се уредена во Законот за енергетика и Правилникот за лиценци, .
Економија
Владата усвои измени: Се укинува ослободувањето од ДДВ за онлајн пратки во вредност до 22 евра

Со цел зајакнување на домашната економија, поддршка на локалните компании и создавање нови работни места, Владата усвои измени и дополнувања на Законот за данок на додадена вредност, со кои се укинува ослободувањето од ДДВ за онлајн пратки во вредност до 22 евра. Законските измени веќе се во собраниска процедура, а нивното спроведување се очекува да има директни позитивни ефекти врз економијата и работењето на домашните компании.
Со оваа мерка, околу 4 милиони денари месечно, колку што во одредени периоди изнесува прометот кон странските онлајн платформи, ќе се пренасочат кон домашното стопанство. Овие средства ќе придонесат за развој на локалните компании, отворање нови работни места и исплата на повисоки плати на вработените.
Ова претставува значаен чекор во заштита и поддршка на домашната економија, особено во услови на зголемена глобализација и дигитална трговија.
Дополнително, измените ќе помогнат во намалување на сивата економија, имајќи предвид дека досегашниот систем овозможуваше злоупотреби – односно увоз на стоки ослободени од данок кои понатаму се продаваат на домашниот пазар.
Со оваа измена, државата испраќа јасен сигнал на поддршка за домашните компании кои создаваат додадена вредност и вработуваат граѓани во земјата, велат од Министерството за финансии.