Економија
Шпаркасе Банка АД Скопје потпиша договор за долгорочна соработка со Банка Економике

На 13.07.2022г, Шпаркасе Банка АД Скопје потпиша договор за долгорочна соработка со Банка Економике, по што следуваше официјален бизнис настан за корпоративни клиенти во Хотел Хилтон, на кој присуствуваа високи претставници од двете банки и бизнис заедницата.
Од овој договор за продлабочување на соработката ќе произлезат бенефити за двете банки, но исто така и бројни поволности за клиентите кои покрај тоа што ќе можат да ги продлабочат меѓусебните соработки, ќе можат да користат и повластени цени за производите и услугите што ги нудат банките.
Република Косово е важен трговски партнер на земјава, и е на 10. место на листата на земји со кои Р. Северна Македонија остварува најголем обем на трговска размена. Шпаркасе Банка АД Скопје, активно соработува со над 80 корпоративни клиенти кои имаат бизнис релации со косовски партнери. Обемот на вкупни плаќања кон косовските компании во првата половина на 2022 година е на ниво од 18 М ЕУР, додека косовските компании платиле кон близу 300 македонски партнери вкупен износ од 30 М ЕУР.
На бизнис настанот свое обраќање пред партнерите и бизнис заедницата имаше г-ѓа Нина Неданоска, заменик претседател на Управниот одбор на Шпаркасе Банка АД Скопје:
„Соработката на Шпаркасе Банка со Банка Економике започна во 2016 година во делот на девизен пазар и пазарот на пари и на обострано задоволство досега бележи континуиран прогрес. Шпаркасе Банка на Банка Економике ѝ овозможува пристап до автоматизирано и ценовно конкурентно тргување на девизниот пазар. Во делот на пазарот на пари, обезбедена е можност на Банка Економике за пристап до меѓународниот пазар на пари преку користењето на мрежата на корeспондентски банки на Ерсте и Штаермеркише Шпаркасе Групацијата. Во 2021 отпочнавме меѓусебни активности за проширување на соработката во уште неколку дополнителни дела: обезбедување на можност за Банка Економике за тргување со хартии од вредност на меѓународните берзи, откуп на готовина и тргување со државни обврзници на Пазари преку шалтер. Во иднина остануваме посветени на поддршка и градење на долгорочни партнерства со бизнис партнери од Косово и унапредување на бизнис релациите, а овој настан е одлична можност за запознавање и заедничка соработка на потенцијалните бизнис партнери од двете земји.“ – изјави таа.
Пред присутните гости свое обраќање имаше и главниот извршен директор на Банка Економика, г. Шпенд Лужа:
„Фокусирајќи се на проширувањето на соработката меѓу бизнисите од двете земји, имавме задоволство да го потпишеме договорот за продлабочување на соработката помеѓу нашите две банки, Банка Економике и Шпаркасе. Основната цел на оваа соработка е да понуди конкурентни производи и услуги каде главни корисници ќе бидат клиентите на нашите две земји. Меѓу другото, делокругот на нашата соработка вклучува банкарски трансакции со повластени провизии помеѓу клиентите на двете банки, користење на мрежата на банкомати на двете банки, користење на ПОС мрежата на Шпаркасе Банка за клиентите на Банка Економике, како и тргување со хартии од вредност помеѓу нашите бизнис клиенти.“ – изјави тој.
Банка Економике беше лиценцирана во 2001 година кога почна да работи како единствена банка со 100 отсто локален капитал и на тој начин постави пример дека финансиска институција основана во Косово може да испорачува финансиски услуги на едно повисоко ниво. Денес, две децении подоцна, во многу области Банката надмина многу од поставените цели. Со над 100.000 клиенти, мрежа од 29 експозитури и 52 банкомати, Банка Економикe има значајна улога во косовскиот финансиски сектор.
ПР-текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Бојкот на американски производи во Европа поради политиките на Трамп

Движења за бојкот на американските производи добиваат поддршка во Европа како реакција на промените во американската политика, особено во однос на воведените царини за европските производи и политиката кон руската агресија во Украина.
Во Шведска, оваа иницијатива доби посебен замав преку социјалните мрежи. На Фејсбук се формирани групите „Boykot varer fra USA“ со 67.000 членови и „Bojkotta varor från USA“, која брои над 70.000 корисници. Членовите на овие групи повикуваат на бојкот на американските брендови како „Мекдоналдс“, „Кока-Кола“, „Најк“, „Левис“, „Нетфликс“, „Гугл“ и „Ербнб“.
Јаник Кохинур, основачка на групата „Бојкотирам американска стока“, изјави дека овој чекор го презела бидејќи не можела директно да влијае на американските политики, но смета дека со економски притисок може да се испрати силна порака.
„Тешко е, бидејќи речиси сè е под влијание на Америка. Би требало да се бојкотира огромен број производи“, коментира еден од членовите на групата. Друг корисник нагласува дека луѓето при купување ретко размислуваат за потеклото на производите, што го прави бојкотот сложен.
Кохинур, сепак, беше критикувана бидејќи групата ја основала на платформата Фејсбук, која е во сопственост на американскиот технолошки гигант „Мета“. Таа одговори дека во моментов нема подобра алтернатива, но изрази надеж дека ќе се појават нови платформи што ќе им овозможат на активистите поголема независност.
Економија
Трипуновски: Нема да дозволам фантом земјоделци да профитираат

Земјишната политика е основен фактор за враќањето на производството во земјоделскиот сектор и враќање на производствените капацитети на нивото каде што некогаш биле, изјави министерот за земјоделство, шумарство и водостопанство, Цветан Трипуновски, во гостување во емисијата „Аграр“.
Трипуновски истакна дека неговата прва задача во функцијата е да направи ревизија на земјоделското земјиште кое било поделено во претходните години. Целта е да се провери дали земјиштето во државна сопственост се користи согласно со договореното.
„Нашиот фокус е да ги контролираме големите корисници, особено оние правни субјекти кои добиле големи површини земја, а кои можеби не ги исполнуваат обврските. До сега имаше два такви случаи каде земјиштето се користело бесправно, а истовремено биле искористени и државни субвенции“, објасни Трипуновски.
Контролите, како што најави, ќе продолжат и во иднина, а целта е да се ослободи земјиштето и да се додели на вистинските земјоделци кои ќе ја користат земјата со цел да ја подобрат производството.
„Не ќе дозволиме фантоми земјоделци да профитираат на сметка на државата“, нагласи министерот.
Во однос на јавните повици, Трипуновски информираше дека лани завршија јавни повици за распределба на земјиште кои беа објавени за време на техничката Влада. Со овие повици се потпишани 967 договори. Во текот на новогодишните празници беа објавени и нови повици кои беа барање на земјоделците, а тие завршија со пристигнување на над 2.000 апликации.
„Нашата следна фаза ќе биде оглас за распределба на земјиште, со точно дефинирани парцели. Планираме да се поделат парцели не помали од 10 хектари, бидејќи сакаме да ги охрабриме земјоделците да размислуваат за окрупнување на земјиштето“, изјави Трипуновски.
Економија
Орбан се договорил со Трамп? Унгарија може ќе се спаси од американските царини

Унгарија и САД се во процес на договарање на економски пакет што треба да ѝ помогне на унгарската економија и да ги ублажи последиците од евентуалните американски царини за производите од Европската Унија. Ова го изјави унгарскиот премиер Виктор Орбан, нагласувајќи дека договорот ќе ја зајакне економската стабилност на земјата.
Орбан, кој важи за долгогодишен сојузник на американскиот претседател Доналд Трамп, посочи дека ваквата соработка ќе придонесе за дополнително продлабочување на политичкото партнерство меѓу двете земји. Според него, договорот ќе ѝ овозможи на Унгарија да ги минимизира штетите од евентуален трговски судир меѓу Вашингтон и Брисел.
„Секое членство во Европската Унија подразбира одредени економски последици, а во случај на американски царини, Унгарија ќе биде погодена како и сите останати земји. Засега не можеме со сигурност да кажеме колкави ќе бидат загубите, но е јасно дека нема да можеме да ги избегнеме“, изјави Орбан на годишната конференција на унгарската трговска и индустриска комора.
Според унгарскиот премиер, Владата веќе работи на постигнување на билатерален договор со САД кој би ја заштитил економијата. Во тек се и преговори за обновување на даночниот договор, кој беше укинат за време на претходната американска администрација.
„Одредени елементи од новиот договор ќе ни овозможат да ги ублажиме економските загуби и да осигуриме финансиска стабилност преку конкретни мерки“, додаде Орбан.
Иако трговската размена меѓу Централна и Источна Европа и САД е релативно мала, Будимпешта сака да осигура дека Унгарија ќе биде во најдобра можна позиција во случај на економски потреси.