Министерството за енергетика, рударство и минерални суровини објави јавен оглас за финансиска поддршка за потрошена електрична енергија за 2025 година наменета за лица што спаѓаат во категоријата ранливи потрошувачи на енергија. Оваа мерка е дел од Програмата за заштита на ранливите потрошувачи на енергија за 2025 година („Службен весник на Република Северна Македонија“ бр. 34/25), со цел да се обезбеди директна поддршка за граѓаните на кои им е најпотребна.

Кој има право на финансиска поддршка? Финансиската поддршка е наменета за следните категории граѓани:

· Домаќинства со едно или повеќе деца со попреченост, корисници на посебен додаток во согласност со Законот за заштитата на децата, чиј вкупен нето-доход во 2024 година на месечно ниво не го надминувал износот од:

– 42.000 денари за домаќинство со два члена,

– 60.000 денари за домаќинство со три члена,

– 80.000 денари за домаќинство со четири и повеќе члена.

· Згрижувачи што згрижуваат едно или повеќе лица во своето семејство и се корисници на надоместок за згрижување во согласност со Законот за социјалната заштита, при што нивниот вкупен нето-доход на месечно ниво не го надминува предвидениот праг според бројот на членови во домаќинството (од 42.000 до 160.000 денари).

Министерството доделува финансиска поддршка преку намалување на месечната сметка за потрошена електрична енергија во износ од 1.000 денари месечно, сметано од денот на поднесувањето на барањето. Поддршката ќе се доделува во текот на 12 месеци или до исцрпување на предвидените средства во согласност со Програмата.

Лицата што веќе користат гарантирана минимална помош и добиваат паричен додаток за енергенси во согласност со Законот за социјалната заштита, како и старите лица што користат финансиска поддршка во согласност со Законот за социјалната сигурност на старите лица, не се опфатени со оваа мерка.

Процедура за аплицирање, рокот за поднесување на барањата, изнесува 30 дена од денот на објавувањето на јавниот оглас. Заинтересираните лица треба да поднесат пополнет образец за барање (образец 1 или образец 2, во зависност од категоријата) достапен во архивата на Министерството или на официјалната веб-страница: https://www.ea.gov.mk/

Со барањето е потребно да се достават следните документи:

1. Изјава заверена на нотар за точност на приложената документација;

2. Фотокопија од решение за стекнато право на посебен додаток или надоместок за згрижување;

3. Фотокопија од последната сметка за потрошена електрична енергија;

4. Фотокопија од лична карта на барателот;

5. Доказ за членовите на домаќинството.

Министерството ги повикува сите граѓани што ги исполнуваат условите да аплицираат навремено и да ја искористат оваа можност за намалување на трошоците за електрична енергија.

За повеќе информации, посетете ја веб-страницата на Министерството: www.ea.gov.mk или контактирајте нѐ на [email protected] за прашања во врска со јавниот оглас.