Европските пазари на акции во понеделникот ослабеа во незначителната трговија поради разочарувањето на инвеститорите од минатонеделниот самит на Европската унија, покажуваат податоците по затворањето на денешното тргување.

Европските пазари на акции во понеделникот ослабеа во незначителната трговија поради разочарувањето на инвеститорите од минатонеделниот самит на Европската унија, покажуваат податоците по затворањето на денешното тргување. Индексот на лондонската берза FTSE 100 ослаби за 0,5 отсто на 5.501 поени, индексот на франкфуртската берза DAX потона за 1,5 отсто на 5.896 поени, додека индексот на берзата во Париз CAC 40 беше во негатива од 1,1 отсто  и изнесуваше 3.136 индексни поени. Според аналитичарите, ова се должи на тоа што во петокот на самитот на ЕУ во Брисел, челниците на 26 земји членки, освен Велика Британија којашто остана настрана несакајќи да загуби од својот суверенитет, се договорија за промена на европскиот договор за воведување построги прописи за контрола на расходите во националните буџети во рамките на еврозоната, како и можност за земање билатерални кредити преку Меѓународниот монетарен фонд (ММФ) во износ од 200 милијарди евра за надминување на должничката криза на паднатите стопанства во зоната на употреба на единствената европска валута. Од друга страна, агенцијата за одредување кредитни рејтинзи „Standard and Poor’s“ (S&P), уште пред самитот го вброи 15 членки од еврозоната на листата земји чиј бонитет ќе биде ставен на разгледување поради можно намалување а во понеделникот објави дека Европската унија треба да одржи повеќе самити за да ја надмине должничката криза за што времето полека но сигурно истекува. Главниот економист на ММФ, Оливие Бланшар, викендов изјави дека договорот за подлабока економска интеграција е чекор во вистинска насока, но не и сеопфатно решение за кризата.Во понеделникот меѓу најголемите губитници беа банките. Така британската „Lloyds“ ослаби за 6,3 отсто, француската „Societe Generale“ за 5,1 проценти, германската „Commerzbank“ за 3,4 отсто, а акциите на италијанските банки „Banco Popolare“ и „Unicredit“ паднаа за 3,9 односно за 4 отсто.Меѓу позначајните губитници во понеделникот беа и акциите на осигурителните компании, токму поради предупредувањето на „S&P“ за можното намалување на рејтинзите под влијание на европската финансиска криза. Така акцијата на германската „Allianz“ загуби на вредноста 4,4 отсто, на австриската „Vienna Insurance Group“ – 3,5 проценти а на француската „Axa“  – 2,6 отсто./крај/ро/мф/сн