Економија
Обама повика на прекинување на енергетската зависност
„Не можеме да останеме зависни од други земји за нашите енергетските потреби. Ние во Америка ги контролираме нашите судбини, значи пред нас е изборот, минатото и иднината“
Американскиот претседател Барак Обама во саботата повика на прекинување на енергетската зависност на САД, како и на укинувањето на годишните субвенции за нафтените компании во износ од повеќе милијарди долари.„Не можеме да останеме зависни од други земји за нашите енергетските потреби. Ние во Америка ги контролираме нашите судбини, значи пред нас е изборот, минатото и иднината“, изјави американскиот претсетадел Барак Обама во своето седмично обраќање до нацијата преку радиото и интернет, пренесува Reuters. Ваквиот став на претседателот Обама е одговор на сѐ поострите критики од страна на опозициските републиканци за неговите енергетски политики. Здружението на американските возачи (ААА) предвидува дека цената на бензините во САД до мај годинава ќе изнесува во просек 4,25 долари за галон (3,8 литри), а во моментов чини 3,83 долари.Во периодот меѓу 1998 до 2004 година, цената на бензините во САД варираше меѓу 1 и 2 долара за галон.Цените на бензините многу се разликуваат во разните региони и минатата седмица една интерент страница којашто ги следи цените на горивата во 50 американски сојузни држави истакна цена од 5,09 долари за галон во Лос Анџелес. Цените на горивата е од круцијална важност, особено во текот на изборна година, бидејќи 76 отсто од Американците патуваат на работа со сопствен превоз.Претседателот Обама нагласи дека цената на бензините зависи од надворешните фактори. Тој, исто така, повика и на укинување на 4 милијарди долари годишно фискални олеснувања за нафтените компании. Обама прецизира дека смета оти во Конгресот ќе биде изгласано укинувањето на овие субвенции./крај/ро/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Рекорден трговски дефицит во 2023 година во износ од 436 милиони евра
Дополнителниот заменик-министер за земјоделство, шумарство и водостопанство, Цветан Трипуновски, преку фејсбук-објава извести за рекорден трговски дефицит во 2023 година за земјоделско-прехранбени производи во висина од 436 милиони евра.
„Рекорден трговски дефицит во 2023 година во износ од 436 милиони евра. Еве како СДС го уништува македонското земјоделство, Македонија со СДС стана земја увозно зависна од храна. Негрижата за македонските земјоделци и тотално погрешните земјоделски политики на СДС ги принудија земјоделците да го напуштат полето, а со тоа македонските граѓани да јадат увозни земјоделски производи, Македонија од земја извозник стана земја увозник на храна под власта на СДС. Земјоделците ќе имаат вистински партнер во новата влада на ВМРО-ДПМНЕ и заедно ќе го вратиме македонското земјоделство во онаа препознатлива состојба, а Македонија повторно ќе биде земја извозник на храна“, рече Трипуновски.
Економија
Надворешен долг, побарувања и меѓународна инвестициска позиција во четвртото тримесечје од 2023 година
Објавено е редовното статистичко соопштение за позначајните промени кај надворешниот долг, надворешните побарувања и меѓународната инвестициска позиција.
На крајот на четвртиот квартал од 2023 година:
На 31.12.2023 година, нето надворешниот долг изнесува 4.458 милиони евра (или 32,6% од проценетиот БДП). Нето надворешниот долг на земјата, во четвртиот квартал од 2023 година, е зголемен за 305 милиони евра, или за 7,3%. Од аспект на структурата, приватниот нето-долг и натаму има поголемо учество во вкупниот нето-долг со 67%.
Во текот на четвртиот квартал од 2023 година, негативната нето меѓународна инвестициска позиција (МИП) е зголемена за 160 милиони евра и изнесува 8.500 милиони евра, односно 62,2% од проценетиот БДП за 2023 година.
Најновото соопштение за позначајните промени кај надворешниот долг, надворешните побарувања и меѓународната инвестициска позиција е достапно на следниот линк.
Економија
Во вториот квартал од 2025 година стапката на противцикличниот заштитен слој на капиталот ќе остане 1,5 отсто, одржана седница на Советот на Народната банка
Советот на Народната банка, на својата редовна седница, одржана на 28 март 2024 година, врз основа на редовната квартална оцена на системските ризици, донесе одлука за задржување на стапката на противцикличниот заштитен слој на капиталот за изложеностите на банките во Република Северна Македонија во висина од 1,5%, којашто ќе се применува и во вториот квартал од 2025 година. Одлуката се заснова врз оцените за постепено стабилизирање на нагорните циклични системски ризици и постојана стабилност на банкарскиот систем. Исто така, ги зема предвид условите од окружувањето коешто и натаму е неизвесно и придружено со ризици, што е причина за претпазливо спроведување на макропрудентните мерки заради натамошно јакнење на отпорноста на банкарскиот сектор. Со одржувањето на стапката на противцикличниот заштитен слој на капиталот се придонесува за спречување и за намалување на можните ризици.
Народната банка ќе продолжи со внимателно следење на системските ризици и ќе ја преоценува висината на стапката на противцикличниот заштитен слој на капиталот на редовна квартална основа. Притоа, имајќи ја предвид природата на противцикличниот заштитен слој на капиталот и насоките на релевантните европски институции, Народната банка може да ја оцени потребата за зголемување на стапката, при раст на ризиците и неизвесностите од окружувањето, во услови на поволни остварувања на банките. Во случај, пак, на значително остварување на ризиците во билансите на банките, може да се оцени и потребата од делумно или целосно ослободување на овој заштитен слој на капиталот, како поддршка во работењето на банките при евентуални неповолни сценарија.
Советот на Народната банка на седницата разгледа и други материјали поврзани со работата на централната банка.