Во понеделникот на Волстрит берзанските индекси забележаа пад втор ден по ред, а се наоѓаа под најголем притисок акциите во рударскиот сектор откако Кина ја намали целената стапка на својот економски раст.

Во понеделникот на Волстрит берзанските индекси забележаа пад втор ден по ред, а се наоѓаа под најголем притисок  акциите во рударскиот сектор откако Кина ја намали целената стапка на својот економски раст.Индексот Dow Jones ослаби за 0,11 отсто на 12.962 поени, индексот S&P 500 се лизна за 0,39 отсто на 1.364 поени, додека индексот Nasdaq забележа пад за 0,86 отсто на 2.950 индексни поени.Негативно во понеделникот врз пазарите делуваше намалувањето на целената стапка на економски раст на кинеското стопанство од 8 на 7,5 отсто. Оваа информација уште на стартот од тргувањето предизвика пад на акциите на азиските, а потоа во текот на денот и на европските берзи, па така и Волстрит не остана имун на оваа вест. Под најголем притисок во понеделникот беше рударскиот сектор, бидејќи Кина е најголемиот светски потрошувач на сировини, па инвеститорите стравуваат дека забавениот раст во второто според обемот стопанство во светот може да предизвика пад на побарувачката на сировини.Оттаму во понеделникот паднаа и цените на сировините, што повлече и намалување на цените на рударските компании. Така индексот S&P на овој сектор падна за 1,6 отсто. Растот на акциите на Волстрит од почетокот на година, при што индексот S&P 500  скокна за 8,5 отсто, најмногу се должи на податоците коишто укажуваат на зајакнување на американската економија. Меѓутоа, инвеститорите и аналитичарите го поставуваат прашањето дали растот на американската економија е одржлив, имајќи предвид дека другите најголеми светски економии се под притисок. Јапонија е во рецесија, а рецесијата и’ се заканува и на еврозоната. Во понеделникот реномираниот лондонски институт Markit соопшти дека неговиот индекс PMI за деловни активности во еврозоната в февруари се намалил од 50,4на 49,3 индексни поени, што е поголем пад отколку што се очекуваше. Тоа недвосмислено покажува дека еврозоната е на работ од рецесија, имајќи предвид дека економија на оваа групација падна во последниот минатогодишен квартал. И на европските берзи во понеделникот цените на акциите забележаа пад, па така индексот на лондонската берза FTSE 100 се намали за 061 отсто на 5.874 поени, индексот на берзата во Франкфурт DAX 30 падна за 0,70 отсто на 6.866 поени, додека индексот на париската берза CAC 40 се лизна за 0,39 отсто на 3.487 поени. /крај/ро/мф/сн