Фонд за иновации и технолошки развој и Асоцијацијата на стартап-заедницата на Република Северна Македонија- Стартап Македонија, потпишаа меморандум за соработка, со цел спроведување и јакнење на меѓусебната соработка.

Договорот, како што се наведува, подразбира поттикнување и афирмација на областите од заеднички интерес, пред сè во областа на иновациската дејност и стартап-заедницата.

„Развојот на македонскиот стартап-екосистем ќе биде стратешки приоритет на ФИТР во наредниот период. Сметам дека земјата има огромен потенцијал и со заеднички и инклузивен процес, ќе ја позиционираме Р Северна Македонија како стартап хаб во регионот“, изјави Коста Петров, директор на ФИТР.

Соработката меѓу ФИТР и Стартап Македонија меѓу другото вклучува и дигитализација на стартап-екосистемот и транспарентно достапни податоци, подобрување на законската регулатива за стартап-компаниите и нивниот пристап до странски пазари.

Претседателот на Асоцијацијата, Дејан Алексовски, посочи дека државата и стартап-заедницата мора да соработуваат заедно, за да се случат реално потребните промени за подобар екосистем.

„ Со ФИТР ја продолжуваме, и со овој Меморандум интензивираме соработката во интерес на стартапите. Успешен стартап екосистем не се гради преку ноќ но ме радува дека постои волја, сериозно да се пристапи кон решавање на многуте предизвици за да се креираат, развиваат, и растат успешни стартап приказни од Македонија“, рече Игор Маџов, програмски директор на Стартап Македонија.

Портофолиото на ФИТР брои 305 стартап компании со вкупно кофинансирање од 17,3 милиони евра.

Првата фотонапонска централа во земјата која истовремено произведува електрична енергија од сонцето и од одблесокот на светлината се инсталираше во Неготино од страна на ЕВН Македонија.

Оваа централа е дел од најсовремените светски технологии, направена од т.н. бифацијални панели кои во горниот дел ја акумулираат директната сончева светлина, додека во долниот дел го акумулираат одблесокот на светлината од рефлектирачкиот материјал дополнително поставен под панелите. Од ЕВН велат дека централата е изградена во рекорден период од помалку од четири месеци.

„Оваа фотонапонска централа е резултат на плодната соработка меѓу државниот и приватиот сектор. Горди сме што нашата компанија вложува во проекти кои се наменети за заштита на животната средина и особено за намалување на загадувањето. За рекордни неполни четири месеци успеавме да направиме позитивна промена во насока на подобра енергетска иднина на земјата и за здравјето на нашите граѓани“, изјави претседателот на Управниот одбор на ЕВН Македонија, Штефан Петер.

Министерот за економија, Крешник Бектеши, зборуваше за важноста на инвестициите во делот на обновливите извори на енергијата и поддршката која константно се добива од ЕВН за постигнување на овие цели.

„Министерството за економија како надлежно министерство за политиките во делот на енергетиката, и во иднина ќе продолжи да поддржува активности за промоција на обновливите извори на енергија и поттикнување на енергетската ефикасност, со цел реализација на зацртаните цели за учеството на обновливите извори на енергија утврдени во стратешките документи во насока на постигнување на национална цел за заштеда на енергија“, рече Бектеши.

Овој проект се реализираше во рамки на стратегијата за производство на „Зелена енергија“ од страна на Владата.

Премиерот Зоран Заев ги истакна стратегиите на Владата за контуиниран развој на секторот за енергетика, а особено делот за обновливи извори на електрична енергија.

„Ми претставува чест и задоволство што денес сме тука на промоцијата на првата фотонапонска централа на ЕВН Македонија. Честитки за оваа инвестиција, за овој успешно реализиран проект во рамки на јавниот повик на Министерството за економија. Сончевата енергија ја имаме во изобилство, ние сме земја со 280 сончеви денови годишно и најквалитетен ‘пик на сончева енергија’“, рече Заев.

Бифацијалната фотонапонска централа на ЕВН Македонија во Неготино е составена од 4.416 панели со моќност од 335 W, односно инсталирана моќност од 1479 кW и има капацитет од 2,1 GWh за годишно производство на електрична енергија од обновливи извори на електрична енергија.

Директорот на Агенцијата за финансиска поддршка во земјоделството и руралниот развој, Николче Бабовски, заедно со заменик-министерот за земјоделство, шумарство и водостопанство, Трајан Димковски, денеска во Штип оддржаа состанок со сточарите.

На состанокот се разговараше за проблемите со кои се соочуваат дел од сточарите, за откупната цена на јагнето и за тоа како стоката да презими.

Директорот на АФПЗРР ги информира сточарите дека денеска на сметките на сточарите се легнати и парите за трета фаза произведено и предадено млеко, средства кои ќе им помогнат да ги набават храна за презимување на стоката.

„Денеска на сметките на 7.183 лица исплативме 225 милиони денари за произведено и предадено млеко, трета фаза. Ова се средства кои се од исклучително значење за сточарите, затоа што ќе помогне да набават сè што им е потребно за презимување на стоката. Во рок од неполн месец исплативме вкупно 377 милиони денари за втора и трета фаза предадено млеко. Со ова практично, целосно ја затворивме исплатата за произведено и предадено млеко за 2019 година. Исто така од денеска е отворен е – системот за поднесување на барања за органско производство. Аплицирањето трае до 25 декември“, истакна Бабовски.

Директорот посочи дека Агенцијата ќе продолжи со навремена и неселективна исплата на субвенции за сите кои правно – законски ги исполнуваат условите за добивање финансиска поддршка во земјоделството.

Заменик-министерот за земјоделство, шумарство и водостопанство, Трајан Димковски, истакна дека во изминатиот период министерството креираше сет на мерки кои помагаа во сточарството.

„Имаме дефицит за месо, мерките кои ги воведовме се во насока на намалување на потребата од увоз на месо и задоволување на потребите од домашни производство. Преку огласите за набавка на педигрирани грла, веќе создаваме домашни матични стада кои имаат добар генетски потенцијал, а со тоа директно влијаевме и на квалитетот. Во нареден период ќе биде објавен и оглсот за субвенционирање на плати за сточарите, кои исто така се намалување на трошоците кои ги имаат. Веќе се креираат и нови мерки кои ќе помогнат во подобрување на квалитетот и на месото и на млекото“, истакна Димковски

Заменик-министерот Димковски посочи дека земјоделството е наша шанса за успех. Им порача на фармерите сите заедно да работат на производи со додадена вредност што позитивно ќе се одрази и врз фармерите и врз земјоделците, но и врз бруто-домашниот производ и економскиот раст на државава.