Економија
Економски карван тргнува од Скопје
Карван од еминентни економски експерти ќе тргне од Скопје, на својот пат низ 8 градови низ Европа. Генералната тема на целиот настан на овогодишното Free Market Road Show® е “Финансиска криза: неуспех на државата – неуспех на пазарот”
Free Market Road Show® претставува динамична серија на конференции на високо ниво каде бизнис-лидери, универзитетски професори, политичари, економисти и новинари патуваат низ повеќе европски градови во кои, заедно со локални партнери и колеги, се организираат платформи за дискусија по прашања поврзани со глобалните случувања на економски план. Годинава, карванот ќе помине низ Скопје, Загреб, Подгорица, Виена, Братислава, Вадуц (Лихтенштајн), Париз и Лондон, почнувајќи од 11-ти до 20-ти мај. Тема на конференцијата ќе бидат актуелните настани во светот, глобалната финансиска криза и светската рецесија. На светско ниво, големата неизвесност и зголемената аверзија кон преземање на ризик која ја носат тековните случувања ја испитува издржливоста на финансиските пазари и способноста да се справи со нарушената состојба. Различното искуство на домашните и експертите од различни земји за справување со светската рецесија ќе биде значаен придонес за насоките за развој и на македонската економија. Оваа меѓународна конференција ќе демонстрира подготвеност на Република Македонија за справување со кризата и проблемите кои се јавуваат на пазарот. Дискусиите ќе придонесат за креирање нови идеи, решенија и опции за имплементација на реформи во економската сфера.Конференцијата вклучува еминентни личности од повеќе сфери, при што, покрај гостите од Европа и САД, ќе бидат вклучени и партнерите од други земји, од приватниот сектор и граѓанското општество, како и академски центри и владини претставници. Free Market Road Show® оваа година ќе се одвива под генерално покровителство на Мајкл Шпинделегер, Федерален министер за Европски и меѓународни односи на Австрија. Поддржувачи на Free Market Road Show® се и Европската комисија, преку Комесарот за конкурентност, Нели Крос, потоа, весникот Волстрит журнал, Европскиот центар за економски развој, Австрискиот центар за економија, Образовната иницијатива за Централна и Југоисточна Европа, Европската асоцијација на даночните обврзници и уште многу други локални партнери, универзитети и тинк-тенкови.Free Market Road Show® е конференција од светски рамки, која се одржува на годишно ниво веќе втора година. Институтот ОХРИД го препозна значењето и потребата за вклучување на Република Македонија во овој значаен настан, па предложи, годинава, карванот да тргне од Скопје.Free Market Road Show® за прв пат беше лансирано во мај минатата година, кога ги посети Виена, Порторож, Берлин, Прага и Брисел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.