Интензивирањето на економската соработката помеѓу Македонија и Косово е од големо значење за двете земји. Косово е еден од најзначајните трговски партнери на Македонија и е на осмото место по обем на извоз.

Ова во петокот во скопје го изјави македонскиот министер за економија Ваљон Сараќини за време на Вториот состанок на Мешовитиот комитет по Договорот за економска соработка меѓу владите на двете земји.Вредноста на трговската размена со Косово во првите шест месеци од годината е околу 200 милиони евра, со суфицит на македонска страна од 186,7 милиони евра, што е доволен мотив за натамошно унапредување на соработката, појасни Сараќини.  „На денешниот состанок се дискутираше за конкретни проекти како што е изградба на интерконективен високонапонски далновод, проект во кој Македонија ќе вложи околу 6,4 милиони евра, кој ќе придонесе за поголема енергетска стабилност, а се  разгледа и можноста за продлабочување на соработката во сегментот на заедничко искористување на јагленот од Косово за производство на  електричната енергија, како и унапредување на енергетската ефикасност. Важно е да се спомене и изградбата на магистралниот гасовод, инвестиција од 320 милиони евра, при што е предвидено дел од гасот во иднина да транзитира за Косово, што е значајно за двете земји“, изјави Сараќини.Постои иницијативата за формирање на билатерално експертско тело преку кое ќе се креираат  проекти за заедничко искористување на ЕУ – фондовите, што претставува приоритет на двете земји. Во насока на унапредување на туризмот помеѓу двете земји, се разговараше  за склучување на Договор за соработка и можни даночни ослободувања, со што дополнително ќе се интензивира соработката во оваа област. „По консултации со бизнис заедниците од двете земји, дискутиравме и за доследна примена на ЦЕФТА договорот, со што во иднина треба да се избегне воведувањето на протекционистички тарифи, како и за што побрзо потпишување на Спогодба за заштита на инвестициите, како и подобрување на патната и железничката инфраструктура, во насока на полесен транзит на стоки и услуги“, информираше Сараќини.Косовскиот министер за економија Бесим Беќај нагласи дека се прават обиди што повеќе да се развие соработката во енергетиката, да се подобри патната инфраструктура и да се зголеми размената. „Сакаме трговската размена со Македонија што повеќе да се развие и тоа да не остане на ниво на едноставна размена, туку да биде многу поконзистентна. И политичките односи и економските меѓу двете земји се многу добри, но треба да се ангажира и приватниот сектор со цел овие односи да добијат уште повеќе на содржина и придобивки за економскиот развој на двете земји“, рече Беќај. Меѓу инфраструктурните проекти на кои работи косовската страна актуелна е изградбата на патните правци кон Тирана и кон Скопје. Во тој контекст министерот Беќај потенцираше дека за Косово е многу значајна сообраќајната поврзаност кон Македонија.„Имаме оформено Комитет со пет министри, коишто се задолжени за работите околу овој проект. Веќе се усвоени условите за отпочнување и објавување повик за реализација на  овој проект, имаме добиено и зелено светло од Меѓународниот монетарен фонд за искористување средства за реализиација на овој проект, парарлелно со зачувувањето на макрофинансиската стабилност“, посочи косовскиот министер. /крај/со/ап/