Со одржувањето на конференцијата „Европските перспективи на Република Македонија: Десет години интеграција и усогласување на европското законодавство“ денеска заврши Проектот за економско правна реформа, што се спроведуваше во последните десет години

Проектот, спроведен со помош на германското Друштво за техничка соработка ГТЗ, имаше за цел да помогне во усогласувањето на македонската економска легислатива со правото на Европската Унија.

„Владата на Република Македонија преку неговата реализација доби една исклучителна поддршка во постепената надградба и професионално и институционално зајакнување на македонските институции за ефикасно усогласување на законодавството од економската проблематика. Во периодот кога Република Македонија работи на спроведување на реформите во пресрет на започнување на преговорите за полноправно членство во ЕУ, со особено задоволство би сакал да ги нагласам континуираните напори кои владата и секретаријатот ги прават во забрзување во процесот на интеграција во Унијата“, изјави вицепремиерот задолжени за европски прашања, Васко Наумовски.

„Германија ја поддржува Македонија на патот кон ЕУ. Тоа стои и во средиштето на нашите билатерални односи. При тоа, во областа на стопанството, нашите најбитни инструменти се за финансиската соработка, Кредитната банка за обнова и за техничката соработка преку друштвото за техничка соработка ГТЗ. Почнувајќи од 1992-та година, Германија само преку овие две институции инвестираше преку 250 милиони евра во Македонија. Ова се надополнува и со други придонеси“, рече германската амбасадорка Урлике Марија Кнотц.

Министерствата за правда, економија и финансии беа главните носители на имплементацијата на овој десетгодишен проект.

„Министерството за економија имаше голем бенефит од овој проект, особено во неколку клучни области за подобрување на внатрешниот пазар и тоа во делот на заштита на конкуренцијата, во делот на државната помош, делот во заштита на потрошувачите. Индустриската сопственост, делот на економскиот напредок и ефикасно искористување на суровините“, рече Методиј Хаџи-Васков, заменик-министер за економија.

„Министерството за правда вложува огромни напори за спроведување на реформите и реализацијата на основните приоритети во ЕУ-интеграциските процеси. Во поглед на реализацијата на приоритетите на приоритетите од партнерството за пристапување, евидентни се напорите во реформите на правосудството за остварување на напредок во зајакнување на независноста, зголемување на ефикасноста, како и специјализација и професионализација на судството“, изјави Ибрахим Ибрахими, заменик-министер за правда.

„Со реализација на проектот се направи голем чекор во усогласувањето на законодавството во областа на финансиските услуги и воспоставувањето на ефикасни институции за спречување на корупцијата во јавните набавки, секторот за осигурување, како и борбата против перењето пари и финансирање тероризам“, изјави Сузана Пенева, државен советник во Министерството за финансии.

Во рамки на германската техничка соработка, во земјава покрај овој, се спроведуваат и проектите за регионален и економски развој, инвестиции и промоција на извоз, даночна реформа, интегрирање на техничките ЕУ директиви, како и проектот за имплементација на новиот закон за води.