Економија
Закрајшек: Словенија до крјаот на годината ќе побара помош
Само прашање на време е кога Словенија и формално ќе мора да побара меѓународна помош за финансиска стабилизација, оцени во вторникот во разговор за словенечкото радио Егон Закрајшек, Американец со словенечко потекло.
„До крајот на годинава Словенија ќе треба да побара помош, тоа е само прашање на месеци до крајот на годината“, изјави Егон Закрајшек кој инаку е помошник директор за монетарни прашања во американската централна банка Federal Reserve – Fed. Оценува дека владата на Словенија веќе нема време за самостојна финансиска стабилизација и враќање на довербата на финансиските пазари.
На владата во Љубљана, Закрајшек ѝ препорачува што поскоро да ги спроведе мерките за санација на домашните банки и да ги донесе потребните реформи. Во врска со изјавите на министерот за финансии, Јанез Шуштершич, дека Словенија средствата за финансирање наместо на пазарот на еврообврзниците, што ѝ е оневозможено поради високите камати, оваа есен би можела да ги побара на американскиот пазар на хартии од вредност со издавање обврзници во висина од 1,5 милијарди американски долари, Закрајшек вели дека земјата така, освен на кредитен, би се изложила и на валутен ризик.
Закрајшек, инаку, во Словенија во текот на ланската кампања за вонредните парламентарни избори го споменуваа како можен кандидат за мандатар на „техничката влада“, меѓутоа самиот тој во разговорот за словенечкото радио истакнува дека решението мора да го постигнат избраните словенечки политичари.
„Техничка влада би претставувала тежок удар за демократските процеси во Словенија. Тоа не е волшебна формула за решавањето на тешкотиите. До разбирањето на проблемите треба да се дојде на органски начин, на домашната политичка сцена. Доколку тоа не се случи, ниту техничка влада не може многу да стори“, вели Закрајшек.
Минатонеделната изјава на словенечкиот премиер Јанез Јанша дека на Словенија во октомври ѝ се заканува неликвидност доколку политиката брзо не се обедини околу неопходните чекори за финансиска стабилност и реформи, предизвика нагаѓања дека Јанша споменува „можност за банкрот на Словенија“ и дека земјата очигледно ќе биде шестата членка на еврозоната на кој ќе ѝ биде потребна меѓународна финансиски помош.
Професорот на Економскиот факултет во Љубљана и поранешен министер за развој, Јоже Дамијан, изјави дека тоа е „непримерена“ изјава на Јанша и дека ќе доведе до уште повисоки камати на словенечките обврзници.
Во драматичното предупредување Јанша кон крајот на минатата седмица рече дека Словенија веќе за еден месец би можела да биде неликвидна, ако не успее да добие интересенти за своите државни обврзници и дека под сегашните услови нема да може да ги добие потребните средства, ниту за идната година кога ѝ доспеваат за наплата околу две милијарди евра долг заедно со каматите./крај/хи/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.