Владата ја усвои Програмата за туристичка промоција на Македонија и поддршка на туризмот за 2013 година, а за тоа се обезбедени 2,5 милиони евра, што претставува двојно зголемување на средствата од тие потрошени годинава.

„Очекуваме зголемениот обем на средства да овозможи и нов зголемен обем на туристи и девизен прилив. Целта на програмата е туристичка промоција на Македонија на таргетирани пазари, етаблирање на Македонија како туристичка дестинација во светот, субвенционирање на тур операторите кои носат странски туристи, отворање на нови и засилување на брендот на веќе постоечките пазари“, рече портпаролот на Влада, Александар Ѓорѓиев, на прес-конференција.

Појасни дека активностите за промоција на Македонија, од географски аспект, се распоредени во три круга и тоа активности насочени кон анимација на Балкан, потоа Европа и останатите земји.

Најголемиот број туристи доаѓаат во Македонија од нашите соседни земји плус Словенија, Хрватска, Босна, Црна Гора, Романија и Турција, па затоа ќе се лобира кај нивните тур оператори и кон граѓаните, со фокус на летен и зимски туризам.

„Втор целен круг е Европа, односно сите земји од континентот плус Русија и Украина. Во вториот круг земји посебен фокус ќе има кон оние земји од каде што постојат директни авионски или чартер линии кон Македонија“, рече Ѓорѓиев.

За останатите земји, фокусот е на земјите кои имаат авионски линии кон Македонија или пак интерес за отворање сезонски летови кон Македонија.

Ќе се обрне внимание и на транзитните патници, за кои ќе се направат активности за зголемување на нивната свесност за престој во Македонија како транзитна дестинација при патувањата во Грција во време на лето, и кон Србија и Бугарија во зимскиот туризам.

Како нов модалитет во туризмот е проектот за самовработување во туризмот, кој опфаќа финансирање на отворање на нови бизниси со средства кои ќе ги дава државата под поволни услови, а преку посебни програми на министерствата ќе се ангажираат уште дополнителни околу половина милион евра.

„Со нив ќе се стимулира развој на алтернативен туризам, вински, селски, културен и спортски туризам, како и развој на нови содржини и поврзување на туризмот со дополнителните туристички содржини, прошетки до други градови, разгледување на верски објекти, спортски содржини итн“, рече Ѓорѓиев.

За финансирањето на субвенции за привлекување на странски гости Владата одлучи Агенцијата да го зголеми износот да е повисок од актуелните 800.000 евра.

Минатата година од девизен прилив од туризмот се влезени 171 милион евра. Секој странски турист трошел по просечни 523 евра, од кои околу 100 евра за аранжман за ноќевање и околу 420 евра за дополнителни трошоци.

За 2013 година, со обезбедените околу три милиони евра за поддршка на туризмот, односно 2,5 милиони евра преку Агенцијата за туризам и половина милион евра преку специфично финансирање преку министерствата, проектираниот девизен прилив, со новообезбедените средства, се очекува да изнесува над 200 милиони евра./крај/со/бб