Економија
Дијаспората активно се вклучува во подигање на македонската економија

Голем број бизнисмени од дијаспората и потенцијални странски инвеститори се собраа на Глобалниот инвестициски самит во Охрид со цел одблизу да се запознаат со условите за инвестирање во Македонија.
Тие разговараат и остварување потесна соработка со македонски компании, но и да пренесат дел од своите успешни приказни и да помогнат со своите деловни контакти ширум светот.
Настанот е организиран од невладината организација `Македонија 2025` која е основана од угледни членови на македонската дијаспора, а во организацијата членуваат и успешни бизнисмени од Македонија.
Пред еминентните странски и домашни бизнисмени, членови на бизнис-дијаспората и странските дипломати се обрати македонскиот премиер Никола Груевски, кој истакна дека е почестен што има можност да говори пред еден ваков аудиторим и нагласи дека за владата дијалогот со бизнис заедницата е стратешка определба врз која ќе продолжи да ја креира економската политика.
„Иако имаме различни цели, сите имаме една цел, да работиме за успех и во функција за развој на нашата татковина Република Македонија. Остварување на економски раст, надминувањето на глобалните предизвици, одбрана на стандардот на граѓаните, создавањето на нови работни места, бараат заеднички ангажман“, изјави Груевски.
Тој накусо ја запозна бизнис дијаспората и странските бизнисмени со реформите што ги презеде владата во изминатите години во насока на создавање поволна бизнис клима и намалување на трошоците за работењето, како што е намалувањето на даноците, намалување на царините, ослободувањето на данокот на добивка за инвестиции, преземање антикризни мерки, ниското ниво на задолженост на државата, слободните економски зони со своите бенефиции, договорите за слободна трговија и друго.
„Македонија се повеќе се гледа како привлечна инвестициска дестинација и важна порта кон Европа на мултинационалните компании, чии ефекти веќе се гледаат во понудата на работни места и значително учество на нивните производи во извозот“, рече Груевски.Македонскиот премиер порача дека и покрај кризата Македонија продолжува да оди со силни чекори напред.
„Главни приоритети на македонската влада се забрзување на процесот за членство во ЕУ и НАТО, обезбедување силна поддршка за деловниот сектор и конкурентна економија“, рече Груевски.
Претседателот на бордот на `Македонија 2025`, Мајк Зафировски истакна дека бизнис дијаспората преку организацијата на овој настан сака да го стави своите искуство и својата мрежа на контакти во корист на македонската економија.
„Самитот во Охрид има две цели, да се пронајдат потенцијални инвеститори и да се зголеми посветеноста на владата и бизнис заедницата, Македонија да се движи напред и да се подобри бизнис климата“, рече ЗафировскиЧленот на бордот на директори на `Македонија 2025`, Зоран Мартиновски, истакна дека често слушаме како дијаспората е дел од успешните приказни на одредени држави.
„Ние сме на добар пат да изградиме цврста платформа за соработка која во иднина ќе биде основа за соработка и отворање на странските пазари за македонските компании“, рече Мартиновски.
„Во светот има многу успешни луѓе со македонско потекло и сигурен сум дека со својата експеретиза, знаење и контакти можат многу да помогнат во економскиот развој на Македонија“, додаде Мартиновски.
Потпретседателот на `Македонија 2025`, Робер Арсов, истакна дека за дијаспората овој самит претставува одлична можност да се запознае со можностите за соработка во Македонија.
„Ова е еден чекор напред за создавање на зголемена соработка меѓу дијаспората и македонскиот бизнис. Во таа смисла инвестицискиот самит е еден вид медиум кој се надевам ќе продолжи и во иднина и ќе произлезе во годишен совет каде што бизнисмените ќе може да се запознаваат и да остварат контакти“, рече Арсов.
Глобалниот инвестициски самит под мотото `Нови можности: Преку бизнис дијаспора до зголемена трговија, инвестиции и економски раст`,на кој учествуваат 350 лица,продолжува до недела./крај/мф/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Лоши прогнози за германската економија

Германската економија ќе падне за 0,2 проценти оваа година оставајќи ја земјата во рецесија, според новите прогнози на Германскиот економски институт (IW). Германија е силно погодена од трговскиот конфликт предизвикан од царините на американската влада, објасни IW.
Глобалната неизвесност ги обесхрабрува бизнисите да инвестираат и тоа придонесува за падот, а со тоа и големите купувања, како што се нови машини и возила. Високите оперативни трошоци во Германија дополнително ја комплицираат ситуацијата.
IW заклучува дека Германија, со домашен бруто-производ (БДП) кој се намалува за 0,2 проценти во 2024 година ќе остане во рецесија.
Најголемиот ризик за глобалната економија оваа година, според IW, е трговската политика на САД. Без царинските политики на САД, глобалното економско производство во 2025 година можеше да биде повисоко за 0,8 проценти, соопшти институтот.
Перспективите за индустрискиот и градежниот сектор остануваат мрачни. Се очекува индустриските компании да генерираат помала додадена вредност оваа година по падот од 3 проценти во 2024 година. Високите цени на енергијата, зголемувањето на платите и зголемената регулатива вршат дополнителен притисок врз бизнисите.
Градежните компании, по пад од 3,7 проценти во 2024 година, продолжија да се соочуваат со дополнителни ограничувања оваа година, при што високите трошоци за изградба предизвикани од регулативата продолжуваат да го попречуваат секторот.
IW исто така забележа дека овие трендови сега влијаат на пазарот на трудот, при што бројот на вработени се намалува од средината на 2024 година. До летото бројот на невработени би можел да достигне три милиони, бројка што не е евидентирана од 2010 година, велат економистите.
Раководителот на одделот за макроекономски истражувања на IW, Михаел Гремлинг, изјави дека новата германска влада има можност да го промени трендот посочувајќи на планираниот посебен инфраструктурен фонд што би можел да помогне во стимулирањето на економијата.
Економија
Димитриеска – Кочоска во Брисел: Реформите остануваат клучни за конкурентноста на европската економија

Целосна имплементација на новиот Закон за буџети и спроведување прудентна фискална политика преку усвојување конкретни мерки за фискална консолидација, намалување на дефицитот, зајакнување на ефикасноста на прибирање на приходите во буџетот, се дел од препораките за РС Македонија од заедничките заклучоци од овогодинешниот 11-ти по ред Економски и финансиски дијалог меѓу ЕУ и земјите кандидати за членство на кој учествуваше министерката за финансии Гордана Димитриеска-Кочоска.
„Усвоените заеднички заклучоци во рамки на дијалогот коишто се однесуваат на зајакнување на фискалното управување, имплементирање на капиталните инвестиции, зајакнување на оперативноста на даночната администрација и следење на фискалните ризици, се во линија на реформите предвидени како со реформската агенда, така и со Програмата за реформи во управувањето со јавните финансии“, рече министерката за финансии.
Таа додаде дека во услови на глобална економска нестабилност, фискалната политика е насочена да одговори на неизвесностите присутни во глобалната и домашната економија. Притоа, додаде, имајќи предвид дека фискалниот простор е ограничен како резултат на последователните кризи, фискалната политика е исправена пред предизвикот за постигнување фискална консолидација, но истовремено и финансирање иницијативи коишто го поддржуваат растот.
„Во услови на геополитички турбуленции и трговска војна, ние треба да им овозможиме на нашите компании да се развиваат преку креирање динамична деловна средина која ќе го ослободи нивниот потенцијал за раст. Значајно за приватниот сектор е подготвеноста на нашите влади да обезбедат квалитетна даночна политика, квалитетна инфраструктура, расположива и квалитетна работна сила, пристапна енергија, помал административен товар и правна рамка којашто ќе овозможи креирање на регионални ланци на снабдување. Она што ние како креатори на политики и носители на одлуки треба да размислиме и одлучиме е како да се креира динамично деловно окружување кое ќе им помогне на нашите компании брзо да се прилагодат на сегашната остра конкуренција на глобалниот пазар“, рече министерката за финансии.
Во таа насока, таа потенцира дека Владата е посветена на трансформативни реформи во земјата фокусирани на дигитална трансформација, одржлива енергетска транзиција, јакнење на човечкиот капитал, јакнење на владеењето на правото и подобро управување со јавните финансии, коишто области се во фокусот на реформската агенда на земјата.
Според учесниците, Економскиот и финансиски дијалог, и понатаму ќе игра значајна улога во постигнување на пошироките цели на добро управување и економски просперитет, и се сoгласија дека дијалогот треба да продолжи да игра централна улога во утврдување на заедничките насоки за политики за поддршка на одржлив среднорочен економски раст и постепено усогласување со економските критериуми за пристапување во ЕУ. Учесниците нагласија дека клучна улога за остварување на напредок е спроведување на заедничките заклучоци, како и програмите на економски реформи и реформските агенди .
Дискусијата на годинешниот Економски и финансиски дијалог беше фокусирана на конкурентноста на Европа во контекст на сегашните геополитички случувања и потребата за поедноставување на правната рамка со цел намалување на административниот товар врз компаниите. За да може економијата да креира раст и работни места, во услови на трговска војна, на компаниите треба да им се овозможи да ја зајакнат конкурентноста преку инвестиции и иновации.
На годинашниот Економски и финансиски дијалог во Брисел учествуваат министрите на тековното и двете последователни претседателства со Советот на ЕУ, претставници на земјите членки на ЕУ, претставници на Европската комисија, Европската централна банка, Европска инвестициска банка, како и министрите за финансии и гувернерите на централните банки од земјите на Западен Балкан, Турција, Грузија, Молдавија и Украина.
Економија
Бислимоски: Oд 1 јуни ќе бидат на располагање дополнителни 500 GWh, со кои ќе може да се тргува на слободниот пазар во Косово, одлична бизнис-можност

Од 1 јуни македонските снабдувачи и трговци со електрична енергија ќе имаат можност да снабдуваат нови 1.000 потрошувачи од косовскиот пазар, каде што почнува дополнителната фаза на либерализацијата на пазарот со електрична енергија. Ова беше повод Регулаторната комисија за енергетика, водни услуги и услуги за управување со комунален отпад (РКЕ) да иницира состанок на кој косовскиот регулатор пред македонските снабдувачи и трговци ги презентира чекорите како полесно да пристапат на пазарот кај нив.
„Откога ги презедовме сите неопходни активности како регулатори и извршивме заемно признавање на лиценците за снабдување и трговија, сега сакаме компаниите да ги мотивираме да ја искористат оваа можност. Поголем пазар носи поголема конкуренција, а бенефитот е пониски цени за електрична енергија. Сега, за помалку од еден месец, односно од 1 јуни, ќе бидат на располагање дополнителни 500 GWh, со кои ќе може да се тргува на слободниот пазар на Косово и ова е одлична бизнис-можност за наште снабдувачи и трговци“, посочи Марко Бислимоски, претседател на РКЕ.
Претседателот на косовскиот регулатор, Канцеларијата на енергетскиот регулатор од Република Косово (ЕРО), Имер Фејзулаху, им посака добредојде на македонските снабдувачи истакнувајќи дека тие имаат повеќе искуство со оглед на тоа дека македонскиот пазар е одамна либерализиран.
„Ова е само меѓучекор кон приклучување кон единствениот пазар што го бара од нас Европската Унија. Во прилог на сите ни е да има намалени административни бариери, а зголемена конкуренција“, изјави Имер Фејзулаху од ЕРО (Канцеларијата на енергетскиот регулатор од Република Косово) (Energy Regulatory Office).
Со цел да се зголеми конкурентноста на пазарите во двете држави, РКЕ и ЕРО во 2023 година потпишаа меморандум за соработка со кој заемно се признаваат лиценците за снабдување и тргување со електрична енергија.