Економија
Очекувањата за брзиот договор за Грција го поддржаа еврото
Еврото во вторникот зајакна во однос на доларот, поддржано од очекувањето за скорешно постигнување договор меѓу Грција и нејзините приватни кредитори, а по добивката повторно се истакна и јенот.
Еврото во вторникот зајакна во однос на доларот, поддржано од очекувањето за скорешно постигнување договор меѓу Грција и нејзините приватни кредитори, а по добивката повторно се истакна и јенот. Еврото е на пат да ја забележи најдобрата месечна изведба од октомври, зајакна во однос на американскиот долар за 0,4 отсто на 1,3184 долари. Накусо во текот на денот достигна и до 1,3213, близу до највисокото ново во последните шест седмици коешто изнесуваше 1,3235 долар, на кое достигна минатата седмица. Во однос, пак, на швајцарскиот франк, еврото ослаби за 0,1 отсто на 1.2042 франка. Доларот изгуби на вредноста во однос на јапонскиот јен забележувајќи кусо време најниско ниво во последните три месеца од 76,175 јени, за потоа да се опорави на 76.36 јени. Со тоа стаса до блага позитива на дневно ниво од 0,1 отсто. Поддршката во вторникот на еврото му ја дадоа изјавата на грчкиот премиер Лукас Пападимос за „значајниот напредок“ во преговорите со приватните кредитори за реструктуирањето на грчкиот државен долг. Целта на овие преговори е да се постигне конечен договор до крајот на седмицава. Добивките на еврото сепак би можеле да бидат ограничени поради јакнењето дека Португалија би можела да го следи патот на Грција и да ги реструктуира своите државни долгови. „Склоноста кон ризикот во моментов раст, но не веруваме дека ќе потрае. Пазарите во кус рок очекуваат договор на Грција со кредиторите во приватниот сектор, и тоа сега има поголемо влијание од Португалија“, вели за Reuters, челник за глобална валутна анализа во „Bank of Tokyo-Mitsubishi“.Покрај американската централна банка Fed која не ја исклучи можноста од натамошни мерки за квантитативно попуштање на монетарната политика, зајакнаа и очекувањата дека Европската централна банка (ECB) кон крајот на февруари би можела во вториот круг понуди на тригодишните кредити за банките да овозможи голема инјекција на ликвидност. Според процените на трговците анкетирани од Reuters, износот на понудените кредити би можел да достигне 325 милијарди евра. Аналитичарите сметаат дека договорот на Грција со кредиторите со кој би се спречил нејзиниот хаотичен банкрот може краткорочно да го подобри расположението на инвеститорите во однос на еврото, но предупредуваат на песимизмот кај вложувачите во среднорочната перспектива поради ризикот од ширењето на кризата на поголемите економии во еврозоната. Доларот, пак, продолжува да ниже загуби во однос на јапонскиот јен, накусо спуштајќи се на најниското ниво во последните три месеца, поради притисокот на кој беше изложен минатата седмица откако Fed најави дека каматните стапки ќе ги задржи на рекордно ниското ниво барем до втората половина од 2014 година.Јапонскиот министер за финансии, Јун Азуми во таквите околности се закани со решителни мерки со цел да се сопрат променливостите и спекулативните движења на пазарите на валутите, поради спречувањето на натамошниот залет на јенот./крај/ро/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.