Македонската влада одлучи да ја прошири евтината кредитна линија на МБПР, која досега се користеше за финансирање на откуп и преработка и извоз на земјоделски производи, и за земјоделските производители за финансирање на процесот на производство.

Како што информираше во саботата владиниот портпарол, Александар Ѓорѓиев со оваа мерка се создава поволен инвестициски циклус кој го заокружува процесот на производство, откуп и преработувачка во земјоделството. Средствата ќе може да се користат по исклучително поволни услови: каматна стапка од 3%, што е најевтина каматна стапка во Македонија и пошироко, а износот на средства кои може да се користат ќе се движи до максимален износ од 300 илјади евра, информираше Ѓорѓиев.  Доколку земјоделците се одлучат за подигнување на средства со краен рок на отплата до 18 месеци, тогаш грејс периодот изнесува 6 месеци, а доколку крајниот рок на отплата е 5 години, тогаш грејс периодот за негово враќање изнесува 1 година. Средствата може да се користат и за инвестиции и за обртни средства.„Овие услови се најевтините услови кои постојат во овој период во поширокиот регион. Микро, малите и средни земјоделски производители треба да ја искористат оваа можност и да обезбедат развој на нивниот бизнис. Апликациите се примаат во МБПР и за краток период се одобруваат“, рече Ѓорѓиев. Тој додаде дека Владата предвидела уште две нови поволности во однос на роковите за користење на средствата, кои  ќе важат и за користење на средства за производство, откуп, преработка и извоз на земјоделски производи.Прво, се овозможи покрај финансирање на идни проекти, набавки и потреби, да можат да се финансираат и проекти, набавки и потреби направени 90 дена пред поднесување на кредитното барање од страна на земјоделците до МБПР.Со ова се овозможува финансирање заради сезонскиот карактер на секторот и работи кои морале да бидат направени во одреден момент, а подоцна не би можеле да се направат, а од подоцнежната набавка веќе не би имало ефект, и ова е една голема помош за земјоделците.Второ, се изврши пролонгирање на рокот за правдање на документите за наменското искористување на средствата од 30 на 90 дена. Ова е заради специфичноста на откупот и преработката на земјоделски производи каде што многу често клиентите имаат потреба од кредитни средства кои се користат со одредена динамика како резултат на сезонските движења во земјоделството. Од вкупно расположливите 10,7 милиони евра, досега се искористени 3,1 милиони евра, што значи дека на располагање на земјоделците остануваат 7,6 милиони евра./крај/