Економија
Увезеното замрзнато свинско месо проблем за македонските фармери

Министерот за земјоделство Љупчо Димовски денеска оствари средба со производителите на свинско месо во Македонија кои му ги кажаа проблемите со кои што се соочуваат
Како главен проблем производителите го потенцираа увезеното замрзнато свинско месо наменето за индустријата, кое од почетокот на годинава се продава во трговската мрежа.Фармерите велат дека ваквото месо ја загрозува финансиската состојба на повеќе од 130-те фармери во Македонија, затоа што се продава по многу пониска цена од домашното свежо месо.„Министерството во наредниве неколку дена ќе ги ангажира инспекциските служби да извршат контрола и да констатираат од каде замрзнатото месо наменето за преработувачката индустрија се најде во малопродажбата. Тоа месо е исправно, но е увезено специјално за индустриска преработка, а не за продажба“, рече министерот Димовски.„Ние не се сомневаме во квалитетот на месото, но надлежните институции треба да потврдат дали увезеното замрзнато месо се одмрзнува и се продава како свежо, рече претседателот на Асоцијацијата на земјоделци во Македонија Ефтим Шаклевски.Сопствениците на свињарските фарми побараа министерството да се заложи за решавање на проблемот околу извозот на свинското месо во соседните земји кои од неодамна воведоа заштитни мерки за да си го заштитат сопственото производство.Фармерите му се пожалија на Димовски дека нема каде да ги исфрлаат фекалните води од нивните фарми и побараа да им се додели државно земјиште за изградба на соодветни објекти кои нема да ја загадуваат животната средина, а се пожалија и поради недостаток на ветеринарни станици.Сопствениците на свињарските фарми денеска беа информирани и за условите за добивање финансиски средства од ИПАРД програмата, наменети за зголемување на бројот на свињите во фармите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Мицкоски: Трговијата во индустријата е зголемена за 13-14 отсто во јули, споредено со истиот месец лани

Премиерот Христијан Мицкоски денеска одговарајќи на новинарско прашање во однос на тоа дека економијата се опоравува и какви се макроекономските показатели во индустријата, изјави:
„Државниот завод за статистика објави параметар вчера, во којшто вели дека трговијата во индустријата е зголемена за 13-14% во јули, споредено со истиот месец претходната година. И тоа е тренд кој што нѐ следи цела година, но она кое што за мене е забележливо, е фактот што таа трговија во индустријата, во делот на размена со странство е дури и повеќе зголемена, отколку трговијата во индустријата дома.
Кога зборувам повеќе надвор, зборувам за повеќе од 15% и тоа е единствен резултат во Европа каде што имаме толку силна, зголемена трговија во индустријата. И тоа е добар показател, бидејќи јули е првиот месец од третиот квартал. Во првиот квартал имавме 3,2% раст на БДП, во вториот квартал 3,4 иако номиналниот е 7,8. Очекувам во третиот и четвртиот квартал тој раст да продолжи до крајот на годината. Така што ова се сѐ индикатори коишто ние со години наназад, не сме биле ни блиску да ги постигнеме, а камо ли пак да ги коментираме.“
Економија
Дурмиши на „Бизнис Лидер“: Владата и стопанството се партнери во градење на модерна и одржлива економија

Министерот за економија и труд, Бесар Дурмиши, денеска се обрати како почесен гостин на најголемата бизнис конференција во земјава – „Бизнис Лидер“, која ги обединува најуспешните претприемачи, визионери и компании што ја движат македонската економија напред.
Во своето обраќање, министерот истакна дека оваа конференција претставува симбол на волјата, капацитетот и одговорноста за зајакнување на темелите на економијата и за создавање подобра иднина за граѓаните.
„Нашата визија е јасна – Македонија да стане зелена, дигитална и иновативна економија, со силно претприемништво и со култура на иновации во секоја компанија. Само преку партнерство помеѓу јавниот и приватниот сектор можеме да обезбедиме стабилен раст, нови работни места и подобар животен стандард за сите граѓани“, рече Дурмиши.
Економија
„Усвоен Законот за енергетската ефикасност: пониски сметки, почист воздух и европски стандарди“, известува Министерството за енергетика

Собранието на Република Северна Македонија на последната седница го усвои Законот за енергетската ефикасност, подготвен од Министерството за енергетика, рударство и минерални суровини. Со оваа одлука земјата добива уште една силна законска рамка, усогласена со европските стандарди, која директно ќе придонесе за пониски сметки за граѓаните, почиста животна средина и отворање нови зелени работни места, велат од Министерството за енергетика.
„Законот обезбедува суштински исчекор во намалување на потрошувачката на енергија, интеграција на обновливи извори и намалување на емисиите на стакленички гасови. Со неговото спроведување ќе се создаде стабилен систем, кој ќе ја приближи земјата до европските климатски цели и до концептот на зелена транзиција.
Клучни новини од Законот:
• Воведување на европскиот принцип ‘енергетската ефикасност на прво место’;
• Долгорочна стратегија за реконструкција на станбени, јавни и комерцијални згради во енергетски ефикасни објекти;
• Тројно зголемена заштеда во јавниот сектор – задолжителна реконструкција на најмалку 3 % од јавните згради годишно;
• Задолжителни соларни колектори при изградба или реконструкција на училишта, градинки и јавни институции;
• Финансиска поддршка за инвестиции во соларни панели, геотермални системи и паметни технологии;
• Високи стандарди во јавните набавки, дигитална транспарентност и професионализација на енергетските контроли;
• Вклучување на сертификатите за енергетски карактеристики во Катастарот на недвижностите и поттик за меѓуопштинска соработка.
Со усвојувањето на овој закон се воспоставува правна, економска и социјална рамка, што ги намалува трошоците за граѓаните и бизнисите, ја забрзува интеграцијата на обновливите извори и овозможува креирање одржлив енергетски систем.
Министерството за енергетика, рударство и минерални суровини останува посветено на целосната реализација на реформите во енергетскиот сектор и на усогласување со европското законодавство. Законот за енергетска ефикасност е дел од пакетот реформски закони, кои го поставуваат темелот за стабилен, одржлив и конкурентен енергетски сектор – со енергетска сигурност, подобар квалитет на живот за граѓаните и забрзано приближување кон Европската Унија“, се додава во соопштението на Министерството за енергетика.