Економија
Јапонското Министерство за економија и ТИРЗ со заеднички иницијативи за засилена економска соработка

Директорот на ТИРЗ, Јован Деспотовски, оствари средба со помошник-министерот за економија на Јапонија и генерален директор на Директоратот за трговски политики, Матсуо Такехико. И двајцата ја нагласија важноста од засилена економска соработка меѓу Јапонија и Северна Македонија, особено во пресрет на глобалните политички и економски предизвици, а се разговараше и за конкретни иницијативи за соработка.
„Јапонија има огромен економски и инвестициски потенцијал и може да стане важен партнер за забрзан раст на Северна Македонија. Разговаравме за конкретни програми, кои ги нуди Министерството за поддршка на инвестиции на јапонски компании во странство, како и програми за обука на наши менаџери, преку која веќе поминаа над 200 менаџери на македонски мали и средни компании. Тоа е потенцијал што треба да се искористи“, нагласи Деспотовски.
Јапонскиот помошник-министер за економија нагласи дека е многу значајно зајакнување на економската соработка меѓу земји што делат заеднички вредности како Северна Македонија и посочи дека земјата нуди атрактивни елементи за јапонските инвеститори, особено за компаниите што работат во делот на ИТ и напредните технологии.
Директорот на ТИРЗ упати и посебна покана до јапонскиот министер за економија да дојде во официјална посета на земјата в година во рамките на активностите за одбележување на 30-годишнината од воспоставувањето на дипломатските односи меѓу двете земји.
Деспотовски претходно имаше средби со првите луѓе на јапонската Агенција за развојна соработка, јапонската Асоцијација на производители на автомобилски компонети, Јапонската стопанска комора, како и Јапонската асоцијација на нова економија, од кои произлегоа и конкретни планови за економска соработка и поттикнување јапонски компании да инвестираат во Северна Македонија.
„Целта е да ги презентираме нашата земја и можностите за инвестиции пред повеќе јапонски компании и институции. Првичните разговори се охрабрувачки и веќе се отвораат можности за соработка на повеќе нивоа“, вели Деспотовски.
Тој е во неколкудневна посета на Јапонија организирана во соработка со јапонската амбасада во Македонија. Целта е презентација на инвестициските можности во нашата земја, а предвидени се средби со неколку јапонски комори, бизнис-асоцијации, компании и државни институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Трет ден хаос со „МојДДВ“, граѓаните револтирани, не можат да скенираат фискални сметки

Апликацијата „МојДДВ“ не функционира веќе трет ден, а револтирани граѓани масовно пријавуваат дека не можат да ги скенираат фискалните сметки и да го остварат своето право на поврат на ДДВ.
Проблемите со апликацијата започнаа уште пред неколку дена, а Управата за јавни приходи (УЈП) вчера официјално потврди дека станува збор за технички проблем и увери дека се работи на негово отстранување.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција“, велат од УЈП.
Од институцијата не прецизираат кога „МојДДВ“ ќе проработи, а засега корисниците се оставени да чекаат, со надеж дека нема да изгубат право на поврат на средства.
Во меѓувреме, на социјалните мрежи се појавуваат реакции од граѓани кои се жалат дека изгубиле време обидувајќи се безуспешно да ја користат апликацијата. Многумина бараат одговорност и транспарентност од институциите, но и посочуваат дека слични прекини во работата на апликацијата се случуваат сè почесто.
Економија
Скенирањето сметки на апликацијата „МојДДВ“ е со прекини, УЈП извести за технички проблеми

Управата за јавни приходи извести дека мобилната апликација „МојДДВ“ во моментов работи со прекини. Тимот на УЈП интензивно работи на отстранување на проблемот, со цел апликацијата да биде целосно функционална.
„Ги информираме корисниците дека, согласно член 6 од Законот за враќање на дел од износот на ДДВ на физичките лица, фискалните сметки можат да се скенираат во рок од 10 дена од датумот на нивното издавање. Тоа значи дека сите сметки, кои се во рамки на овој рок, ќе можат да бидат скенирани веднаш штом апликацијата повторно биде ставена во функција. Ги молиме сите корисници за трпеливост и разбирање. Тимот на Управата за јавни приходи е целосно ангажиран и работи на надминување на техничките пречки“, соопшти Управата за јавни приходи.
Од таму не откриваат за какви технички проблеми се работи, ниту пак кога очекуваат да бидат надминати.
Економија
Мицкоски најави нова инвестиција во Штип

Претседателот на Владата на Република Северна Македонија, Христијан Мицкоски денес одговарајќи на новинарско прашање во однос на најавата на директорот на Технолошко-индустриските развојни зони за 4 нови странски инвестиции, изјави:
„Во текот на вчерашниот ден, во разговор со директорот, имаме добра вест, нова инвестиција, потврдена во индустриската зона во Штип. Фабрика којашто ќе вработи до 150 луѓе. Фабрика којашто ќе инвестира некаде околу 35 милиони евра. Којашто во својот пик за три години од денес ќе извезува 300 милиони евра коишто ќе влезат во Бруто домашниот производ и ќе произведува батерии и тоа е добро. И тоа е добро, а за сите овие други, да имаме и потврди и полека ќе ги објавуваме. Ова е веќе договорено со инвеститорот и заради тоа го кажав, инаку фабриката е од земја од Европска Унија, да немаме дилема.“