Народната банка на Македонија (НБРМ) за идната година проектираше раст на Бруто домашниот производ (БДП) од два до три отсто, при што се очекува главен генератор да биде растот на инвестициите од 10,4 отсто.

„Ризиците околу проекцијата на БДП кои би влијаеле во надолна насока се однесуваат на темпото на закрепнување на глобалната економија и степенот на реализација на државните капитални инвестиции, додека во позитивна насока би влијаеле промените на пазарот на трудот кои во проекцијата се вклучени конзервативно“, изјави Петар Гошев, гувернер на НБ.

Тој рече дека растот на БДП се очекува да биде воден од домашната побарувачка додека извозот би бил негативен придонес, но за да се достигне овој раст на БДП во буџетот би требале да се вложат 23 милијарди денари.

„Инфлацијата во 2011 година се очекува да биде во интервал од два до три отсто, влијание би имал растот на светските цени на храната,а од домашната побарувачка не се очекуваат притисоци за раст на цените“, рече гувернерот.

Дефицитот на тековната сметка според извештајот е зголемен за 0,7 во однос на минатата година на 4,3 отсто поради минималното проширување на трговскиот дефицит, а капиталните се очекуваат да бидат повисоки зголеменото  задолжување на јавниот сектор како и повисоки на повисоки директни странски инвестиции кои би достигнале 3,6 отсто од БДП.

За идната година Банката проектираше раст на кредитите од 12,1 отсто како резултат на подобрувањето на макроекономската политика и поголемата склоност  кон потрошувачка кај населението и претпријатијата кој главно ќе биде финансиран преку растот на депозитите во банките.

„Ризиците околу проектираниот монетарен и кредитен раст се главно во надолна насока и нивното остварување во најголема мера ќе зависи од темпото на заздравување на глобалната и домашната економија“, рече Гошев.

На новинарско прашање дали НБ ќе ги намали девизните резерви бидејќи тоа единствен изговор на банките зошто не ги намалуваат каматните стапки, тој додаде дека нема потреба некој да го потсетува во однос на тоа прашање, ако банката осети потреба ќе ги намали девизните резерви.

Гошев изјави дека со намалувањето на референтната каматна стапка се обидува една година да влијае на намалување на каматните стапки.

„Тој процес е почнат, тече и во зависност од натамошните движења во економијата, перцепцијата за натамошните ризици во економијата и во финансискиот сектор веројатно ќе продолжи оваа насока на намалување на каматните стапки или не, има многу други фактори кои влијаат на каматите а не само монетарната политика“, рече гувернерот.

Според НБРМ проекциите за економскиот раст остануваат скоро непроменети за оваа година се очекува реален раст на БДП од околу 0,6 проценти, просечната инфлација да биде 1,6 проценти поради цената на храната, дефицитот на трговската сметка до крајот на 2010 година се очекува да изнесува 3,6 проценти од БДП, а се очекува кредитниот раст да се забрза до 9,4 отсто. /крај/мт